Onovelesikulu ombo mbapopia ovituwa etyive, ovaumbili va Huku vesukisa okukala navio. Mbati: “Ovinyango viononkhono mba Huku . . . ohole, ehambu, ombembwa, oumphua-lundo, okankhenda, ouwa-tima, nekolelo, nomapole, nokulikondola-omutima.” Mahi otyo katyilekesa okuti ononkhono mba Huku mbutukuatesako vala okukala novituwa ovio.

Etyi Paulu ehenepopie ovinyango viononkhono mba Huku, wapopia okuti “ovilinga violutu . . . ouhayo wotyihola, nouheha, novituwa vikundisa, nokufenda ovikahuku, noumbanda, noundyale, novilwa, nounkhuelume, nonyengo, nokuhelipakaila-mo, nokuliyapauka, nokulandula onondongeso mbovanthu, nonkhi, nounkholwa, novipito ovivi, novipuka vielifwa novio.” (Gal. 5:19-21) Otyo tyilekesa okuti Paulu ankho upondola okupopia vali ovituwa ovikuavo ‘viovilinga violutu,’ ngevi apopia mu Ova Kolosu 3:5. Tupu ngatyo alinga etyi apopia ovituwa etyive oviwa. Wapopia okuti “petupu otyitumino tyipatana ovipuka ovio.” Onondaka ombo mbulekesa okuti Paulu kapopile ovituwa aviho ononkhono mba Huku mbupondola okutukuatesako okukala navio.

Otyo tyelifwa netyi Paulu ahonekelele ewaneno liova Efesu okuti: “Ovinyango viotyitei vielikuata novipuka aviho oviwa, nouviuki, notyili.” (Efe. 5:8, 9) Ovipuka aviho oviwa [ouwa-tima], nouviuki, notyili, vikahi ‘movinyango viotyitei,’ mahi tupu tutyii okuti ovituwa ‘viovinyango viononkhono mba Huku.’

Tupu Paulu wapopilile Timotiu alinge ononkhono mbokukala novituwa epandu. Ankho una ‘okuovola ouviuki, nokufenda Huku, nekolelo, nohole, nekoleleyo, nepoleyo.’ (1 Tim. 6:11) Wamona-le okuti povituwa ovio, pena vala vitatu “viovinyango viononkhono mba Huku”? Papopiwa vala ekolelo, nohole, nepoleyo ine oundalawa. Mahi Timotiu ankho mesukisa okukuatesuako nononkhono mba Huku opo akale novituwa ovikuavo oviwa, ngetyi ouviuki, nokufenda Huku, nekoleleyo. — Tyieleka no Ova Kolosu 3:12; 2 Petulu 1:5-7.

Ngotyo, omukanda Ova Galata 5:22, 23, kaupopi ovituwa aviho omuumbili wa Huku ena okukala navio. Ononkhono mba Huku mbupondola okutukuatesako okukala novituwa etyive ‘viovinyango viononkhono mba Huku.’ Mahi kuna ovituwa ovikuavo tuesukisa okukala navio opo tupame motyili, ‘atulivaleka ontheto omphe yalingwa ngetyi Huku ahanda, mouviuki wotyotyili noukuatyili.’ — Efe. 4:24.