Nu̱ú ña̱ versículo yóʼo va̱xi i̱i̱n ña̱ va̱ʼa ña̱ xíniñúʼu kuumií na̱ ndásakáʼnu Ndióxi̱. Ña̱yóʼo káchiña: “Ña̱ va̱ʼa ña̱ kúúmií espíritu kúú, ña̱ kuʼvi̱-iniyó kunitáʼanyó, si̱í kooyó, táxin kooyó, kúee koo iniyó, vií koo iniyó, va̱ʼa koo iniyó, kandíxayó Ndióxi̱, vitá koo iniyó, ka̱ʼnu̱-iniyó”. Soo su̱ví ña̱yóʼo kuití kúú ña̱ va̱ʼa ña̱ kivi na̱ʼa̱yó xa̱ʼa̱ ña̱ chíndeétáʼan espíritu Ndióxi̱ xíʼinyó.

Ná kotoyó ña̱ ka̱ʼyí ta̱ apóstol Pablo nu̱ú versículo ña̱ va̱xi chí sa̱táka: “Ña̱ kéʼé na̱ yiví kúú ña̱yóʼo, na̱ kéʼé ña̱ kini, na̱ kéʼé ña̱ yaku̱a̱, na̱ kǒo kúkaʼan nu̱ú xíʼin ña̱ kéʼéna, na̱ ndásakáʼnu inka ndióxi̱, na̱ kéʼé ña̱ tási, na̱ sáa̱-ini xíni inkana, na̱ kánitáʼan xíʼin inkana, na̱ íxaa kúiñu, na̱ kamaní sáa̱, na̱ káʼa̱n kúáchi, na̱ ndátaʼví-táʼan, na̱ sándákoo ña̱ kándíxana ta kíxáʼana kándíxana inka ña̱ʼa, na̱ sáa̱-ini xíni inkana xa̱ʼa̱ ña̱ kúúmiína, na̱ xíʼi ku̱a̱ʼání ndixi, vikó nu̱ú kininí kéʼéna, xíʼin ndiʼika ña̱ʼa ña̱ kítáʼan xíʼin ña̱yóʼo” (Gál. 5:19-21). Ña̱kán, tá ni̱ka̱ʼa̱n ta̱ Pablo xa̱ʼa̱ “ña̱ kéʼé na̱ yiví” saátu ni̱ka̱ʼa̱nra xa̱ʼa̱ inkakaña, tá kúú ña̱ va̱xi nu̱ú Colosenses 3:5. Ta ki̱ʼva saá íyo ña̱ ni̱ka̱ʼa̱nra xa̱ʼa̱ i̱i̱n ña̱ va̱ʼa ña̱ va̱xi nu̱ú Gálatas 5:22, 23. Tá ni̱ka̱ʼa̱nra xa̱ʼa̱ ña̱ va̱xi nu̱ú ña̱yóʼo, va̱ása níka̱ʼa̱nra xa̱ʼa̱ ndiʼika ña̱ va̱ʼa ña̱ kivi kuumiíyó xa̱ʼa̱ ña̱ chíndeétáʼan espíritu santo xíʼinyó.

Kúnda̱a̱-iniyó xíʼin ña̱ va̱xi nu̱ú Gálatas tá chítáʼanyóña xíʼin ña̱ ka̱ʼyíra ku̱a̱ʼa̱n nu̱ú na̱ congregación ña̱ ñuu Éfeso: “Saáchi ña̱ va̱ʼa ña̱ kúúmií luz kúú ña̱ va̱ʼa-ini, ña̱ nda̱kú xíʼin ña̱ nda̱a̱” (Efes. 5:8, 9). Nda̱a̱ táki̱ʼva xítoyó, ña̱ “va̱ʼa-ini” xíʼin ña̱ nda̱kú xíʼin ña̱ nda̱a̱ kúú táʼan “ña̱ va̱ʼa ña̱ kúúmií luz”, ta kúútuña táʼan “ña̱ va̱ʼa ña̱ kúúmií espíritu”. Ña̱kán, ni va̱ása níka̱ʼa̱n ta̱ Pablo xa̱ʼa̱ ña̱ nda̱kú xíʼin ña̱ nda̱a̱ nu̱ú Gálatas 5:22, 23, soo kiviva keʼéraña.

Ta saátu íyo ña̱ ni̱ka̱ʼa̱n ta̱ Pablo xíʼin ta̱ Timoteo, tá ni̱ka̱ʼa̱nra xíʼinra xa̱ʼa̱ i̱ñu̱ ña̱ va̱ʼa ña̱ kivi kuumiíra, ka̱chira: “Ña̱ nda̱kú keʼún, iinlá mií Ndióxi̱ ndasakáʼnún, kandíxaún Ndióxi̱, kuʼvi̱-iniún kuniún inkana, ndakú koo iniún, ta vitá koo iniún” (1 Tim. 6:11). U̱ni̱ kuití ña̱yóʼo kúú táʼan “ña̱ va̱ʼa ña̱ kúúmií espíritu”, ña̱ kandíxayó Ndióxi̱, ña̱ kuʼvi̱-iniyó kuniyó inkana, xíʼin ña̱ vitá koo iniyó. Soo saátu xi̱niñúʼu chindeétáʼan ña̱ espíritu santo xíʼin ta̱ Timoteo, ña̱ va̱ʼa na̱ʼa̱ra inkaka ña̱ va̱ʼa ña̱ ni̱ka̱ʼa̱n ta̱ Pablo xa̱ʼa̱: ña̱ keʼéra ña̱ nda̱kú, ña̱ ndasakáʼnura iinlá mií Ndióxi̱, ta ndakú koo inira (chitáʼanña xíʼin Colosenses 3:12; 2 Pedro 1:5-7).

Xa̱ʼa̱ ña̱yóʼo, Gálatas 5:22, 23 va̱ása káʼa̱nña xa̱ʼa̱ ndiʼi ña̱ va̱ʼa ña̱ kivi chindeétáʼan espíritu santo Ndióxi̱ xíʼinyó kuumiíyó. Ña̱yóʼo kivi chindeétáʼanña xíʼinyó ña̱ na̱ʼa̱yó i̱i̱n “ña̱ va̱ʼa ña̱ kúúmií espíritu”. Soo íyo inkaka ña̱ va̱ʼa ña̱ kivi kuumiíyó, tasaá xa̱a̱yó kooyó iin na̱ xu̱xa-ini ta nasamayó ña̱ kéʼéyó tasaá keʼéyó ña̱ nda̱kú nda̱a̱ táki̱ʼva kúni̱ mií Ndióxi̱ (Efes. 4:24).