Amavesi agha ghikuyoba isya tuyilo 9: Ulwene loli uluseke ulwa mbepo lo lughano, ulusekelo, ulutengano, ubufisalyoyo, ubololo, ubununu, ubusubiliwa, ubutengamoyo, ukwikola.” Loli utu tukaya twene utuyilo utu mbepo wa Kyala ghukututula ukuya nagho.

Inong’onela isya ntumiwa Pauli bo akalemba amasyu agha, atile: “Isyene imbombo sya mbili isi sili pabwelu itolo, syo isi, ubuhahani, ubunyali, ubulufu kubulowe, ukufibombela ififwani, ubulosi, ubulughu, ukulwana, akabini, ilyoyo ukwilondela, ukutapukana, ukupikanika nkipanga, ubufi, ubwa kinwelo, ubulufu ku fyakulya, nifingi ifi fifwene bo fififi.” (Gal. 5:19-21) Pauli amalisye na masyu aghakuti “nifingi ifi fifwene bo fififi” yonongwa yake akayobile fyosa “ifinyonywa fya mbili” bo ifi fili pa Bakolosi 3:5. Mwakufwana itolo, bo ayobile utuyilo utununu 9, umwene atile: “Lukayako ululaghilo ulo lukulasana na sisisi.” Yonongwa yake Pauli akayobile utuyilo tosa utununu utu tubaghile ukukusya nubutuli bwa mbepo mwikemo.

Tukuketa isi linga tukufwanikisya na isi Pauli abalembile Abakristu ba ku Efesi, apa atile: “buno uluseke lwa lumuli luli nubununu bosa, nubugholofu kangi nubwanaloli. (Ef. 5: 8, 9) Momumo ukuti “ubununu,” ubugholofu nubwanaloli fyo fighaba fya ‘luseke lwa lumuli,’ kangi fighaba fya “seke sya mbepo.”

Mwakufwana itolo, Pauli alinkasisye Timoti ukukonga utuyilo 6 utu: “Ubugholofu, ukuntila Kyala, ulwitiko, ulughano, ubufisalyoyo nubutengamoyo.” (1 Tim. 6:11) Utuyilo tutatu utu (ulwitiko, ulughano nubutengamoyo) tukuyobiwa ukuya “seke sya mbepo.” Loli Timoti alondiwagha ubutuli bwa mbepo mwikemo ukuti anangisye utuyilo utungi bo: ubugholofu, ukuntila Kyala nubufisalyoyo.—Fwanikisya na Bakolosi 3:12; 2 Peteri 1:5-7.

Yonongwa yake ilemba lya Bagalatia 5:22, 23 litikuyoba utuyilo tosa utu Abakristu bikulondiwa ukukonga. Mbepo mwikemo wa Kyala ghubaghile ukututula ukukonga utuyilo 9 utu tukuyobiwa ukuya “seke sya mbepo.” Loli tulipo utuyilo twingi utu tukulondiwa ukukonga ukuti tukule mwambepo ‘nukufwala umundu umpya uyu apeleliwe nkifwani kya Kyala, mbugholofu na mbwikemo bwa naloli.’—Ef. 4:24.