Eka tindzimana teto ku xaxametiwe timfanelo ta kaye ta Vukreste: “Mihandzu ya moya i rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” Kambe a hi fanelanga hi ehleketa leswaku timfanelo leti hi tona ntsena leti moya wa Xikwembu wu nga hi pfunaka hi va na tona.

Xiya leswi muapostola Pawulo a swi tsaleke eka tindzimana leti nga ehenhla: “Mintirho ya nyama . . . i vumbhisa, thyaka, ku tikhoma ko biha, ku gandzela swifaniso swa hava, xiendlo xa vungoma, vulala, dzolonga, mavondzo, swifafa, ku kanetana, ku avana, mimpambukwa, mona, minkarhi ya ku dakwa, minkhuvo ya huwa, ni swilo swo fana ni sweswo.” (Gal. 5:19-21) Pawulo a ta va a boxe ni swilo swin’wana tanihi “mitirho ya nyama,” swo tanihi leswi tsariweke eka Vakolosa 3:5. Hilaha ku fanaka, endzhaku ko xaxameta timfanelo ta kaye, u te: “A wu kona nawu lowu solaka swilo sweswo.” Hikwalaho, Pawulo a nga tsalanga timfanelo hinkwato leti moya wo kwetsima wu nga hi pfunaka hi va na tona.

Leswi hi swi vona kahle loko hi pimanisa timfanelo leti ni leswi Pawulo a swi tsaleleke vandlha ra le Efesa, u te: “Mihandzu ya ku vonakala yi katsa muxaka wun’wana ni wun’wana wa vunene ni ku lulama ni ntiyiso.” (Efe. 5:8, 9) “Vunene,” ku lulama ni ntiyiso, i xiphemu xa “mihandzu ya ku vonakala” kambe yi tlhela yi va xiphemu xa “mihandzu ya moya.”

Pawulo u hlohlotele Timotiya leswaku a hlakulela timfanelo ta tsevu, ku nga ku “lavisisa ku lulama, ku tinyiketela loku nga ni vukwembu, ripfumelo, rirhandzu, ku tiyisela [ni] moya wo rhula.” (1 Tim. 6:11) Eka timfanelo leti, ko va tinharhu ntsena leti boxiweke tanihi xiphemu xa “mihandzu ya moya,” i (ripfumelo, rirhandzu, ni ku va ni moya wo rhula.) Kambe Timotiya a ta lava ku pfuniwa hi moya leswaku a kota ku hlakulela timfanelo tin’wana leti boxiweke: vululami, ku tinyiketela loku nga ni vukwembu ni ku tiyisela.—Ringanisa na Vakolosa 3:12; 2 Petro 1:5-7.

Xisweswo, Vagalatiya 5:22, 23, a yi boxanga timfanelo hinkwato ta Vukreste. Moya wa Xikwembu wu ta hi pfuna hi hlakulela ku va ni timfanelo ta kaye leti xaxametiweke tanihi “mihandzu ya moya.” Kambe ku ni timfanelo to tala leti hi faneleke hi ti hlakulela tanihi Vakreste hi tlhela hi “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.”—Efe. 4:24.