Vhagalata 5:22, 23 i amba nga ha zwithu zwa ṱahe zwi aṋwiwaho nga muya mukhethwa. Zwenezwi zwithu ndi “lufuno, dakalo, mulalo, u sa fhela mbilu, vhuthu, vhuḓi, lutendo, u vuḓa na u ḓifara.” Fhedzi hezwi a si zwone zwi zwoṱhe zwine muya mukhethwa wa ri thusa u vha nazwo.

Ri zwi ḓivha hani? Muapostola Paulo o amba maipfi a tevhelaho musi a sa athu u amba zwi aṋwiwaho nga muya mukhethwa, o ri: “Mishumo ya ṋama . . . ndi u ḓifara luvhi nga zwa vhudzekani, vhuyaḓa, u ita tshivhi u sa shoni, u rabela midzimu ya zwifanyiso, vhungome, vhuswina, dzinndwa, vivho, u sinyuwa, u vhangisana, dziphambano, u vhumba zwigwada, vhutshivha, vhudakwa, zwimima zwi sa langei, na zwithu zwi fanaho na zwenezwi.” (Vhagal. 5:19-21) Paulo o fhedzisela nga u amba maipfi ane a ri “na zwithu zwi fanaho na zwenezwi.” Hezwi zwi amba uri hu na miṅwe mishumo ya ṋama ye Paulo a si i ambe, u fana na ine ya vha kha Vhakolosa 3:5. O ita zwi fanaho musi a tshi amba nga ha zwithu zwa 9 zwi aṋwiwaho nga muya mukhethwa. Kha ndimana ya 23 o ri: “Mulayo a u lwi na zwithu zwo raloho.” Hezwi zwi amba uri Paulo ho ngo amba zwoṱhe zwine muya mukhethwa wa nga ri thusa u vha nazwo.

Zwenezwi ri zwi pfesesa zwavhuḓi musi ri tshi vhambedza zwi aṋwiwaho nga muya mukhethwa na zwe Paulo a zwi amba nga ha u “tshila tshedzani” musi a tshi ṅwalela tshivhidzo tsha Vhaefesa vhurifhi. O ri: “U tshila tshedzani zwi ri thusa uri ri vhe na vhuḓi kha zwithu zwoṱhe, u ita zwo lugaho na u tshila ri tshi tevhedza ngoho.” (Vhaef. 5:8, 9) “U tshila tshedzani zwi ri thusa uri ri vhe na vhuḓi,” ri ite zwo lugaho na u tshila ri tshi tevhedza ngoho nahone zwenezwo ndi zwiṅwe zwa “zwi aṋwiwaho nga muya mukhethwa.”

Paulo o ṱuṱuwedza Timotheo uri a ite zwoṱhe zwine a nga kona u itela u sumbedza zwithu zwa rathi zwine zwa vha “u luga, u ḓikumedzela kha Mudzimu, lutendo, lufuno, u konḓelela na u vuḓa”. (1 Tim. 6:11) Kha holu luṅwalo, ndi zwiraru fhedzi (lutendo, lufuno na u vuḓa) zwine zwa fana na zwi “aṋwiwaho nga muya mukhethwa” zwi re kha Vhagalata 5:22, 23. Naho u luga, u ḓikumedzela kha Mudzimu na u konḓelela zwi songo ambiwa kha Vhagalata 5:22, 23, zwi tou pfala uri Timotheo o vha a tshi ḓo ṱoḓa muya mukhethwa u itela u mu thusa u zwi sumbedza.—Vhambedzani Vhakolosa 3:12; 2 Petro 1:5-7.

Nga zwenezwo, hu na zwiṅwe zwi aṋwiwaho nga muya zwi songo ṅwaliwaho kha Vhagalata 5:22, 23. Muya mukhethwa u nga ri thusa u ṱahulela zwithu zwa ṱahe zwi “aṋwiwaho nga muya mukhethwa.” Fhedzi u dovha wa ri thusa u ṱahulela zwiṅwe zwine zwa ri thusa u vha Vhakriste vho vhibvaho na uri ri “ambare vhumuthu vhuswa he Mudzimu a vhu ita u tendelana na zwine a zwi funa, nga u luga na u fhulufhedzea.”—Vhaef. 4:24.