Akasulat ed sarayan bersikulo so siameran kualidad ya nepeg ya ipanengneng na saray Kristiano: say “aro, liket, kareenan, anos, kaabigan, kamaongan, pananisia, inkaulimek, panangontrol ed sarili.” Balet aliwan saraya labat so kualidad ya niwala ed sikatayo diad tulong na masanton espiritu.

Imanoen so insulat nen apostol Pablo diad saray akaunan bersikulo: ‘Saray gawa na laman et seksual ya imoralidad, karutakan, anggapoy-baing a kagagawa, idolatriya, espiritismo, pambubusolan, pankokolkol, imon, sanok, sangsangan, inkaapag-apag, saray sekta, ibeg, panagbuanges, mabanday a panliliket, tan arum nin singa saraya.’ (Gal. 5:19-21) Kanian wala ni ray “gawa na laman” ya agbinitla dia nen apostol Pablo, ya singa saramay insulat to ed Colosas 3:5. Ontan met sirin ed samay insulat to ed Galacia 5:22, 23. Wala ni ray balibalin kualidad ya niwala ed sikatayo diad tulong na masanton espiritu balet agla binitla nen Pablo.

Ontan so konklusyon tayo no imanoen tayo may sulat nen Pablo ed kongregasyon na Efeso nipaakar ed bunga na liwawa. Imbaga to: “Say bunga na liwawa et say amin a klase na kamaongan tan inkatunong tan katuaan.” (Efe. 5:8, 9) Insulat to ya say “kamaongan” et kabiangan na “bunga na liwawa,” anggano kabiangan met itan na “bunga na espiritu.”

Naimano tayo met itan nen binilin nen Pablo si Timoteo ya ipanengneng to iray anemiran kualidad​—say “inkatunong, debosyon ed Dios, pananisia, aro, panagsungdo, tan inkaulimek.” (1 Tim. 6:11) Talora labat ed saratan so kabiangan na “bunga na espiritu” (pananisia, aro, tan inkaulimek). Balet siempre, kaukolan nen Timoteo so tulong na masanton espiritu pian nipanengneng toy inkatunong, debosyon ed Dios, tan panagsungdo.​—Ikompara so Colosas 3:12; 2 Pedro 1:5-7.

Kanian aliwa labat ya saramay kualidad ya walad Galacia 5:22, 23 so nepeg ya niwala ed sikatayo. Diad tulong na espiritu na Dios, nipanengneng tayo so siameran kabiangan na “bunga na espiritu” ya akalista ditan. Balet wala ni ray kualidad ya kaukolan ya niwala ed sikatayo legan tayon ontatatken ed espiritual tan pansasagpotan tayon “isulong so balon personalidad a pinalsa unong ed linawa na Dios tan mitunosan ed saray kakaukolanen na tuan inkatunong tan katooran.”​—Efe. 4:24.