Ван рʹезада 9 һʹӧнӧред Мәсиһити һатьнә ньвисаре: «Бәре рʹӧһʹ әв ьн: Һʹьзкьрьн, шабун, әʹдьлайи, сәбьркьрьн, ширьнайи, ԛәнщи, баԝәри, мьлукти, хԝәгьртьн ДТʹ». Ле әм гәрәке нәфькьрьн кӧ рʹӧһʹе пироз али мә дькә, ԝәки тʹәне ван һʹӧнӧра бал хԝә пешда биньн.

Дина хԝә бьдьне, рʹезед пешийа веда Паԝлос чь дьбежә: «Кьред бьнйатʹа инсен әʹйан ьн: Бенамуси, һʹәрами, толти, пʹутпʹарьсти, пирәсерти, нәйарти, шәрʹ-дәʹԝ, һʹәвсуди, һерскʹәтьн, һәврʹькʹи, дӧтирәти, щӧдәти, чʹәʹве хьраб, меркӧжи, сәрхԝәш, кучʹьксанти у чь кӧ мина ван ьн» (Галт. 5:19-21). Паԝлос әԝан рʹеза бь ԝан гьлийа хьлаз дькә: «чь кӧ мина ван ьн». Ча әм дьвиньн, әԝи дәрһәԛа һʹәму тьшти нә гот, чь кӧ дькʹәвә нава «кьред бьнйатʹа инсен», мәсәлә дәрһәԛа кьред ӧса, кʹижан кӧ Колоси 3:5-да тенә готьне. Һәма бь ԝи щурʹәйи әԝ дәрһәԛа нәһә һʹӧнӧред баш жи дьбежә: «Һьндава ван тьштада ԛанун тʹӧнә». * Ча әм дьвиньн, Паԝлос дәрһәԛа һʹәму һʹӧнӧред баш нә гот, йед кӧ әм дькарьн нав хԝәда пешда биньн бь аликʹарийа рʹӧһʹе пироз.

Әм ве йәке дьвиньн чахе «бәре рʹӧһʹ» у «бәре рʹонайийе» дәрһәԛа кʹижана Паԝлос ньвиси, бәрамбәри һәв дькьн: «Бәре р′онайийе әв ьн: Ԛәнщи, һәԛи у рʹасти» (Әфәс. 5:8, 9). Бәле, чаԝа «ԛәнщи», ӧса жи һәԛи у рʹасти әԝ пʹарәкә «бәре рʹонайийе» нә, у ӧса жи пʹарәкә жь «бәре рʹӧһʹ» нә.

Ләма жи Паԝлос Тимотʹейо һелан дькьр, ԝәки «пәй рʹастийе, хԝәденасийе, баԝәрийе, һʹьзкьрьне, сәбьре у мьлуктийе һәрʹә» демәк ԝан шәш һʹӧнӧред баш бал хԝә пешда бинә (1 Тимтʹ. 6:11). Жь ԝан һʹӧнӧра тʹәне се һʹӧнӧр (баԝәри, һʹьзкьрьн, у мьлукти) дькʹәвьнә нава «бәре рʹӧһʹ». Ле Тимотʹейорʹа ӧса жи лазьм бу бь аликʹарийа рʹӧһʹе пироз һʹӧнӧред дьн жи нав хԝәда пешда бинә, демәк, рʹастийе, хԝәденасийе, у сәбьре (Бәрамбәр кьн Колоси 3:12; 2 Пәтрус 1:5-7).

Ча мә дит, Галати 5:22, 23-да нә һʹәму һʹӧнӧред кӧ Мәсиһи гәрәке нав хԝәда пешда биньн, һатьнә ньвисаре. Рʹӧһʹе Хԝәдейи пироз дькарә али мә бькә ԝан нәһә һʹӧнӧред «бәре рʹӧһʹ» нав хԝәда пешда биньн. Ле диса гәләк һʹӧнӧр һәнә кʹижан кӧ гәрәке бал мә һәбьн, сәва әм бьбьнә Мәсиһийед гьһишти у «мәрьве ну ль сәр хԝә ԝәргьрьн, кӧ кьрасе Хԝәдеда бь рʹастийе у һʹәлалийе бе ԛәлпи хӧльԛи йә» (Әфәс. 4:24).