Jivesi kana javuluka vilinga 9 vize vatela kupwa navyo vaka-Kulishitu. Vasonekaho ngwavo: “Mihako yashipilitu yikiko zangi, kuwahilila, kuunda, kutalilila chikoki, likoji, kuwaha, lufwelelo, kuvova, namuchima wakulikanyisa.” Oloze shipilitu yaKalunga yinahase nawa kutukafwa tupwenga navilinga vyeka vyamwaza, keshi evi kahako.

Anukenu ngwenu kaposetolo Paulu avangilile kusoneka mujivesi jakulivanga ngwenyi: “Vilinga vyakumujimba . . . vikiko ujila, majilo, vilinga vyakuzunguma, kulemesa makombelo, kupanda, jikole, vikokojola, lisungu, matoto, kulikindwojokela, vihandwa, tumauka twakuhanduka, lushiushiu, kupenda, viwanyino vyaliuya, navyuma vyakufwana ngana.” (Ngale. 5:19-21) Echi chasolola nge Paulu kakumishile kulava ‘vilinga vyosena vyakumujimbako,’ vyakufwana nge vize vavuluka hali Wavaka-Kolose 3:5. Chochimwe nawa, omu akumishile kuvuluka vilinga vyamwaza 9, ambile ngwenyi: “Lushimbi lwakukanyisa vyuma vyangana lwauchiko.” Shikaho Paulu kalavile vilinga vyosena vyamwaza vize twatela kupwa navyo mwomwo yakutukafwa kushipilitu yajilako.

Twatachikiza chuma kana hakwesekesa mukana kanou namazu aze Paulu asonekelele vandumbwenyi kuchikungulwilo chamuEfwesu. Ambile ngwenyi: “Kumunyika cheji kulovolanga kuwaha chosena, nakwoloka, namuchano.” (Efwe. 5:8, 9) Chikupu vene, “kuwaha” hohamwe nakwoloka namuchano vyapwa ‘[mihako] yakumunyika,’ oloze “kuwaha” nawa chatwama ‘hamihako yashipilitu.’

Kaha nawa Paulu alembelelele Chimoteu ‘afwile kwoloka nakupwa namuchima wakuzachila Kalunga, nalufwelelo, nazangi, nalukakachila, nakuvova.’ (Chimo. 1, 6:11) Havilinga kanevi avulukile Paulu hapwile kaha vilinga vitatu vize vyatwama ‘hamihako yashipilitu.’ Vilinga kana shina lufwelelo, zangi, nakuvova. Shikaho shipilitu yatelelele kukafwa Chimoteu apwenga navilinga vikwavo vize avulukile Paulu vyakufwana nge: kwoloka, namuchima wakuzachila Kalunga nalukakachila.—Esekesenuko Wavaka-Kolose 3:12; WaPetulu 2, 1:5-7.

Shikaho mukanda Wavaka-Ngalesha 5:22, 23, kawavuluka vilinga vyosena vize vatela kupwa navyo vaka-Kulishituko. Shipilitu yaKalunga yinahase kutukafwa tupwenga navilinga 9 vize vyapwa “mihako yashipilitu.” Oloze hakusaka tupwenga vaka-Kulishitu vakulindunuka twatela kupwa navilinga vyeka vyamwaza nakuvwala “mutu wamuhya uze vatengele kweseka nomu mwaya muchima waKalunga namukwoloka chamuchano namukushishika.”—Efwe. 4:24.