Koʼã versíkulope oñeñeʼẽ hína 9 kualida rehe: “Umi mbaʼe porã oúva Ñandejára espíritugui haʼe hína: mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, akãguapy ha jejokokuaa”. Péro ndahaʼéi koʼã kualidánte Ñandejára espíritu ñanepytyvõtava jareko hag̃ua. ¿Mbaʼéichapa jaikuaa upéva?

Apóstol Pablo oñeʼẽ mboyve umi mbaʼe porã oúvare Ñandejára espíritugui, oskrivi: “Umi mbaʼe vai ogustáva yvypóra rete imperféktope ojekuaa porã, upévare oĩ ojapóva koʼã mbaʼe: hekovai, hekokyʼa, notĩri hembiapo vai hag̃ua, oadora umi taʼanga, ojapo espiritísmo, ijarhél, oñorairõ, ipyʼaro, ipochyeterei, oiko vai ótrondi, oporodividi, oforma umi sékta, iñenvidióso, ikaʼu, ofarrea itarovávaicha ha hetave koʼã mbaʼeichagua” (Gál. 5:19-21). Opakuévo Pablo heʼi “hetave koʼã mbaʼeichagua”, upéva heʼise oĩha hetave “mbaʼe vai ogustáva yvypóra rete imperféktope”, por ehémplo umi oñemombeʼúva Colosenses 3:5-pe. Ha upéicha avei oiko umi kualida porã Pablo oñeʼẽvare Gálatas 5:22, 23-pe. Upéicharõ, upépe Pablo noñeʼẽi kuri entéro umi kualida porã ikatúvare jareko pe espíritu sánto ñanepytyvõ rupi.

Upéva jahechakuaa ñakomparáramo umi mbaʼe porã oúva Ñandejára espíritugui, ha umi kualida porã oñeʼẽ vaʼekuére Pablo oskrivírõ guare pe kongregasión oĩvape Éfesope. Haʼe heʼi chupekuéra: “Jaiko upe lus rendýpe heʼise ñanembaʼeporãha opa mbaʼépe, ñandehústo ha jaikoha tape porãre” (Efes. 5:8, 9). Upéicharõ, ‘umi oikóva pe lus rendýpe’ ihústo ha oiko tape porãre, ha avei imbaʼeporã, ha upéva haʼe hína peteĩva umi kualida porã oúva Ñandejára espíritugui. Péicha jahecha pe espíritu sánto ikatuha avei ñanepytyvõ ñandehústo ha jaiko hag̃ua tape porãre.

Upéicha avei, Pablo omokyreʼỹ vaʼekue Timotéope oreko hag̃ua koʼã 6 kualida iporãva heʼírõ guare chupe: “Eñehaʼãmbaite ndehústo, eadora Ñandejárape nde pyʼaite guive, ejerovia, eporohayhu, eaguanta, ha neakãguapy” (1 Tim. 6:11). Péro koʼãva apytégui, mbohapýrente ojeʼe haʼeha “umi mbaʼe porã oúva Ñandejára espíritugui”, umíva hína jerovia, mborayhu ha akãguapy. Péro Timoteo oikuaa avei oikotevẽha espíritu sántore ihústo hag̃ua, oadora hag̃ua Ñandejárape ipyʼaite guive ha oaguanta hag̃ua (ekompara Colosenses 3:12; 2 Pedro 1:5-7 heʼívare).

Péicha jahecha Gálatas 5:22, 23 noñeʼẽiha entéro umi kualida peteĩ kristiáno oreko vaʼerãre. Ñandejára espíritu ikatu ñanepytyvõ jareko hag̃ua umi 9 kualida haʼéva “umi mbaʼe porã oúva Ñandejára espíritugui”. Péro oĩ hetave kualida tekotevẽva jareko oiko hag̃ua ñandehegui peteĩ kristiáno ikomplétova, ha ikatu hag̃uáicha ñamonde “peteĩ aóicha pe kondúkta pyahu, ojejapo vaʼekue Ñandejára oipotahaichaite, asegún umi mbaʼe oĩ porãva ha ifiélva” (Efes. 4:24).