Nelista tatun ira nga versikulo i siam nga kualidad ira na Cristiano: “I vunga na espiritu ay aya, pagayayya, imammo, pappasensia, kinasippo, kinapia, pangurug, kinalumamo, pangifugag ta baggi.” Ngem ari laman tu danatun i makkarasta nga kualidad nga makultiba tam ta uffun na espiritu na Dios.

Kunnasi tam nammuan yatun? Bueno, nige nga tinukoy ni apostol Pablo i vunga na espiritu, niturana: ‘Danoye i neravvunan ira nga kata-katolay: paggannug, maritta nga annangngua, ari mafugu-fugaddan nga pangngua ta marakay; paddaya-rayaw ta sinan-dios, pagana-anitu, pakkokontra, paddarama, pakkapassa-passil, pappata-patu, pagiti-itu, passirina na mavvurulu, pamassil, pagillellaw, ari nga mepangngo nga pappaga-pagayayya, tuange ta karuan paga nga kuddanaw.’ (Gal. 5:19-21) Niyultimu ni Pablo i kinagina gukaban na pakkagi tu “ta karuan paga nga kuddanaw,” yatutta arianna nga tinukoy i ngamin nga gannug nga kasali ta “neravvunan nga kata-katolay” gitta nuri ira na nakagi ta Colosas 3:5. Kunnatun gapa i nesimmu ta lista na makkarasta nga kualidad nga kinagi ni Pablo ta Galacia 5:22, 23. Yatutta ari nga tinukoy ni Pablo i ngamin nga makkarasta nga kualidad nga makultiba tam ta uffun na masanto nga espiritu.

Malippawa tam yaw nu ikumpara tam i nitura ni Pablo nga vunga na espiritu ta vunga na pattolay ta nawag ta kongregasion ta Efeso: “I vunga na pattolay ta nawag ay i pangngua ta ngamin nga mapia, matunung, anna kurug.” (Efe. 5:8, 9) Wan, kasali ta “vunga na pattolay ta nawag” i “pangngua ta ngamin nga mapia,” maski gapa i pangngua ta matunung anna kurug. Konektadu gapa i “pangngua ta ngamin nga mapia” ta “vunga na Espiritu.”

Malippawa tam gapa yaw nu ikumpara tam i vunga na espiritu ta annam nga kualidad nga nipagaram ni Pablo nga kultiban ni Timoteo: “kinatunung, makadios nga debosion, pangurug, aya, pagatta-attam, anna kinalumamo.” (1 Tim. 6:11, NW ) Tallu laman taw (pangurug, aya, anna kinalumamo) i kasali ta aspeto ira na “vunga na Espiritu.” Ngem siguradu nga ammu ni Timoteo nga mawag gapa nga kultibanna i kinatunung, makadios nga debosion, anna pagatta-attam. Anna ammuna nga kawaganna i uffun na espiritu tapenu kultiban danaw.​—Ikumpara i Colosas 3:12; 2 Pedro 1:5-7.

Yatutta ari laman tu danuri kualidad nga tinukoy na Galacia 5:22, 23 i kualidad ira nga mawag tu kultiban na Cristiano ira. Moffunan ittam na espiritu na Dios nga kultiban i siam nga aspeto na “vunga na Espiritu.” Ngem egga paga i tanakuan ira nga kualidad nga mawag nga kultibattam durante nga mammanakam ittam bilang Cristiano anna durante nga ibaruasi tam i ‘natalibagu nga kata-katolay nga naparo ta kasissinnan na Dios nga mepasingan ta kurug nga attolay nga matunung anna masanto.’​—Efe. 4:24.