Karemdbã sogsgo
Rẽ yĩnga, zʋg-sõma nins b sẽn sõdg Galat rãmb 5:22, 23 pʋgẽ wã bal n yaa vʋʋsem sõngã biis bɩ?
Galat rãmb 5:22, 23 wã pʋgẽ, b sõdga zʋg-sõma a wɛ kiris-nebã sẽn segd n bɩɩse. Ad b sẽn yeele: “Vʋʋsem sõngã biis yaa nonglem, sũ-noogo, laafɩ, sũ-mare, maan-neere, sõmblem, tẽebo, sũ-bʋgsem, la yõk-m-menga.” La d pa segd n tags tɩ yaa zʋg-sõma kãensã bal la Wẽnnaam vʋʋsem sõngã tõe n sõng tõnd tɩ d bɩɩs ye.
Bõe yĩng tɩ d yet woto? Nand tɩ tʋm-tʋmd a Poll sõdg vʋʋsem sõngã biisi, a reng n yeelame: “Yĩngã tʋʋm . . . yaa yoobo, rẽgdo, nin-yoolem, bõn-naands pʋʋsgo, zĩn-dãmb yɛl maanego, beem, zaba, sũ-kiiri, sũ-yikri, no-koɛɛma, welsgo, ninsaalb pʋgbo, to bũmb tʋlgre, rã-tɩgre, reem-yoodo, la bũmb a taab sẽn wõnd bõn-kãensã.” (Gal. 5:19-21) Dẽnd a Poll ra tõe n sõdga bũmb a taab sẽn yaa “yĩngã tʋʋm” me n paase, wa b rãmb nins a sẽn sõdg Kolos rãmb 3:5 pʋgẽ wã. Woto me, a sẽn sõdg zʋg-sõma a wɛ wã poore, a paasame yaa: “Tõog ka be n kɩɩsd bõn-kãensã ye.” Gɛrk gom-bil ning b sẽn lebg tɩ “bõn-kãensã” rat n yeelame me tɩ “bũmb sẽn wõnd woto.” Dẽnd a Poll pa sõdg zʋg-sõma nins fãa vʋʋsem sõngã sẽn tõe n sõng tõnd tɩ d bɩɩsã ye.
D sã n dɩk vʋʋsem sõngã biisã a Poll sẽn sõdgã n mak ne bũmb ning a sẽn yeel Efɛɛz tigingã, d nee rẽ vẽenega. Ad a sẽn yeel-bã: “Vẽenemã biis yaa sõmblem buud fãa la tɩrlem la sɩda.” (Efɛ. 5:8, 9) “Sõmblem” n paas tɩrlem la sɩd naaga “vẽenemã biisẽ,” n leb n naag “vʋʋsem sõngã biisẽ.”
Woto me, a Poll sõdga zʋg-sõma a yoobe, n sagl a Tɩmote t’a bɩɩs-ba. A yeelame t’a “bao tɩrlem, wẽn-sakre, tẽebo, nonglem, tõog-toog la sũ-bʋgsem.” (1 Tɩm. 6:11) Zʋg-sõma kãensa sʋka, a tãab bal n naag “vʋʋsem sõngã biisẽ.” Yaa tẽebo, nonglem, la sũ-bʋgsem. La ra yaa tɩlɛ t’a Tɩmote paam vʋʋsem sõngã sõngre, n tõog n bɩɩs zʋg-sõma a taabã a Poll sẽn sõdgã, rat n yeel tɩ tɩrlem, wẽn-sakre, la tõog-toogo.—Ges-y Kolos rãmb 3:12; 2 Pɩyɛɛr 1:5-7.
Dẽnd Galat rãmb 5:22, 23 wã pʋgẽ, pa zʋg-sõma nins kiris-nebã sẽn segd n bɩɩsã fãa la b sẽn sõdgã ye. Wẽnnaam vʋʋsem sõngã tõe n sõnga tõnd tɩ d bɩɩs zʋg-sõma a wɛ wã b sẽn bool tɩ “vʋʋsem sõngã biisã.” La d sã n dat n yɩ kiris-ned tẽeb sẽn bɩ, zʋg-sõma a taab la d segd n bɩɩse, la d ‘yeelg nin-paalgã sẽn naan tɩ zems Wẽnnaam daabã, tɩrlem la kɩs-sɩd meng-meng pʋgẽ wã.’—Efɛ. 4:24.
