ပှၤဖးလံာ်ဖိတဖၣ် အတၢ်သံကွၢ်
ထဲဒၣ် တၢ်ဂ့ၤတၢ်ဝါတဖၣ်လၢ ကလၤတံ ၅:၂၂, ၂၃ အပူၤန့ၣ် အမ့ၢ်ဝဲ “သးအတၤသၣ်” ဧါ.
လံာ်စီဆှံအဆၢတဖၣ်အံၤ ပာ်ဖျါထီၣ်ဝဲ ခရံာ်ဖိ အတၢ်ဂ့ၤတၢ်ဝါ ခွံခါလီၤ. ဖဲန့ၣ်တဲဝဲလၢ “မ့မ့ၢ်သးအတၤသၣ်န့ၣ်, မ့ၢ်တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ [တၢ်သူၣ်ကညီၤသးကညီၤ, NWT], တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤပသး [တၢ်သူၣ်စူၤသးစူၤ, NWT], တၢ်ကီၤသူၣ်ကီၤသး သ့ၣ်တဖၣ်န့ၣ်လီၤ.” တၢ်ဂ့ၤတၢ်ဝါလၢ ကစၢ်ယွၤ အသးစီဆှံ မၤစၢၤပှၤဒ်သိး ပမၤဒိၣ်ထီၣ်အါထီၣ်အီၤသ့န့ၣ် တမ့ၢ်ထဲဒၣ် တၢ်ဂ့ၤတၢ်ဝါတဖၣ်အံၤဘၣ်.
ပသ့ၣ်ညါဘၣ် လၢကျဲဒ်လဲၣ်. တချုးလၢ တၢ်မၢဖိပီလူး ပာ်ဖျါထီၣ်ဝဲ သးအတၤသၣ်အဂ့ၢ် ဒံးဘၣ်န့ၣ် အဝဲကွဲးဝဲလၢ “ဒီးတၢ်မၤဘၣ်ဃးဒီး ပဖံးပညၣ်တဖၣ် . . . မ့ၢ်အအံၤ, တၢ်မၤကမၣ်မုၣ်ကမၣ်ခွါ, တၢ်အဲၣ်တလ့ၤအဲၣ်တဘီ, တၢ်သးကတၢ, တၢ်ဘါတၢ်ဂီၤ, တၢ်ဟိၣ်တၢ်ယီ, တၢ်ထီဒုၣ်ထီဒါ, တၢ်အ့ၣ်လိာ်ဆိးက့လိာ်, တၢ်ခိးထဲသိးလိာ်အသး, တၢ်သူၣ်ဒိၣ်သးဟ့, တၢ်ဂ့ၢ်လိာ်ဘှီလိာ်, တၢ်လီၤမုၢ်လီၤဖး, တၢ်အစုတလီၤဃုာ်ဘၣ်. တၢ်သးကါ, တၢ်မၤသံပှၤကညီ, တၢ်အီမူၤသံး, တၢ်မၤပွဲဧိၤဝီဧိၤ, ဒီးတၢ်ဒ်န့ၣ်အသိးတဖၣ်န့ၣ်လီၤ.” (ကလၤတံ ၅:၁၉-၂၁) ဖဲစီၤပီလူးတဲဝဲ တၢ်ဂ့ၢ်လၢအမ့ၢ် “တၢ်မၤဘၣ်ဃးဒီး ပဖံးပညၣ်တဖၣ်” အခါ အဝဲဟံးန့ၢ်တၢ်ကတိၤတဖၣ်အံၤလၢ ကလီးစဲ ၃:၅ အပူၤလီၤ. အဃိ ပသ့ၣ်ညါဘၣ်လၢ စီၤပီလူးတပာ်ဖျါထီၣ်ဝဲ တၢ်လၢအပၣ်ဃုာ်လၢ တၢ်မၤဘၣ်ဃးဒီး ပဖံးပညၣ် အကျါခဲလၢာ်ဘၣ်. ဒ်န့ၣ်အသိး ဖဲအဝဲပာ်ဖျါထီၣ် တၢ်ဂ့ၤတၢ်ဝါ ခွံခါဝံၤအလီၢ်ခံ ဖဲအဆၢဖိ ၂၃ န့ၣ်အဝဲတဲဝဲလၢ “တၢ်ဒ်န့ၣ်အသိးတဖၣ်အံၤ, တၢ်သိၣ်တၢ်သီလၢအတြီအီၤန့ၣ်, တအိၣ်ဘၣ်နီတမံၤဘၣ်.” စီၤပီလူး တပာ်ဖျါထီၣ်ဝဲ တၢ်ဂ့ၤတၢ်ဝါခဲလၢာ် လၢပမၤဒိၣ်ထီၣ်အါထီၣ်အီၤသ့ ခီဖျိလၢ သးစီဆှံ အတၢ်မၤစၢၤအဃိန့ၣ်ဘၣ်.
