بۇل تارماقتاردا توعىز قاسيەتتىڭ ٴ‌تىزىمى كەلتىرىلگەن:‏ «كيەلى رۋحتىڭ جەمىسى —‏ سۇيىسپەنشىلىك،‏ قۋانىش،‏ تاتۋلىق،‏ شىدامدىلىق،‏ مەيىرىمدىلىك،‏ ىزگىلىك،‏ سەنىم،‏ جۇمساقتىق،‏ ۇستامدىلىق».‏ ٴ‌بىراق قۇدايدىڭ رۋحى تەك وسى قاسيەتتەردى عانا دامىتۋعا كومەكتەسەدى دەپ ويلاماۋىمىز قاجەت.‏

ونى قايدان بىلەمىز؟‏ ەلشى پاۋىل كيەلى رۋحتىڭ جەمىسىن اتاماس بۇرىن،‏ بىلاي دەگەن:‏ «ٴ‌تاننىڭ ىستەرى.‏.‏.‏ ازعىندىق،‏ ارام ىستەر،‏ ورەسكەلدىك،‏ پۇتقا تابىنۋشىلىق،‏ باقسى-‏بالگەرلىك،‏ قاسكويلىك،‏ جانجالقويلىق،‏ قىزعانىش،‏ اشۋ-‏ىزاعا بەرىلۋ،‏ تالاس-‏تارتىس،‏ الاۋىزدىق،‏ سەكتالار قۇرۋ،‏ ٸشتارلىق،‏ ماسكۇنەمدىك،‏ ىردۋ-‏دىردۋ توي-‏دۋمان قۇرۋ جانە وسى سياقتىلار» ‏(‏عال.‏ 5:‏19—‏21‏)‏.‏ پاۋىل ٴ‌سوزىن «وسى سياقتىلار» دەپ اياقتاعان.‏ سوندىقتان ول،‏ قولوستىقتارعا 3:‏5 تەن كورىنەتىندەي،‏ «ٴ‌تاننىڭ ىستەرىنە» جاتاتىن باسقا دا ىستەردى اتاي العان.‏ سول سياقتى،‏ كيەلى رۋحتىڭ جەمىسىنە جاتاتىن توعىز قاسيەتتى اتاعاننان كەيىن پاۋىل:‏ «بۇلارعا قارسى ەش زاڭ جوق»،‏—‏ دەگەن.‏ «بۇلارعا» دەگەن ٴ‌سوز ٴ‌تۇپنۇسقا تىلدە ‏«وسى سياقتىلارعا» دەپ تە اۋدارىلادى.‏ سوندىقتان پاۋىل كيەلى رۋحتىڭ كومەگىمەن دامىتۋعا بولاتىن بارلىق قاسيەتتەردى اتاماعان دەي الامىز.‏

بۇنى ٴ‌تۇسىنۋ ٷشىن كيەلى رۋحتىڭ جەمىسىن پاۋىلدىڭ تىموتەگە ايتقان التى قاسيەتىمەن سالىستىرىپ كورەيىك.‏ پاۋىل تىموتەگە:‏ «ادىلدىك،‏ شىن بەرىلگەندىك،‏ سەنىم،‏ سۇيىسپەنشىلىك پەن تاباندىلىققا جانە جۇمساق بولۋعا ۇمتىل»،‏—‏ دەگەن (‏ٴ‌تىم.‏ 1-‏ح.‏ 6:‏11‏)‏.‏ بۇل قاسيەتتەردىڭ ۇشەۋى عانا،‏ اتاپ ايتقاندا،‏ سەنىم،‏ سۇيىسپەنشىلىك پەن جۇمساقتىق كيەلى رۋحتىڭ جەمىسىنە جاتادى.‏ ٴ‌بىراق تىموتە اتالمىش التى قاسيەتتىڭ وزگە ۇشەۋىن دە —‏ ادىلدىكتى،‏ شىن بەرىلگەندىك پەن تاباندىلىقتى —‏ كيەلى رۋحتىڭ كومەگىمەن دامىتا الاتىنىن ٴ‌تۇسىندى (‏قولوستىقتارعا 3:‏12؛‏ پەتىردىڭ 2-‏حاتى 1:‏5—‏7 سالىستىرىڭىز)‏.‏

ەندەشە،‏ عالاتتىقتارعا 5:‏22،‏ 23 تە ماسىحشىلەر دامىتۋى قاجەت بارلىق قاسيەتتەر اتالماعان.‏ قۇداي رۋحى «كيەلى رۋحتىڭ جەمىسىنە» جاتاتىن توعىز قاسيەتتى دامىتۋعا كومەكتەسە الادى.‏ ٴ‌بىراق تولىسقان ٴ‌ماسىحشى بولۋ ٷشىن جانە «ادىلدىك پەن ادالدىققا ساي كەلەتىن جاڭا بولمىسقا يە بولۋ» ٷشىن،‏ ٴ‌بىز بۇدان دا كوپ قاسيەتتەردى دامىتۋىمىز قاجەت (‏ەفەس.‏ 4:‏24‏)‏.‏