Olo lwandiko luganirire morhere mwenda g’Ecikristu. Ilehe l’iroho litagatifu liba: “Buzigire, mwishingo, murhula, kulembera, lukogo, bwinja, buyemere, butûdu n’okucihasha.” Cikone, arhali ago gone morhere iroho litagatifu lya Nnamahanga lyakarhurhabala rhube nago.

Embere Paolo ayandike olu lwandiko luganirire ilehe l’iriho litagatifu, aderha erhi: “Ntaye omanyire ebijiro by’omubiri . . . okujira eby’enshonyi, okurherekera abazimu, okujira eby’obukurungu, okushombana, akavulindi, obuyagalwa, obukunizi, ennongwe, okurhayumvanya, okuciberamwo, okucifinja ebya bene, endalwe, obudambi, n’ebindi bya bene ebyo.” (Gal. 5:19-21) Paolo arhayandikaga “ebijiro byoshi by’omubiri,” bulya rhumanyire oku hali ebindi biri biderhe omu lwandiko lwa Abakolosi 3:15. Co cirhumirhe erhi ayusa aderha ago malehe mwenda ayushûla ntya: “Nt’irhegeko lyakahanza ebindi bya bene ebyo.” Omu ntyo Paulo arhayandikaga amorhere goshi iroho litagatifu lyakarhurhabala okuba nago.

Rhwanahugûkwa ezo nderho erhi rhwakazishushanya n’ezindi nderho Paolo ayandikirâga ecigamba c’e Efezi, aderha ntya: ‘Bulya amalehe gw’obulangashane gwo galerha ngasi minja, obushinganyanya n’okuli.’ (Efez. 5:8, 9) Neci,“aminja” ciri cigabi “c’ilehe ly’obulangashane,” ci kandi ciri cigabi “c’ilehe l’iroho litagatifu.”

Ko n’oko, Paolo ahanûla Timoteyo oku “alongereze obushinganyanya n’okucishwekerera kuli Nnamahanga n’obwemere n’obuzigire n’obushibirizi n’obutûdu.” K’okuderha morhere ndarhu. (1 Tim. 6:11) Mw’olu lwandiko, morhere asharhu (obwemere, obuzigire n’obutûtu) gw’omu “bigabi b’ilehe l’iroho litagatifu” gone gali maderhe omo. Timoteyo naye al’ilagirire oku burhabale bw’iroho litagatifu ly’aba n’agandi morhere gali mw’olu lwandiko, nka obushinganyanya, okucishwekerera kuli Nnamahanga n’obushibirizi.​—Wanahugûkwa omu kusoma Abakolosi 3:12; 2 Petro 1:5-7.

Kw’okuderha oku olwandiko lwa Abagalasiya 5:22, 23 lurhaganirire amorhere goshi iroho litagatifu lyakarhurhabala okuba nago. Iroho litagatifu lya Nnamahanga lyanarhurhabala rhube n’ago morhere mwenda gahamagalwa “ilehe l’iroho.” Cikone hali morhere manji rhushinganine rhube n’ago malehe lyo rhuba Bakristu bakuzire kiroho, ‘na ntyo rhwanayambala obumuntu buhyahya bwalemagwa oku nshushano ya Nnamahanga, bunacîyerekine omu bulamo bushinganine na bwimana.’​—Efez. 4:24.