Ambola w’oma le ambadi
Onde waonga woshilami lo Ngalatiya 5:22, 23 ato mbakenga “olowa wa nyuma”?
Avɛsa asɔ shilaka waonga divwa w’Okristo: “Olowa wa nyuma wekɔ ngandji, ɔngɛnɔngɛnɔ, wɔladi, solo dia lotutsha, ɔlɔlɔ w’otema, ɔlɔlɔ, mbetawɔ, memakana ndo ndjakimɛ.” Koko, aha waonga asɔ ato mbele waonga w’amɛna wakoka nyuma ka Nzambi tokimanyiya dia mbakɛnɛmɔla.
Tende kɛnɛ kakafunde ɔpɔstɔlɔ Pɔɔlɔ lo avɛsa wa la diko: “Etsha wa demba . . . vɔ ɛnɛ: Awui wa mindo wa dieyanelo, akambo wa mindo, lɔkɛwɔ la fumbɔ nsɔnyi, ɔtɛmwɛlɔ wa dikishi, diɔtɔnganelo dia la ɛdiɛngɛ, ɔlɔshanelo, mindjo, kandjema, nkɛlɛ ka tshambandeko, ewanu, diatɔnelo, taato t’ɛtɛmwɛlɔ, ɔkɔmiya, wodjwelo wa wanu, fɛtɛ yele l’awui wa tshambandeko ndo akambo wa woho ɔsɔ.” (Ngal. 5:19-21) Ɔnkɔnɛ, Pɔɔlɔ akakoke nshila awui akina welamɛ “etsha wa demba,” ɛnyɛlɔ oko wanɛ wɔtɛkɛtami lo Kɔlɔsayi 3:5. Woho akɔ waamɛ mbele, l’ɔkɔngɔ wa nde nshila waonga divwa w’amɛna, nde akate ate: “Ndooko ɔlɛmbɛ walɔshana la akambo asɔ.” Ɔnkɔnɛ, Pɔɔlɔ koshila waonga tshɛ w’amɛna wakokaso monga lawɔ l’ekimanyielo ka nyuma k’ekila.
Sho shihodiaka dui sɔ etena kɛdikaso olowa wa nyuma la olowa w’osase wakafundɛ Pɔɔlɔ etshumanelo ka l’Ɛfɛsɔ ɔnɛ: “Olowa w’osase wekɔ la woho w’ɔlɔlɔ tshɛ ndo la losembwe ndo la mɛtɛ.” (Ɛf. 5:8, 9) Lo mɛtɛ “ɔlɔlɔ,” kaamɛ ndo losembwe la mɛtɛ, wekɔ l’atei wa “olowa w’osase,” koko vɔ wekɔ nto dionga dia lo “olowa wa nyuma.”
Woho akɔ waamɛ mbele, Pɔɔlɔ akalɔmbɛ Timɔte ɔnɛ “wesa losembwe, omamemelo le Nzambi, mbetawɔ, ngandji, ekikelo ndo memakana,” waonga asamalo w’amɛna. (1 Tim. 6:11) Asato l’atei wa waonga asɔ (mbetawɔ, ngandji, ndo memakana) mboshilami oko waonga wa “olowa wa nyuma.” Koko Timote aki nto l’ohomba w’ekimanyielo ka nyuma dia nkɛnɛmɔla waonga akina woshilami: losembwe, omamemelo le Nzambi, ndo ekikelo.—Ɛdika la Kɔlɔsayi 3:12; 2 Petero 1:5-7.
Koko, Ngalatiya 5:22, 23 hasha listɛ la waonga tshɛ wahomba Okristo monga lawɔ. Nyuma ka Nzambi koka tokimanyiya dia nkɛnɛmɔla waonga divwa woshilami oko “olowa wa nyuma.” Koko ekɔ waonga akina efula wakokaso nkɛnɛmɔla dia monga Akristo wambotshunda ndo “ndɔta lonto l’oyoyo lakatongama lo ndjela lolango la Nzambi lo losembwe ndo lo kɔlamelo ya mɛtɛ.”—Ɛf. 4:24.
