Tindzrimana leti ti khanela hi 9 wa matsrhamela ya wukriste. Ti kombisa leswaku: ‘Mhandzru wa moya i: lizrandzru, ku tsrhava, ku zrula, ku lehisa mbilu, wumbilu, wunene, lipfumelo, ku nabyala, ku tikhoma.’ Kambe a swi djuli ku hlaya swone leswaku moya wa ku xwenga wa Xikwembu Nkulukumba wu hi pfuna ku txutxela matsrhamela lawo ntsena.

Xiya leswi mupostola Pawulo a swi hlayiki ka tindzrimana leti nga mahlweni. A te: ‘Kambe a mintizro ya nyama mi le livaleni, mi nga leyi: wumbuye, ni wuwoswi, ni xambya, ni ku gandzrela swithombe, ni wungoma, ni mona ni timholova ni swikwele, ni mahlundzru ni tihanyi, ni ku tsravukana, ni ku yalana, ni ku tsrohoka ni ku popswa, ni makwanga, ni leswi fanaka na swone.’ (Ga 5:19-21) Loko Pawulo a ku ‘ni leswi fanaka na swone’ swi djula ku hlaya leswaku na a hlaye mintxhumu yimbeni leyi nga ‘mintizro ya nyama’, ya ku fana ni leyi yi nga ka Ba-le-Kolosa 3:5. Hi ndlela leyi fanaka, loko Pawulo a khanela hi 9 wa matsrhamela lamanene, a te: ‘A nawu a wu kone lowu wa ku yala leswo.’ Leswo swi komba leswaku Pawulo loko a khanela hi ‘mhandzru wa moya’ a a nga khaneli hi matsrhamela lawo ntsena.

Hi nga twisisa mhaka leyo loko hi fananisa mhandzru wa moya ni leswi Pawulo a swi tsraliki ka papela ledzri a dzri tsraleliki va-Efesa. A te: ‘A mhandzru wa livaningo i hinkwabyu ni ku lulama ni xihlayelamfuzri.’ (Ef 5: 8, 9) Ina, a tsrhamela dzra ‘wunene’, xikan’we ni ku lulama ni xihlayelamfuzri, dzri hamba xiyenge xa ‘mhandzru wa livanigo’, kambe hi nkama wu li wun’we dzri hamba xiyenge xa ‘mhandzru wa moya’.

Hi lani ku fanaka, Pawulo a kutxe Timoteo akuva a landzra: ‘Ku lulama, ni wukhongoti, ni lipfumelo, ni lizrandzru, ni ku tiyisela, ni ku nabyala.’ Ku nga 6 wa matsrhamela ya lisima swinene. (1Tm 6:11) Ka wone ko va matsrhamela mazrazru ntsena (lipfumelo, lizrandzru ni ku nabyala) ku khaneliwaka ha wone leswaku ma hamba swiyenge swa ‘mhandzru wa moya’. Kambe swi le livaleni leswaku Timoteo a a ta djula mpfunu wa moya wa ku xwenga akuva a txutxela matsrhamela mazrazru laman’wana, ma nga: Ku lulama, wukhongoti ni ku tiyisela.​—Vona ni buku dzra Ba-le-Kolosa 3:12; 2 Petros 1:5-7.

Hi nga tlhasela ka wugamu bya leswaku buku dzra Ba-le-Galatia 5:22, 23 a dzri khaneli hi matsrhamela hinkwawu ya wukriste. Moya wa ku xwenga wu nga hi pfuna ku txutxela 9 wa matsrhamela lawa ma hambaka xiyenge xa ‘mhandzru wa moya’. Kambe ku ni matsrhamela man’wana lama djulekaka akuva hi va vakriste lava wupfiki ni ku ‘yambala mhunu lwemupswa, lweyi a vumbiwiki hi xifaniso xa Xikwembu Nkulukumba, a ku lulameni ni ku xwengeni ka xihlayelamfuzri’.​—Ef 4:24.