Di tëkisi aki ta taki soni u nëigi fasi di Keesitu sëmbë musu abi. A ta taki taa: „Te di jeje ta tii wan sëmbë, nöö a o abi lobi, piizii, kötöhati, pasensi, tjalihati u sëmbë, bunuhati, biibi, saapifasi, söseei a o ta duwengi hënseei.” Ma wa musu si kuma dee fasi aki nöö da dee fasi di di jeje u Gadu sa mbei sëmbë ko abi.

Unfa u du sabi di soni aki? Wë ufö apösutu Paulosu taki soni u dee fasi di di jeje u Gadu ta mbei sëmbë ko abi, hën a bi taki taa: „Nöö dee soni di di zöndu sinkii ta du, dë gbelingbelin u si e. Dee soni dë da fanafiti libi a di së u manu ku mujëë soni, fasi u libi di an limbo, hogi di sëmbë ta du söndö sen, di dini di sëmbë ta dini poipoi gadu, obia wooko, di buuse di sëmbë ta buuse wotowan, takitaki, haun, taanga hatiboonu, toobi, di paati di sëmbë ta paati sëmbë ku sëmbë, poipoi lei, langa wojo u soni, di dööngö di sëmbë ta dööngö, fesa ka sëmbë ta du hii pei soni, ku woto soni kuma dee disi jeti” (Gal. 5:19-21, NW). Hën da Paulosu bi sa kai woto soni tu di „di zöndu sinkii ta du” dee na ta kai ku Gadu, kuma dee soni di de taki u de a Kolosën 3:5. Wë sö nöö di Paulosu bi kai nëigi bunu fasi te a kaba, hën a bi taki a vers 23 taa: „Na wan wëti ta kuutu dee soni aki.” Hën da Paulosu an bi kai hii dee bunu fasi di di jeje u Gadu ta mbei sëmbë ko abi.

U ta fusutan di soni aki te u tei dee fasi di di jeje u Gadu ta mbei sëmbë ko abi, maaka ku dee soni dee Paulosu bi sikifi da dee sëmbë u di kemeente u Efeise. A bi taki taa: „Ee i dë a di së u limbo, nöö joo ta libi bunu ku sëmbë, nöö joo ta libi letileti söndö ganjan” (Ef. 5:8, 9). Awa bunuhati, leti libi, ku di libi di u musu libi söndö ganjan, da fasi di wan sëmbë ta abi te a dë „a di së u limbo”. Ma dee fasi aki da „ fasi di di santa jeje u Gadu ta mbei sëmbë ko abi” tu.

U ta fusutan di soni aki tu te u tei dee fasi di di santa jeje u Gadu ta mbei sëmbë ko abi maaka ku dee sikisi bunu fasi di Paulosu bi piki Timoteo taa a musu mbei möiti faa abi. A bi piki ën faa ta „libi leti, faa dini Gadu fajafaja, faa abi biibi, faa ta lei taa a lo’ sëmbë, faa hoi dou, söseei faa abi saapifasi” (1 Tim. 6:11, NW). Dii u dee fasi aki (biibi, lobi, ku saapifasi), nöö sikifi a di tëkisi di ta taki u „dee fasi di di jeje u Gadu ta mbei sëmbë ko abi”. Ma Timoteo bi o abi di jeje u Gadu fanöudu tu faa ko abi dee woto fasi dee sikifi a di tëkisi aki. Dee fasi dë da: Di libi di sëmbë musu ta libi leti, di dini di sëmbë musu ta dini Gadu fajafaja, söseei di hoi di sëmbë musu ta hoi dou.​—Luku Kolosën 3:12; 2 Petuisi 1:5-7.

Sö u ta si taa Galasia 5:22, 23 an ta taki u hii dee fasi di wan Keesitu sëmbë musu abi. Di santa jeje u Gadu sa heepi u fuu ko abi dee nëigi fasi dee sikifi a di tëkisi aki. Ma woto bunu fasi dë jeti di u musu ko abi fuu sa ko dë gaangaan sëmbë a di biibi. Nöö a sö wan fasi a o dë taa u ’tei di njunjun libi di Gadu da u, fuu ko ta djeesi ën seei. Biga hën ta libi bunu a hii futu ku limbo hati’.​—Efeise 4:24.