Avɛrse wanɛ walumola wekeka djuwa walekɔ leteyi kɛ ‘lowambo lɔ nyuma’: ‘Ngandji, osasa, mvu, bale ntshitshi, wɔlɔ w’oloko, wɔlɔ, djawo, ɔkɔkɛ edjinge ndaakota’. Koko apalekɔ ngo wekeka wasɔ toko ndeke nyuma kɛ Ndjambe okokawɔ tokotshɛ dj’iso mba.

Kolenda kɛnɛ kɛ ɔpɔstɔ Pɔɔlɔ ndafune lá vɛrse kɛnɛ lá n’kambo djɛ ‘elemo wɛ demba’: ‘Wekinɛ wayi wambindo wa nsanga mbeto, wayi wa mbindo, n’kfumbo djɛ ntshamba nsonyi, ntɛmɔla tosakandole, nkɔta ekanga, enkomba, ampɔsɔ, djewɔ, nkɛlɛ k’indeko, yamano, djaatano, taato tɔ n’tolo, ankombola, n’vɔ waná, fɛtɛ y’indeko edjinge akambo wa wopo wɔkɔ.’ (Nga. 5:19-21) Ɛna ente, Pɔɔlɔ akokaka numola n’kfumbo nkina djetama ‘ambɔ elemo wɛ demba’, ndjɔmbɔmba n’kfumbo djolumolawɔ lá Kɔlɔsɛ 3:5. Wopo ɔkɔmɔ ndeke, m’ɔkɔngɔ wɔ nde numola wekeka djuwa wɛ ‘lowambo lɔ nyuma’, nde ashikikɛka ante: ‘Lako ɔlɛmbɛ wosekɛ akambo wa ngete wasɔ.’ Lasɔ, ikanyi yɛnde itayala yɛ mbala wekeka wankfumɔ wakoka nyuma k’ekina ntokotshɛ dj’iso mba.

Iso ndjawolaka n’kambo ntshɔ wina wɛdjɛso wekeka wanɛ la kɛnɛ kɛ Pɔɔlɔ ndafunela otshumano w’ase Ɛfɛsɛ ante: ‘Lowambo l’owaya lolekɔ la topo tɔ wɔlɔ t’onkfumɔ edjinge sii, edjinge nsɔsɔlɔ.’ (Ɛfɛ. 5:8, 9) Ngete sii la nsɔsɔlɔ, ‘wɔlɔ’ alekɔ l’eteyi kɛ ‘lowambo l’osase’ edjinge l’eteyi kɛ ‘lowambo lɔ nyuma.’

Lonkina, Pɔɔlɔ akembɛka Timɔte djɛ nde ndjala la wekeka asamalo wanɛ: ‘Sii, imama la Ndjambe, djawo, ngandji, nkfumeyɛ, edjinge ɔkɔkɛ.’ (1 Ti. 6:11) Lá wekeka wanyi, asato toko (djawo, ngandji, edjinge ɔkɔkɛ) ndeke l’eteyi kɛ ‘lowambo lɔ nyuma.’ Koko, djɛ Timɔte mba edjinge nkamba la wekeka asato ankina wanɛ: sii, imama la Ndjambe edjinge nkfumeyɛ, ngo nde mba okotshɔ wɔ nyuma k’ekina.​—Ɛdjɛ la Kɔlɔsɛ 3:12; 2 Pɛtɛlɔ 1:5-7.

Djɛko ndeke, Ngalatiya 5:22, 23 apalumola wekeka ankfumɔ wa okristo oyɛnde ladjɛ mba ma lotshimbo lɔ nyuma k’ekina. Nyuma kɛ Ndjambe nkoka ntokotshɛ dj’iso ndjala la wekeka djuwa wanɛ. Koko iso ladjɛ mba wekeka ankina dj’iso nkoma akristo wambokemba lá nyuma edjinge dj’iso ‘ndɔta lonto lɔ n’tato lotongamisa má ɛkɔpa kɛ Ndjambe la wopo wɔ sii edjinge la n’kɔmano djɛ nsɔsɔlɔ.’​—Ɛfɛsɛ 4:24.