Novelise odo kwa tumbura yikara yoSikriste ntane. Bibeli kutanta asi: “Yiyimwa yompepo, eharo, ehafo, mbili, edidimiko, nkenda, uwa, epuro, ugomoki, elipangero.” Nye eyi kapisi yiyo yelike yikara eyi azi tu vatere mpepo zokupongoka tu kare nayo.

Koneka eyi ga tente Paurusa komeho a tumbure yiyimwa yompepo zokupongoka. Age kwa tjenge asi: “Yirugana yorutu . . . ruhonda norukehe rozanyi nokudira kukuhuka nokudira kukuruka, nokukerera vakarunga woyimpempa noumpure nounkore nonomutangu nesupa noumbudi nomaligaunuko motumbunga nomonombunga, nomfudu nounkorwe nomadipago noyipito yomakurulya, nayimwe hena yangoso.” (Gar. 5:19-21) Paurusa kwa hagesere nononkango edi asi “nayimwe hena yangoso.” Eyi kulikida asi age kapi ga tumbwire “yirugana yorutu” nayinye ngwendi yeeyi va tumbura moVakorosi 3:5. Mokulifana apa ga tumbwire yiyimwa yompepo ntane, age kwa hagesere nononkango edi asi: “eyi ya ngesi veta kapi za yi silika.” Yipo nye, eyi kulikida asi Paurusa kapi ga tumbwire yikara nayinye eyi azi tu vatere mpepo zokupongoka tu tunge po.

Eyi kuyimonenena nsene tu hetakanesa yikara eyi, koyikara youzera eyi ga tumbwire Paurusa apa ga tjangerere mbungakriste zoVaefeso. Age kwa tente asi: “Uzera kureta uwa naunye nouhungami nousili.” (Efe. 5: 8, 9) Eyi kulikida asi “uwa” ntani nouhungami nousili kuna kara yiyimwa ‘youzera’ ntani aso kuna kara hena “siyimwa sompepo” zokupongoka.

Paurusa kwa korangedere hena Timoteusa a “kondjere uhungami netjirokarunga nepuro neharo nedidimiko nouwa womutjima.” (1 Tim. 6:11) Poyikara oyo, yine tupu ya hamena ‘koyiyimwa yompepo’ zokupongoka. Nye Timoteusa simpe ga hepere evatero lyompepo zokupongoka yipo a tunge po uhungami netjirokarunga.—Hetakanesa Vakorosi 3:12; 2 Peturusa 1:5-7.

Yipo nye, etjangwa lyomoVagarata 5: 22, 23 kapi lya tumbura yikara nayinye eyi azi tu vatere mpepo zokupongoka tu tunge po. Mpepo zokupongoka kutuvatera tu tunge po yiyimwa ‘yompepo’ ntane. Nye pwa kara hena yikara yimwe eyi azi tu vatere mpepo zokupongoka tu tunge po, yipo tu kure pampepo ntani yipo tu ‘guse muntu gomupe, ogu va unga a kare sihwi saKarunga, ogu a lihorora moukaro ou wa hungama, awo wa pongoka. Ukaro wangoso mousili au tundu.’—Efe. 4:24.