Kë versïculuchöqa isqun yanapakuykunallam kan. Y kënömi nin: “Santu espïritupa wayïninqa këmi: kuyakï, kushishqa kë, yamë kë, pacienciayoq kë, alli shonquyoq kë, alli kë, markäkï, yachanëpaq kë, peqata tsarëta yachë”. Alli nuna kanapaqqa Jehoväqa tukuynöpam yanapamantsik, manam këkunallawantsu yanapamantsik.

Qepan kaq versïculuchömi apostol Pabluqa kënö nirqan: “Jutsasapa ëtsapa rurëninkunaqa [...] këkunam kayan: rakcha rurëkuna, melanëpaq rurëkuna, mana penqakur mana allikunata rurë, imäginkuna adorë, brujerïa, chikinakï, contranakur tsaränakï, chikipänakï, feyupa piñakï, imachöpis mana paqtë, rakikëkuna, sectakuna, envidianakï, machakïkuna, lluta portakuyänan fiestakuna y tsënö cösaskuna” (Gäl. 5:19-21). Colosensis 3:5 ninqannöpis, apostol Pabluqa rikätsikurqan “jutsasapa ëtsapa rurëninkunaqa” maskuna kanqantam. Tsënöllam Gälatas 5:22, 23 ninqankunawampis pasakun. Tsënölla Jehovä mana yanapamanqantsikpaqmi apostol Pabluqa nikan.

Tsëtaqa nintsik apostol Pablu Ëfesuman cartakur kënö ninqampitam: “Aktsipa wayïninqa tukï alli kë, imëka alli kaqkunata rurë y llapan rasumpa kaqmi” (Efes. 5:8, 9). Rikanqantsiknöpis alli këta, imëka alli kaqkunata rurëwan y llapampis rasumpa kaqtaqa, apostol Pabluqa Gälatas 5:22, 23 ninqanchöpis churëta puëdinmanmi karqan.

Tsënöllam apostol Pabluqa Timoteutapis nirqan kënö kanampaq: “Alli kaqta rurëta, llapan shonquwan Diosta sirwita, markäkïta, kuyakïta, tsarakoq këta y yachanëpaq këta imëpis ashi” (1 Tim. 6:11). Jehoväqa kallpanwanmi yanapamantsik markäkunapaq, kuyakoq y yachanëpaq kanapaq. Y tsënöllam Timoteupis alli kaqta ruranampaq, llapan shonqunwan Diosta sirwinampaq y alli tsarakunampaqqa Teyta Diospa kallpanta wanarqan (Colosensis 3:12; 2 Pëdru 1:5-7).

Gälatas 5:22, 23 ninqanchöqa manam imanö kanantsikpaq llapantatsu nin. Tsë versïculuchö isqun Diospa yanapakuyninkunallam yurin. Peru mas alli cristiänu kanapaqqa, ‘mushoq imanöpis këtam imëka röpatanö vistikunantsik, [...] tsëqa alli kaqta rurë y mana jaqikoq këmi’ (Efes. 4:24).