Miresaky toetsy Kristiana sivy andinin-teny reo: “Ty vokatsini-fanahy le fitiava, hafalea, fiadana, fahari-po, hasoa fanahy, hasoa toetsy, finoa, fahalemeam-panahy, fifehezam-bata.” Fe mazava ho azy fa tsy toetsy sivy reo avao ty toetsy ananantsika lafa manampy antsika ty fanahy masi-Ndranahary.

Zao ty nisoratini-apostoly Paoly, amy andininy aloha eo rey: “Ty asani-nofotsy, le fijangajangà, fahalotoa, fandaisam-bata baranahiny, fanompoa sampy, fisà aoly, fanaova kirafy, fifamalea, fialona, fanjekeani-heloky, hatea ankany, fisaratsaraha, sekta, fanalikalia, fibobohan-toaky, fisà feno habaleha, noho ty manahaky ani-reo.” (Gal. 5:19-21) Midika raha zay fa mbo nisy raha hafa azoni-Paoly nikaihy hoe “asani-nofotsy.” Anatini-zay azy voaresaky amy Kolosianina 3:5 ao rey. Manahaky ani-zay avao koa ty nataony lafa baka nitanisa toetsy soa sivy ie amy Galatianina 5:22, 23 eo. Tsy nitononini-Paoly iaby lafa kila toetsy soa mety hananantsika vokatsini-fanampeani-fanahy masy.

Mety hahatsapa ani-zay tsika lafa ampitovizintsika amy toetsy voatono ao reo ty raha nisoratini-Paoly ho ani-fiangonani-Efesosy hoe: “Ty vokatsini-mazava le hasoa toetsy sankarazany noho fahitia voho fahamarina.” (Efes. 5:8, 9) Toetsy anatini-“vokatsini-fanahy” ty “hasoa toetsy” fe resahiny eo fa anatini-“vokatsini-mazava” koa raha io, miaraky amy fahitia noho fahamarina.

Nampirisiky ani-Timoty koa Paoly mba ‘hila ty fahamarina, ty fahafoizam-bata ho a Ndranahary, ty finoa, ty fahalinisa, voho ty fahalemeam-panahy.’ (1 Tim. 6:11) Toetsy eny tena soa iaby reo. Ty telo amy reo avao ro nivoatono tanatini-“vokatsini-fanahy” (finoa, fitiava, noho fahalemeam-panahy). Fe azo antoky fa mbo nila ty fanampeani-fanahy masy koa Timoty mba hananany ani-toetsy ilany reo: Fahamarina, fahafoizam-bata ho a Ndranahary noho fahalinisa.—Ampitovizo amy Kolosianina 3:12; 2 Petera 1:5-7.

Hitantsika baka amy zay fa tsy ze toetsy soa iaby tokony hananani-Kristiana ro hitantsika amy Galatianina 5:22, 23 ao. Afaky manampy antsika ty fanahy masy mba hana ani-toetsy sivy voatanisa ho anatini-“vokatsini-fanahy” reo. Fe mbo misy toetsy maro mila ananantsika mba hahavy antsika ho matotsy sady “hisiky ty toetsy vaovao, azy niforony mifanaraky amy sitrapo-Ndranahary iny, amy tena fahitia noho tsy fivaliha.”—Efes. 4:24.