ပနၢ်ပၢၢ်ထီၣ် တၢ်ဂ့ၢ်အံၤသ့ခီဖျိ ပထိၣ်သတြီၤ သးအတၤသၣ် ဒီးတၢ်ကပီၤအတၤသၣ်လီၤ. တၢ်မၢဖိပီလူး ကွဲးန့ၢ်ဝဲ အ့းဖ့းစူးတၢ်အိၣ်ဖှိၣ်လၢ “တၢ်ကပီၤအတၤသၣ်မ့ၢ် ကယဲၢ်တၢ်မၤဂ့ၤ, ဒီးတၢ်တီတၢ်လိၤ, ဒီးတၢ်မ့ၢ်တၢ်တီလီၤ.” (အ့းဖ့းစူး ၅:၈, ၉) “တၢ်မၤဂ့ၤ” တၢ်, တၢ်တီတၢ်လိၤ ဒီးတၢ်မ့ၢ်တၢ်တီန့ၣ် မ့ၢ်ဝဲ “တၢ်ကပီၤအတၤသၣ်” ဒီးအပၣ်ဃုာ်စ့ၢ်ကီးလၢ “သးအတၤသၣ်” အကျါလီၤ.
ဒ်န့ၣ်အသိး စီၤပီလူး ဟ့ၣ်ဂံၢ်ဟ့ၣ်ဘါဝဲ စီၤတံၤမသ့းလၢ ကမၤအါထီၣ် တၢ်ဂ့ၤတၢ်ဝါ ဃုခါလီၤ. အဝဲတဲအီၤလၢ “လူၤတၢ်တီတၢ်လိၤ, တၢ်ယူးယီၣ်ယွၤ, တၢ်စူၢ်တၢ်နာ်, တၢ်အဲၣ်တၢ်ကွံ, တၢ်တူၢ်န့ၢ်ခီၣ်ကဲ, တၢ်သူၣ်စူၤသးစူၤ သ့ၣ်တဖၣ်တက့ၢ်.” (၁ တံၤမသ့း ၆:၁၁, NWT) ဖဲအံၤန့ၣ် ထဲဒၣ်တၢ်ဂ့ၤတၢ်ဝါ သၢမံၤ (တၢ်စူၢ်တၢ်နာ်, တၢ်အဲၣ်တၢ်ကွံ ဒီးတၢ်သူၣ်စူၤသးစူၤ) န့ၣ် အပၣ်ဃုာ်လၢ “သးအတၤသၣ်” အကျါလီၤ. စီၤတံၤမသ့း သ့ၣ်ညါဝဲလၢ ဒ်သိးအကမၤအါထီၣ် တၢ်ဂ့ၤတၢ်ဝါလၢအမ့ၢ် တၢ်တီတၢ်လိၤ, တၢ်ယူးယီၣ်ယွၤ ဒီးတၢ်တူၢ်န့ၢ်ခီၣ်ကဲအဂီၢ် အဝဲလိၣ်ဘၣ်ဝဲ ကစၢ်ယွၤ အသးစီဆှံ အတၢ်မၤစၢၤလီၤ.—ထိၣ်သတြီၤဒီး ကလီးစဲ ၃:၁၂; ၂ ပ့းတရူး ၁:၅-၇.
လၢတၢ်န့ၣ်အဃိ ကလၤတံ ၅:၂၂, ၂၃ တပာ်ဖျါထီၣ်ဝဲ တၢ်ဂ့ၤတၢ်ဝါ ကိးမံၤဒဲး လၢခရံာ်ဖိတဖၣ် ကြၢးမၤအါထီၣ်ဝဲန့ၣ်ဘၣ်. ကစၢ်ယွၤအသးစီဆှံ မၤစၢၤပှၤဒ်သိး ပကမၤအါထီၣ် တၢ်ဂ့ၢ်တၢ်ဝါ ခွံခါလၢအမ့ၢ် “သးအတၤသၣ်” န့ၣ်လီၤ. ဘၣ်ဆၣ် ဒ်သိးပကကဲထီၣ် ခရံာ်ဖိလၢ အဒိၣ်တုာ်ခိၣ်ပှဲၤအဂီၢ် တၢ်ဂ့ၤတၢ်ဝါအဂၤ လၢပကဘၣ် မၤဒိၣ်ထီၣ်အါထီၣ်အီၤန့ၣ် အိၣ်ဒံးဝဲလီၤ. တကးဒံးဘၣ် ပကဘၣ် “ကူထီၣ်သိးထီၣ် . . . နီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤလီၤ.”—အ့းဖ့းစူး ၄:၂၄.