Ya-a ama vesi yalanda pa vikomwa 9: ‘Ivikomwa vya kumuzima alukundo, ukusecelela, umutende, ukutekanya, uluse, uwuzima, isuwilo, ukufuuka,nu kuilama.’ Lelo nanti ciwe wo-o, umuzimu wa kwe Yehova wungatwavwa ukuwa ni miwele na yinji.

Cani calenga tusinincizye wo-o? Amazwi yano Paulo walanzile pano atani alande pa vikomwa vya ku muzimu, aya kuti: “Cino ukulonda kwa muwili kukacita camanyikwa. Cikayilanjizya mukuzenkenta [“uwuzelele,” NWT], mu vya wunyali, nu wukwelenguzi, mukupepa kwa makolania, nu kupandapanda. Awantu wakalolana uwunyama, ukulwa, uwuzuwa, ukuvitwa, nu kufwitucizyanya. Ukupawulana, inkwini, ukukolwa nu kungwa kuwipe, na vino vyakolana na vyo-o.” (Gal. 5:19-21) Amazwi yakuti “na vino vyakolana na vyo-o,” yakulanjizya ukuti e Paulo atalanzile vyonsinye vino vyawa mu “kulonda kwa muwili.” Ndi vino vyalumbulwa pa Wakolose 3:5. Avino wacisile na pano walumbuzile ivikomwa 9 ivya ku muzimu watili: “Kusi amasundo yano yangakanya ivintunye vyo-o.” Fwandi e Paulo atalanzile ivikomwa vyonsinye ivya ku muzimu, vino umuzimu wutele wungatwavwa ukuwa na vyo.

Tukakwivwicisya co-o icisinka nga twalinganya amazwi yano e Paulo walembezile iwungwe lya mu efeso pano watili: “Amuno umusanya awuno wukaleta ivizawalo vizima nkani nu wulungamane nu kusimicila.” (Efes. 5:8, 9) Mwalola fwandi, “uwuzima,” ukusanzyako nu wulungamane ni cisinka, vyawa pa “vikomwa vya luswepo” napa “vikomwa vya ku muzimu.”

Swinya tukakwivwicisya co-o icisinka nga twalinganya na mazwi yano e Paulo walembezile e Timoti pano wamuwomelezyanga ukuwa ni vikomwa vya ku muzimu 6 ayakuti: “lwilanga uwulungamane, uwuLeza, isuwilo, ulukundo, ukuzizimicizya nu wucimyamya nanti ukufuka.” (1 Tim. 6:11) Vitatu vye pe vyo-o avino vikazanwa pa vikomwa vya ku muzimu akuli ukuti: “isuwilo, ulukundo nu wucimyamya nanti ukufuka.” Lelo e Timoti wavwambisyanga sana ukulundulula ivikomwa na vinji ndi vino, uwulungamane, ukuzizimicizya nu wukapepa swinya wamanyile ukuti angawa vye na yo-o imiwele nga cakuti umuzimu wutele wamwavwa.—Linganyaniko na Wakolose 3:12; ne 2 Peter 1:5-7.

Fwandi Wagalatiya 5:22, 23 watalanda ivikomwa vyonsinye ivya ku muzimu. Umuzimu wa kwe Yehova wungatwavwa ukuwa na vyo-o “ivikomwa vya ku muzimu 9.” Lelo kwawa ivikomwa navinji vino tuzipizile ukuwombesya ukuwa navyo pa kuti tuwe swe wasongo mu vya kwe Leza, na pa kuti ‘tuzwale uwuntu wupya wuno welewuzilwe muwukola wa kwe Leza wuno wayiwumbula mu wulungamane na mu wutele wakusimicila.’—Efes. 4:24.