Ndikono wuoyo kuom kido ochiko mag Jokristo kowacho niya: “Olembe ma roho nyago gin hera, mor, kuwe, horuok, ng’wono, ber, yie, muolo, kod ritruok.” Kata kamano, ok onego wapar ni mago kende e olembe ma roho mar Nyasaye nyalo konyowa nyago.

Ne ane gima jaote Paulo nondiko ka pok nowuoyo kuom olembe ma roho nyago. Nondiko niya: “Timbe mag ringruok . . . gin terruok, tim ma ok ler, tim wang’-teko, lamo mar sanamu, timbe-juok, sigu, dhawo, nyiego, mirima mager, ywaruok, pogruok, kidienje, ich-lit, mer, nyasi mopong’ gi koko, kod gik ma kamago.” (Gal. 5:19-21) Paulo notieko kowacho ni, “kod gik ma kamago” mondo onyisgo ni timbe mag ringruok ng’eny moloyo timbe ma nokwanogo. Nonyalo kata medo timbe miwuoye e Jo-Kolosai 3:5. E yo ma kamano bende, bang’ kwano olembe ochiko ma roho nyago, nowacho niya: “Onge chik ma kwedo gik ma kamago.” Omiyo, Paulo ne ok owuoyo kuom olembe duto ma roho nyalo konyowa nyago.

Wanyalo winjo tiend wachno maler ka wapimo olembe ma roho nyago gi nyak mar ler ma Paulo nowuoye ka nondiko ne kanyakla ma Efeso niya: “Nyak mar ler oting’o timbe mabeyo duto gi tim makare kod adiera.” (Efe. 5: 8, 9) Omiyo, ‘tim maber’ kaachiel gi tim makare kod adiera gin “nyak mar ler,” to bende “ber” en achiel kuom “olembe ma roho nyago.”

Bende, jaote Paulo nojiwo Timotheo mondo olaw “tim makare, gi chiwruok chuth ne Nyasaye, gi yie, gi hera, gi sinani, kod muolo.” Mago gin kido auchiel mabeyo ahinya. (1 Tim. 6:11) Adek kuomgi, tiende ni, yie, hera, kod muolo okwan e “olembe ma roho nyago.” Roho maler bende e ma ne dhi konyo Timotheo nyago kido adek modong’go, ma ne gin: Tim makare, chiwruok chuth ne Nyasaye, kod sinani.​—Pim gi Jo-Kolosai 3:12; 2 Petro 1:5-7.

Omiyo, ok wanyal wacho ni Jo-Galatia 5:22, 23 wuoyo kuom kido duto ma Jokristo onego onyag. Roho maler mar Nyasaye nyalo konyowa nyago kido ochiko miluongo ni “olembe ma roho nyago.” Kata kamano, pod nitie kido mamoko mang’eny ma dwarore ni wanyag kaka wadhi nyime bedo motegno e yie, kendo ‘rwako kit dhano manyien ma ne ochue kuom dwaro mar Nyasaye ka luwore gi tim makare kod makruok motegno.’​—Efe. 4:24.