Iversiikulu iya sinilavula mikhalelo 9 muKristau onireerela awe okhalana: Ikuru sa Muluku sinniphwanyiha “ophenta, otteliwa murima, murettele, ovilela” oreera murima, oloka, waamini, omaala ni wiihiiha. Masi, nihaana osyaka wuupuwela wira mikhalelo ninkhaliheriwa ahu okhalana ni ikuru sowaarya sa Muluku ti seiyo paahi.

Ninsuwela sai? Ohinatthi olepa mikhalelo sinikumiheriwa ni ikuru sa Muluku, Paulo alempe so: “Ale anettihiwa ni makhalelo aya òtakhala . . . anniraruwa, annira itthu sohirya ni sowùliha muru, annikokhorela itthu sihikhanle Muluku, anniwìnela okhwiri akhw’aya, anninyokhana, anninyakulihana, anninlelana ehaje, anniviruwelana, anniphavela orumeliwa pahi, annikawanyeya ehìwananaka, anniramelana, annihapaliwa, annipaka mithukumano sotakhala, annìra-tho itthu sikina sotakhala”. (aGal. 5:19-21) Paulo aamalinhe ohimyaka wira “annìra-tho itthu sikina sotakhala”, eyo enooniherya wira sookhala itthu sikina ohilavunle awe ntoko iye siri aKolosi 3:5. Nave nuumala olavula mikhalelo 9 sooloka sinikumiheriwa ni ikuru sa Muluku owo aamalinhe ohimyaka wira: “Khivo ekano envirikanya makhalelo ala òrera”. Ela enooniherya wira Paulo khaahimmye mikhalelo sotheene ninkhaliheriwa ahu ni ikuru sa Muluku wira nikhalane.

Akhala wira nnimwiiwexexa eyo, enoonikhaliherya osuwela mikhalelo sinikumiheriwa ni waarya Paulo aalepenle awe muloko wa wÉfeso: “Warya onniruha orera murima n’ixariya n’ikekhai”. (aÉf. 5: 8, 9) Tthiri, “orera murima”, exariya ni ekeekhai, eniirela-tho mpantta mikhalelo sinikumiheriwa ni ikuru sowaarya sa Muluku.

Nave murummwa Paulo, aahimutumererya Timootheyo ophavela “exariya, omuttittimiha Muluku, wamini, ophenta, nthiti n’omàla murima”. (1 Tim. 6:11) Eriyari ya mikhalelo Paulo aamutumerenrye awe Timootheyo, owo aahilavula mikhalelo miraru (waamini, ophenta ni omaala) seiyo sinikumiheriwa ni ikuru sowaarya sa Muluku. Tthiri Timootheyo aaniphavela okhaliheriwa ni ikuru sa Muluku wira okhalane mikhalelo sikina ntoko exariya, omuttittimiha Muluku ni ovilela.—Mulikanyihe ni aKolosi 3:12; 2 Pedru 1:5-7.

Moohaanyiherya, aGalasia 5:22, 23 khonihimya mikhalelo sotheene maKristau anireerela aya okhalana. Ekeekhai wira ikuru sowaarya sa Muluku pooti onikhaliherya okhalana mikhalelo 9 sinikumiheriwa ni ikuru sa Muluku. Masi sookhala mikhalelo sikina ninreerela ahu okhalana wira nikhale maKristau oolipa. Maana Biibiliya onihimya wira ‘munware mutthu musyá, opattuxiwe alikanyihiwaka ni Muluku, okhalihiwe naxariya, orerihiwe murima n’ikekhai’.—aÉf. 4:24.