Manga ayatẹ̌ ene nẹ̌sěbạ sio sipatẹ̌ nakoạ buang rohkẹ̌ masusi, ene kai ”kakěndagẹ̌, karal᷊uasẹ̌, dame, kasasabarẹ̌, kapiang naung, kapia, pangangimang, kasasikome naung, dingangu mẹ̌kakědangu watangeng”. Katewe, ini bal᷊inẹ mangal᷊ene buang rohkẹ̌ masusi kětạeng sio sipatẹ̌ ene.

Bọu apa i kitẹ makasingkạ ene? Těntal᷊ang bědang tawe nẹ̌sěbạ buang rohkẹ̌, Rasul Paulus němohẹ, ”Hasilu badang marosa . . . ene kai kakanoạ amoral, karal᷊amuhụ, kakanoạ tawe mamamea, měněmbah berhala, hal᷊ẹ̌ piạ sěmpụe dingangu manga rohkẹ̌ dal᷊akị, mẹ̌papědu, mẹ̌dal᷊ia, cemburu, pědu, mẹ̌sitori, tawe nasěmbaụ, manga sekte, pěndang iri, mẹ̌bukang, pesta liar, dingangu manga hal᷊ẹ̌ kerene.” (Gal. 5:19-21) Pěmanda, i Paulus nẹ̌bera ”dingangu manga hal᷊ẹ̌ kerene”, ene mangal᷊ene piạ hal᷊ẹ̌ bal᷊inẹ nakoạ bageang bọu ”hasilu badang marosa”, katewe i Paulus tawe nẹ̌sěbạ manga hal᷊ẹ̌ ene kere niwohẹ su Kolose 3:5. Kerene lai, su tempong bọu nẹ̌sěbạ sio sipatẹ̌ nakoạ buang rohkẹ̌ masusi, i sie naul᷊ị, ”Tawẹ apa hukung limawang manga hal᷊ẹ̌ ene.” Nal᷊ahẹ, Paulus tawe nẹ̌sěbạ kěbị sipatẹ̌ mapia botonge todẹkang i kitẹ ual᷊ingu tul᷊umang rohkẹ̌ masusi.

Tadeạu limembong makaěna hal᷊ẹ̌ ini, i kitẹ botonge mapẹ̌sul᷊ung buang rohkẹ̌ dingangu manga hal᷊ẹ̌ nakoạ hasilu tualagẹ̌. Paulus němohẹ gunang sidang Efesus, ”Tualagẹ̌ makarěntang haghing kapia, katatul᷊idẹ̌, dingangu katěngadẹ̌.” (Ef. 5:8, 9) Nal᷊ahẹ, ”kapia” sěngkasio dingangu katul᷊idẹ̌ lai katěngadẹ̌, bal᷊inẹ kětạeng bageang bọu ”tualagẹ̌”, katewe lai bageang bọu ’buang rohkẹ̌ masusi’.

Kerene lai, Paulus němahangsang si Timotius gunang ’měnahusu barang mapia, kasasatia su Mawu, pangangimang, kakěndagẹ̌, mẹ̌tatahang, dingangu kasasikome naung’. (1 Tim. 6:11) Bọu ěnung sipatẹ̌ mapaelẹ̌ ene, kětạeng tatělu nisěbạ i Paulus sěngkasio dingangu manga sipatẹ̌ nakoạ bageang bọu ’buang rohkẹ̌ masusi’. Ene kai pangangimang, kakěndagẹ̌, dingangu kasasikome naung. Maning kerene, i Timotius lai tantu harusẹ̌ měkoạ barang nihino, měnodẹ kasasatia su Mawu, dingangu mẹ̌tatahang. Kụ, i sie masingkạ i sie botonge měkoạ ene mạeng piạ tul᷊umang rohkẹ̌ masusi.​—Bandingkan Kolose 3:12; 2 Petrus 1:5-7.

Nal᷊ahẹ, manga sipatẹ̌ harusẹ̌ piạ su tau Kristen ene bal᷊inẹ kětạeng sio sipatẹ̌ nisěbạ su Galatia 5:22, 23. Rohkẹ̌ masusi bọu Mawu botonge makatul᷊ung si kitẹ gunang měnodẹ sio sipatẹ̌ nakoạ bageang bọu ’buang rohkẹ̌ masusi’. Katewe, rohkẹ̌ masusi lai botonge mẹ̌tul᷊ung si kitẹ tadeạu piạ haghing sipatẹ̌ wal᷊inẹ. Kụ hasile, i kitẹ sarung makoạ tau Kristen matělang su rohani dingangu ”měpakẹ pěbawiahẹ̌ buhu, kụ seng nikoạ tuhụ kapulung Mawu, kụ nẹ̌tatahino dingangu katěngadẹ̌ lai kasasatia tutune”.​—Ef. 4:24.