Dɛn vas dɛn ya tɔk bɔt nayn kwaliti dɛn we Kristian fɔ gɛt: “Di kwaliti dɛn we di spirit de mek pɔsin gɛt na lɔv, gladi-at, pis, peshɛnt, i de mek pɔsin du gud, gɛt gudat, fet, tek tɛm du tin, ebul kɔntrol insɛf.” Bɔt wi nɔ go se na dɛn fayn kwaliti dɛn ya nɔmɔ Gɔd in spirit de ɛp wi fɔ gɛt.

Notis wetin di apɔsul Pɔl bin tɔk fɔs we i se: “I nɔ at fɔ si wetin mɔtalman lɛk fɔ du: mɔtalman lɛk fɔ liv fri ɛn bad layf, mɔtalman lɛk fɔ pre to dɛn tin we pipul de mek fɔ pre to, ɛn dɛn lɛk fɔ swɛ dɛn kɔmpin. Mɔtalman nɔ lɛk dɛn kɔmpin, ɛn dɛn de fɛt dɛn kɔmpin; dɛn de jɛlɔs dɛn kɔmpin, dɛn de vɛks pan dɛn kɔmpin, ɛn dɛn de put dɛnsɛf bifo dɛn kɔmpin mɔtalman. Dɛn lɛk fɔ de bay grup ɛn dɛn nɔ de si wit dɛn kɔmpin; dɛn nɔ want mek bɛtɛ fala dɛn kɔmpin, dɛn de drɔnk, ɛn dɛn de mek dɛn wayl pati, ɛn dɛn de du plɛnti ɔda bad tin dɛn lɛkɛ dɛn wan ya.” (Gal. 5:​19-21) So sɔntɛm Pɔl go dɔn tɔk bɔt ɔda tin dɛn we “mɔtalman lɛk fɔ du” lɛk di wan dɛn we i tɔk bɔt na Lɛtɛ Fɔ Kɔlɔse 3:​5. I bin du di sem tin afta we i dɔn tɔk bɔt nayn gud kwaliti dɛn, i bin tɔk insay vas 23, (NWT) se: “No lɔ nɔ de we de agens dɛn tin ya.” So Pɔl nɔ bin de tɔk bɔt ɔl di fayn kwaliti dɛn we di oli spirit go ɛp wi fɔ gɛt.

Wi go ebul ɔndastand dis we wi kɔmpia dɛn kwaliti dɛn ya to wetin Pɔl bin rayt to di kɔngrigeshɔn we bin de na Ɛfisɔs. I bin se: “If una de na di layt, una go du wetin gud, ɛn wetin rayt ɛn tɔk wetin tru.” (Ɛfi. 5:​8, 9) So fɔ du “gud,” ɛn wetin rayt ɛn tɔk wetin tru, na kwaliti we wi go gɛt “if [wi] de na di layt,” bɔt na kwaliti bak “we di spirit de mek pɔsin gɛt.”

Pɔl bin ɛnkɔrej Timoti fɔ gɛt siks fayn kwaliti dɛn. I bin se, “tray fɔ de waka tret, fɔ de du lɛkɛ aw Gɔd want, fɔ biliv Gɔd, fɔ lɛk pipul, fɔ de bia ɛn fɔ de du tin saful, saful.” (1 Tim. 6:​11) Pan ɔl di kwaliti dɛn we Pɔl ɛnkɔrej Timoti fɔ gɛt, na (fɔ biliv Gɔd, fɔ lɛk pipul, ɛn fɔ du tin saful saful) nɔmɔ de pan di “kwaliti dɛn we di spirit de mek pɔsin gɛt.” Bɔt Timoti go mɔs want mek di oli spirit ɛp am fɔ gɛt di ɔda kwaliti dɛn lɛk fɔ waka tret, fɔ de du lɛkɛ aw Gɔd want, ɛn fɔ de bia.—Luk Lɛta Fɔ Kɔlɔse 3:​12; Pita In Sɛkɛn Lɛta 1:​5-7.

So Galeshians 5:​22, 23, (NWT) nɔ tɔk bɔt ɔl di kwaliti dɛn we Kristian dɛn fɔ gɛt. Gɔd in spirit go ɛp wi fɔ gɛt di nayn kwaliti dɛn we wi bin dɔn tɔk bɔt as “kwaliti dɛn we di spirit de mek pɔsin gɛt.” Bɔt mɔ kwaliti dɛn de we wi nid fɔ gɛt fɔ mek wi go bi machɔ Kristian dɛn ɛn “fɔ liv di nyu layf [ɔ “abit,” NWT] we Gɔd dɔn gi una lɛkɛ aw i want. Pɔsin we de liv dis kayn layf go du wetin rayt na Gɔd yay ɛn ɔl wetin Gɔd tɛl am fɔ du.”—Ɛfi. 4:​24.