Lemba ya Agalata 5:22, 23, isalonga kuti: “Misapo ya nzimu wakucena ndi iyi: Ufuni, kukomerwa, ntendere, kupirira, kukoma ntima, udidi, cikhulupiro, kukhurudzika na kudzitonga.” Mbwenye kusiyapo makhaliro anewa, nzimu wa Mulungu unakwanisa kutiphedza toera kukulisa makhaliro anango.

Toera kubvesesa pyenepi onani pidalonga Paulu mbadzati kulonga misapo ya nzimu wakucena. Iye alonga: “Mabasa aunyama ndi ulukwali, macitiro akunyanyasa, makhaliro akupasa manyadzo, kulambira madzimunthu, kukhulupira mizimu, kuidana, nthonga, ntcanje, kuipirwa kakamwe, kukhonda bverana, kugawana, kucita misoka, bibvu, kuledzera, maphwando akukhonda thema, na pinthu pinango ninga pyenepi.” (Agal. 5:19-21) Natenepa mafala akumalisa adalonga Paulu asapangiza kuti pana pinthu pinango pyakuti pisacita khundu ya “mabasa a unyama.” (Akol. 3:5) Munjira ibodzi ene, pidamala Paulu kulonga misapo ya nzimu wakucena inagumanika pa vesi 23 iye alonga: “Nkhabepo mwambo unakhondesa pinthu pyenepi.” Pyenepi pisapangiza kuti Paulu nee alonga makhaliro onsene adidi akuti ife tinakwanisa kuapangiza na ciphedzo ca nzimu wakucena.

Ife tinakwanisa kubvesesa pyenepi tingalandanisa misapo ya nzimu na misapo ya ceza idalonga Paulu kuna akristu a ku Efeso: “Nsapo wa ceza usaphataniza ntundu onsene wa udidi, ulungami na undimomwene.” (Aef. 5: 8, 9) Mwandimomwene, “udidi” usacita khundu ya “misapo ya ceza”, mbwenye iwo usacitambo khundu ya “misapo ya nzimu wakucena.”

Munjira ibodzi ene, Paulu akulumiza Timoti toera kukulisa makhaliro awa: “ulungami, kukhala wakuperekeka kuna Mulungu, kukhala na cikhulupiro, kukhala na ufuni, kukhala wakupirira na wakupfulika.” Natenepa, ife tinakwanisa kubvesesa misapo ya nzimu mukulandanisa na makhaliro anewa. (1 Tim. 6:11) Mwa makhaliro anewa, cikhulupiro, ufuni na kupfulika ndiwo basi ene asacita khundu ya “misapo ya nzimu wakucena.” Mbwenye na ciphedzo ca nzimu wakucena Timoti akhafunikambo kukulisa makhaliro ninga awa: “Ulungami, kukhala wakuperekeka kuna Mulungu na kukhala wakupirira.—Landanisani na Akolose 3:12; 2 Pedhru 1:5-7.

Natenepa kusiyapo makhaliro analongwa pa Lemba ya Agalata 5:22, 23, akristu asafunika kukulisambo makhaliro anango. Nzimu wa Mulungu unakwanisa kutiphedza toera kukulisa makhaliro 9 akuti asacita khundu ya “misapo ya nzimu wakucena.” Mbwenye mu ndzidzi unapitiriza ife kutumikira Yahova tisafunika kukulisa makhaliro anango, pontho tisafunika “kubvala uunthu upswa, udacitwa mwakubverana na cifuno ca Mulungu, mu ulungami wandimomwene na kukhulupirika.”—Aef. 4:24.