Eoon kein rej kwal̦o̦k kadkad ko ruwatimjuon kadkadin juon Kũrjin: “Leen jetõb kwõjarjar ej yokwe, lañlõñ, aenõm̦m̦an, kijenmej, jouj, em̦m̦an, tõmak, ineem̦m̦an, im jel̦ã irooj iood make. Ejjel̦o̦k jabdewõt kien ej n̦ae aolep men kein.” Bõtab jejjab aikuj bõk l̦õmn̦ak eo bwe erkein ej kadkad ko wõt rem̦m̦an me jetõb eo an Anij enaaj maroñ jipañ kõj kal̦apl̦o̦k ad kwal̦o̦ki.

L̦õmn̦ak kõn ta ko rijjilõk Paul ear je ilo eoon ko m̦oktal̦o̦k, ke ear ba: “Jerbal ko an kanniõk rej alikkar ilo men kein: L̦õñ, m̦anit ettoon, peran in kõm̦m̦ani men ko renana, kabuñ ñan ekjab, kajjetõbtõb, kõjdat, ire, ebbanban, illulu, jum̦ae, kõm̦m̦an jepel, l̦oor armej, pal̦e ro jet, kadek, iien iiãio ko robrak kõn m̦anit nana, im men ko ãierl̦o̦kwõt.” (Gal. 5:19-21) Paul emaroñ kar kwal̦o̦k kõn men ko jet me rej m̦õttan “jerbal ko an kanniõk,” ãinwõt men ko Kolosse 3:5 ej kwal̦o̦k kaki. Ilo ejja wãween in l̦o̦k wõt, ãlikin an kar kwal̦o̦k kadkad ko ruwatimjuon me rem̦m̦an, ear ba: “Ejjel̦o̦k jabdewõt kien ej n̦ae aolep men kein.” Kõn men in, Paul ear jab kajjioñ kõllaajraki aolep kadkad ko rem̦m̦an me jemaroñ kal̦apl̦o̦k ad kwal̦o̦ki ikijjeen jipañ eo jãn jetõb kwõjarjar.

Jej kile men in ñe jej keidi ñan ta ko Paul ear je ñan ri-Epesõs ro, ej ba: “Aolep men ko rem̦m̦an, im wãnõk, im m̦ool rej leen meram.” (Eps. 5:8, 9) Aet, “men ko rem̦m̦an,” kobal̦o̦k ippãn wãnõk im m̦ool, rej m̦õttan “leen meram,” bõtab rej bareinwõt m̦õttan “leen jetõb kwõjarjar.”

Ilo ejja wãween in l̦o̦k wõt, Paul ear rõjañ Timote ñan “kate . . . kõttõpar wãnõk, tiljek ñan Anij, tõmak, yokwe, kijenmej, im ineem̦m̦an”—kadkad ko jiljino me rem̦m̦an. (1 Tim. 6:11) Jilu wõt iaan men kein kar kwal̦o̦k kaki (tõmak, yokwe, im ineem̦m̦an), rej m̦õttan “leen jetõb kwõjarjar.” Bõtab, Timote enaaj bareinwõt aikuj bõk jipañ jãn jetõb kwõjarjar bwe en kal̦apl̦o̦k an kwal̦o̦k kadkad ko jet kar kwal̦o̦k kaki, ãinwõt: wãnõk, tiljek ñan Anij, im kijenmej.​—Keidi Kolosse 3:12; 2 Piter 1:5-7.

Kõn men in, ejjab mel̦el̦ein bwe Galetia 5:22, 23 ej kwal̦o̦k kõn aolep kadkad ko me rej aikuj in pãd ippãn juon Kũrjin. Jetõb eo an Anij emaroñ jipañ kõj ñan kal̦apl̦o̦k ad kwal̦o̦k kadkad kein ruwatimjuon me rej m̦õttan “leen jetõb kwõjarjar.” Bõtab elõñl̦o̦k kadkad ko jet jej aikuj in kal̦apl̦o̦k ad kwal̦o̦ki ilo ad rũttol̦o̦k wõt ilo tõmak, im ilo ad “kõn̦ak mour eo ekããl, eo kar kõm̦anm̦ane ekkar ñan ankilaan Anij, im ej pedped ioon wãnõk eo em̦ool im tiljek eo em̦ool.”—Eps. 4:24.