Mavhesi yaya ma gu yeyedza 9 makhalelo nya wuKristo: ‘Lihaladzo, gutsaka, gurula, gutimisela, gulaphisa-monyo, ndruda, wuwadi, gukhodwa, gudzirudzisa, gudziphara.’ Aya khandrayo basi makhalelo nya yadi aya liphuvbo la Nungungulu li hi phasago gu manega nawo.

Ha gu dziti kharini? Na si gu sasamedzi mihandro nya liphuvbo, Pawulo phede khu gu lova esi: “Mithumo ya tumbunugo nya wuthu . . . wubhayi, wuphuphulu, horo, gukhozela vanungungulu nya malipha, guphasela sithombe, sikwembu ni wutumbe, livengo, gudwanisana, wufu, likhulo, dzihanyi, guwandra, guwugelana khu mitsawa; lidiwo, wughevenga, wubewudzi, limidzo, wubhemba ni silo nya nga esi.” (Gal. 5:19-21) Pawulo hegiside khu malito yaya “ni silo nya nga esi.” Isoso so thula gu khiso Pawulo kha ganeya satshavbo si pategago avba nya “mithumo nya tumbunugo” nya nga eyi yi khumbugwago omu ga Vakolosi 3:5. Khu ndziya nyo fane, hwane nyo ba a sasamedzide 9 makhalelo nya yadi, a hegiside khu gu lova esi: “Mwalo nayo wu dzi kodzago gu wugela silo nya nga esi.” Isoso so thula khu khiso Pawulo kha sasamedza yatshavbo makhalelo nya yadi hi nga ma haguleyago khu gu phaswa khu liphuvbo nya guage.

Isoso ha gu si pwisisa tepo hi fananisago mihandro nya liphuvbo ni mihandro nya guwonegeye eyi Pawulo a lovedego libandla la Efeso: “Guwonegela khugo gu vangago mihandro nya wuwadi watshavbo, ni gululama, ni lisine.” (Efes. 5:8, 9) “Wuwadi” gumogo ni gululama ni lisine si ngu gira niso gipandre nya mihandro nya ‘guwonegeya,’ ganiolu si ngu gira gambe gipandre nya mihandro nya liphuvbo.

Khu ndziya nyo fane, Pawulo lombide Thimoti gu haguleya 6 makhalelo nya yadi gu gu “lisine, ni gululama, ni gukhodwa, ni lihaladzo, ni gutimisela ni gurula.” (1 Thim. 6:11) Miraru nya mihandro yoyo, (gukhodwa, lihaladzo ni gudzirudzisa) yi ngu gira gipandre nya mihandro nya liphuvbo. Ganiolu, Thimoti a di yede gambe gu haguleya gululama, githawo khu Nungungulu ni gutimiseya nigu a di gu dziti gu khuye gasi gu manega ni makhalelo yoyo a di yede gu phaswa khu liphuvbo nya guage. — Fananisa ni Vakolosi 3:12; 2 Pedro 1:5-7.

Khu kharato, Vagalatiya 5:22, 23 kha sasamedza yatshavbo makhalelo nya wuKristo hi yedego gu ma haguleya. Liphuvbo la Nungungulu li nga hi phasa gu haguleya makhalelo nya yadi ma sasamedzidwego kha nga mihandro nya liphuvbo la Nungungulu. Ganiolu, gu na ni mambe makhalelo nya yadi hi yedego gu ma haguleya tepo hi yago hi dandra khu liphuvboni hi bwe hi ‘ambala mavbanyelo nya muthu muphya a giridwego a fanana ni Nungungulu khu gululama ni ndruda lisineni.’ — Efes. 4:24.