Baverse yayi ke zonzilá bifu 9 ya mbote: “Mbuma ya mpeve ke luzolo, kilengi, kizunu, ntima ya yinda, ntima ya mbote, kusalasana, kiminu, lembami, kuzaba kukutika nzutu.” Kasi, mpeve ya Nzambi lenda sadisa beto na kukulisa bifu kuluta 9 yina beto me zonzila.

Na baverse yina me luta, apotre Paul soniká ti, ‘Beto nyonso zaba mbote ti bansatu ya kinsuni ke ni kindumba, busafu, luzingu ya kidi-kidi, kusambila biteki, kusala bunganga, [. . .] kuvanda na kimbanda, kuvanda ve na bumosi, kusosa kubaka kima ya mpangi, kusule malafu, nkunya ya kudya, mpe mambu ya nkaka ya mutindu yina.’ (Gal. 5:19-21) Na kumanisa, ntangu Paul zonzá, mambu ya nkaka ya mutindu yina, ya me lakisa ti, Paul zonzilá ve bifu nyonso ya yimbi ya “bansatu ya kinsuni,” faso yina me zonzila Bakolose 3:5. Yandi salá faso mosi na verse 23 ntangu yandi zonzilá bifu 9 ya mbote ya mbuma ya mpeve. Yandi zonzá: “Misiku ke niminá ve mambu ya mutindu yayi.” Ya ke na lakisá ti, Paul zonzilá ve bifu nyonso ya mbote yina mpeve ya santu lenda sadisa beto na kukulisa.

Ya ke talaná pwelele ntangu beto ke talá bifu ya mbuma ya mpeve yina Paul soniká samu na kimvuka ya Efeze: “mwinda ke pesá kusalasana mambu ya mbote mpe butsyeleka.” (Ef. 5:8, 9) Ya tsyeleka, “kusalasana, kintwadi na [kuvanda ya] kusungama (juste), mpe tsyeleka” ke bifu ya ba yina ke na kati ya “mwinda”, kasi ya ke mpe kitini ya “mbuma ya mpeve.”

Faso mosi mpe, Paul lombá na Timote na kukulisa bifu 6 ya mbote yayi: “[kuvanda ya] kusungama, kuzitisa Nzambi, kiminu, luzolo, kukanga ntima, mpe lembami.” (1 Tim. 6:11) Kaka ni bifu tatu (kiminu, luzolo, mpe lembami) ya bifu yayi, ke bitini ya “mbuma ya mpeve.” Kasi Timote vandá mpe na nsatu mpeve ya santu sadisa yandi samu na kukulisa bifu ya nkaka yina Paul zonzilaka: kuvanda ya kusungama, kuzitisa Nzambi, mpe kukanga ntima.—Tala Bakolose 3:12; na 2 Piere 1:5-7.

Na yawu, Bagalate 5:22, 23 me zonzila ve bifu nyonso ya mbote yina bakristo zolá kulisa. Mpeve ya Nzambi lenda sadisa beto na kukulisa bifu 9 ya mbote yina ba me zonzila faso “mbuma ya mpeve.” Kasi ya ke na bifu ya mbote yina beto ke na nsatu ya yawu, samu na kukula na kimpeve, mpe “kulwata kimuntu ya malu-malu yina ke ya kukwelana na luzolo ya Nzambi, na lunungu, mpe kukangama ya tsyeleka.”—Ef. 4:24.