Abino byepelo byatongola byubilo bitanu na bina byafwainwa kwikala na bena Kilishitu: “Bipangwa bya mupashi ke butemwe, lusekelo, mutende, kutekanya, lusa, buwame, lwitabilo, kukooka muchima ne kwikanya.” Pano bino, kechi twafwainwa kumonanga bino byubilo amba byo byonkatu mupashi wa Lesa byo akonsha kwitukwasha kwikala nabyo ne.

Monai mutumwa Paulo byo anembele mu byepelo byatendekelapo amba: “Mingilo ya mubiji . . . yo ino, bulalelale, bubipisho, byubilo bya kwizozola, kupopwela bankishi, kupopwela mipashi, kushinta, lutobo, kichima, bukaji, mapata, mabano, mepatulo, lunkumbwa, kupendwapendwa, kusangalala kubi ne bintutu bikwabo byapasha bino.” (Nga. 5:19-21) Paulo wapezhezheko na byambo bya kuba’mba “ne bintutu bikwabo byapasha bino.” Kino kimwesha’mba kechi watongwele “mingilo ya mubiji” yonse nabiji yoya yatongolwa pa Kolose 3:5 ne. Kyo kimotu ne byo atanchikile byubilo byawama bitanu na bina, waambile’mba: “Ku bintu bya uno mutundu kechi kuji muzhilo ne.” Onkao mambo, Paulo kechi watongwele byubilo byonse byawama mupashi wazhila byo akonsha kwitukwasha kwikala nabyo ne.

Twakonsha kumvwisha kino inge twaesakanya uno mutanchi wa bipangwa bya mupashi ku bipangwa bya kyeya Paulo byo anembejile kipwilo kya mu Efisesa. Wanembele’mba: “Bipangwa bya kyeya biji na buwame bonse, bololoke ne bukine.” (Efi. 5:8, 9) Kya kine, “buwame,” ne bololoke ne bukine, ke “bipangwa bya kyeya,” kabiji nabyo ke “bipangwa bya mupashi.”

Kabiji Paulo watundaikile Timoti kwikala na byubilo bitanu na kino byawama, ko kuba’mba “bololoke, munema wa kunemeka Lesa, lwitabilo, butemwe, kuchinchika ne kukooka muchima.” (1 Timo. 6:11) Byubilotu bisatu (lwitabilo, butemwe, ne kukooka muchima) byo byatongolwa’mba “bipangwa bya mupashi.” Pano bino, Timoti wakebewenga bukwasho bwa mupashi pa kuba’mba ekale na byubilo bikwabo byatongolwa, ko kuba’mba bololoke, munema wa kunemeka Lesa, lwitabilo, ne kuchinchika.—Esakanyaiko Kolose 3:12; 2 Petelo 1:5-7.

Onkao mambo, Ngalatiya 5:22, 23 kechi watongola byubilo byonse byafwainwa kwikala na bena Kilishitu ne. Mupashi wa Lesa wakonsha kwitukwasha kwikala na byubilo bitanu na bina byatongolwa’mba “bipangwa bya mupashi.” Pano bino, kuji byubilo byavula bingi byo twafwainwa kwikala nabyo pa kuba’mba tukome mu bwina Kilishitu bwetu ne “kuvwala bumuntu bupya bwalengelwe monka mwayila kyaswa muchima wa Lesa mu bololoke ne mu bukishinka bwa kine.”—Efi. 4:24.