I roto i teia irava e iva tu o te au Kerititiano: “Ta te Vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki.” Kare ko teia ua te au tu meitaki ta te vaerua o te Atua ka tauturu ia tatou kia akatupu.

Akamanako ana i ta te apotetoro ko Paulo i tata i roto i teia irava: “Te au angaanga a te kopapa, . . . koia oki te moeaana, te akaturi, te tuatua viivii ra, e te kanga, te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, te vareae, te ta tangata, te konā kava, te kariei, e mei te reira te tu.” (Gala. 5:19-21) Te vai atura tetai au tu ta Paulo ka taiku, o “te au angaanga a te kopapa,” mei tei taikuia ia Kolosa 3:5. No reira, i te tataanga i teia au tu meitaki e iva, karanga aia: “Kare ua e ture e akakore i te reira.” No reira kare a Paulo i taiku ana i te au tu meitaki pouroa ka rauka ia tatou i te akatupu ma te tauturu a te vaerua tapu.

Ka kiteaia teia me akaaite tatou i teia au tu ki ta Paulo i tata ki te putuputuanga i Ephesia: “Ta [“te au ua o te marama,” NW] e akatupu ra, koia te au mea meitaki ravarai, e te tuatua-tika, e te tuatua-mou.” (Ephe. 5:8, 9) Ae, ko “te meitaki,” pera katoa te tuatua tika e te tuatua mou, e tuanga no “te au ua o te marama,” pera katoa e tuanga no “te au ua o te vaerua.”

Kua akaue a Paulo ia Timoteo kia “aruaru atu i te tuatua-tika, i te akono i te Atua, i te akarongo, i te anoano, i te akakoromaki, e te maru”—e ono au tu memeitaki. (1 Timo. 6:11) E toru o teia e (akarongo, inangaro, e te maru) tei taikuia ei “au ua o te vaerua.” Ka inangaro katoa a Timoteo i te tauturu a te vaerua tapu kia akatupu i tetai au tu tei taikuia: te tuatua tika, te akono i te Atua, e te akakoromaki.—Akaaiteia ia Kolosa 3:12; 2 Petero 1:5-7.

No reira kare a Galatia 5:22, 23 i taiku ana i te au tu Kerititiano katoatoa. Ka tauturu te vaerua o te Atua ia tatou kia akatupu i te iva tu o “te au ua o te vaerua.” Inara e maata atu te au tu te ka rauka i te au Kerititiano “kia akatangata ou oki ko tei angaia kia tau i te Atua ra, i te tuatua-tika e te tapu mou.”—Ephe. 4:24.