Sé vèwsé-lasa ka palé dè 9 kalité ki an « fwi a lèspri » a Bondyé : « lanmou, lajwa, lapé, pasyans, bonté, lanmou pou sa ki byen, lafwa, dousè é métriz ». Men a pa yenki sé kalité-lasa, lèspri sen ka pèwmèt-nou ni.

Adan sé vèwsé-la ki ka vin avan la, lapòt Pòl palé dè « sa lachè ka pwodui » : ‘péché sèksyèl, konduit ki pa pwòp, konduit ki san rèspé é ki ni fon-é-toupé, adoré idòl, tousa ki anrapò èvè sé démon-la, hay moun, babyé, jalouzi, fè kòlè san pon métriz, ripaj, chiraj, klan, lanvi, bwè pou sou, bòdé apiyé é dòt biten konsa’ (Gal. 5:19-21). Pòl té’é pé ajouté dòt biten ankò adan lis-lasa kon sa nou ka touvé an Kolosyen 3:5. Menmjan-la, apré i fin nonmé sé 9 kalité-la ki adan fwi a lèspri la, mi sa i ajouté : « Pa ni pon lwa kont dé biten kon séla. » Nou ka tou konprann kè Pòl pa té ni lentansyon nonmé tout sé kalité-la kè lèspri sen ka édé-nou travay.

Nou ka vwè sa byen lè nou ka konparé sé kalité-la i nonmé adan Galat 5:22, 23 èvè sa i maké ba lasanblé Éfèz. I di kè ‘limyè-la ka pwodui lanmou pou sa ki byen, sa ki jis é sa ki vré’ (Éféz. 5:8, 9). Kifè, nou ka touvé « lanmou pou sa ki byen », lajistis é lavérité ki adan ‘sa limyè-la ka fè’, ki adan « fwi a lèspri » sen a Bondyé.

Nou ka rèmawké osi kè Pòl ankourajé Timoté a travay 6 kalité : « jistis, lanmou pou Bondyé, lafwa, lanmou, andirans é dousè » (1 Tim. 6:11). Sé yenki 3 kalité pawmi yo (lafwa, lanmou é dousè) ki adan « fwi a lèspri » a Bondyé. Men Timoté té’é bizwen lèspri sen pou travay sé twazòt kalité-la, kivédi : jistis, lanmou pou Bondyé é andirans (konparé èvè Kolosyen 3:12 ; 2 Pyè 1:5-7).

Kifè, an Galat 5:22, 23 nou pa’a touvé tout sé kalité-la sé krétyen-la dwètèt travay la. Sé vré kè lèspri sen a Bondyé pé fè nou ni sé 9 kalité-la nou ka touvé an Galat 5:22, 23. Men, pou nou pé sa vin on krétyen ki mi, fò-nou travay dòt kalité ankò. É fò-nou ‘mèt nouvo pèwsonalité-la asi nou, on pèwsonalité kè Bondyé kréyé sèlon volonté a-y é ki annakò èvè vré jistis-la é vré fidélité-la’ (Éféz. 4:24).