Verse zo mbo zitangumunaka bifu vwa (9): “Mbutu ya mpeve ni luzolo, nsayi, tidzunu, luvivululu, nsayi ya sarila mbote, mbote ya ku mutima, timinu, bulembami, na tifu tia tiyimina.” Kâ, mpeve ya Nzambi mbo yitubakisaka mu bâ na bifu bio mpe na biakaka bia mbote.

Tala mia tsoneka ntumwa Paulo mu verse zitekele: “Nsalulu za tinsuni . . . ni bunsuza, mvindu, ndiatulu yikondolo buzitu na ya nsoni, nsambululu ya biteki, bunganga, timbanda, nkesi, bundiafu, bundiafu bwa nwina [busulare], mikembo mia vwandi na miakaka.” (Nga. 5:19-21, NWT) Buna, Paulo ka tangumuna misamu miamiansoni ko mitariri “nsalulu za tinsuni,” ntiana bifu bie mu Bisi-Kolose 3:5. Mpila mosi mpe, bu kamana tangumuna bifu vwa bia mbote, wayizi tâ: “Mu misamu mia mpila yo, ka kwena musiku ko.” Buna Paulo ka yêla ko mu tangumuna bifu biabiansoni bi tubâka na bio mu lubakusu lwa mpeve santu.

Mbo tubakulaka musamu wo, bu tufwanakasaka mbutu ya mpeve na mbutu ya mutsamina ya zonzela Paulo ku timvuka tia Efeze: “Mbutu ya mutsamina mbo yibutaka misamu miamiansoni mia mbote, mia buderede na mia butieleka.” (Efz. 5:8, 9, NWT) Wa matieleka, “mbote,” buderede na matieleka, mu kati dia “mbutu ya mutsamina” biena, kâ “mbote” mu kati dia “mbutu ya mpeve” mpe yena.

Mpila mosi, Paulo watindisa Timote mu “landa buderede, kangama kwe Nzambi, timinu, luzolo, tifu tia korela na bulembami”​—bifu sambanu bia mbote. (1 Tim. 6:11, NWT) Bifu bia “mbutu ya mpeve” bitatu kwa batangumuni (timinu, luzolo, na bulembami) mu verse yo. Kâ, kampe Timote wabâ mpe na nsatu ya kurisa bifu biakaka bi batangumuni: buderede, kangama kwe Nzambi, na tifu tia korela.​—Fwanakasa Bisi-Kolose 3:12 na 2 Piere 1:5-7.

Buna Bisi-Ngalate 5:22, 23 ka yizonzelaka bifu biabiansoni bi fweti bâ na Mukristo ko. Mpeve ya Nzambi yilendi tu bakisa mu kurisa bifu vwa (9) bitariri “mbutu ya mpeve.” Kâ bifu biabingi bie neto nsatu mu bâ na bio ngatu tabâ Mukristo wa yela mpe ‘talwata timuntu tia môna tiayiluku mu Nzambi, mu buderede na busantu bwa matieleka.’​—Efz. 4:24.