Ito nga mga bersikulo nag-uunabi hin siyam nga kalidad: “An bunga han espiritu amo an gugma, kalipay, kamurayawan, pagin pasensyoso, pagkabuotan, pagkamaopay, pagtoo, pagkamalumo, pagpugong ha kalugaringon.” Pero diri naton angay hunahunaon nga ito la nga mag-opay nga kalidad an aton makukultibar ha bulig han espiritu han Dios.

Tagda an iginsurat ni apostol Pablo ha nauna nga mga bersikulo: “An mga buhat han unod . . . amo . . . an seksuwal nga imoralidad, pagkamahugaw, mapasiparahon nga panggawi, idolatriya, espiritismo, pagkontrahay, araway, pangabugho, mga kasina, mga diri pagsinabtanay, mga pagkabahin-bahin, pagporma hin mga sekta, kaawa, paghubog, karisyohan nga waray kontrol, ngan mga buhat nga sugad hini.” (Gal. 5:19-21) Salit mahimo pa mag-unabi hi Pablo hin iba nga butang sugad nga “mga buhat han unod” pariho han mga nakalista ha Colosas 3:5. Sugad man, katapos unabihon an siyam nga maopay nga kalidad, hiya nagsiring: “Waray balaud nga nakontra ha pagbuhat hini, [o, han sugad hini].” Salit waray unabiha ni Pablo an tanan nga maopay nga kalidad nga makukultibar naton ha bulig han baraan nga espiritu.

Klaro nga makikita ini kon ikukompara naton an bunga han espiritu ha bunga han kalamrag nga ginsurat ni Pablo para ha kongregasyon ha Efeso: “An bunga han kalamrag ginkukompwesto han ngatanan nga klase han pagkamaopay ngan pagkamatadong ngan kamatuoran.” (Efe. 5:8, 9) Oo, an “pagkamaopay,” kaupod an pagkamatadong ngan kamatuoran, bahin han “bunga han kalamrag,” pero bahin liwat ito han “bunga han espiritu.”

Sugad man, gin-aghat ni Pablo hi Timoteo nga ‘mangalimbasog pirme nga ipakita an katadongan, debosyon ha Dios, pagtoo, gugma, pagpailob, ngan pagkamalumo’​—unom nga maopay nga kalidad. (1 Tim. 6:11) Tulo la hito (pagtoo, gugma, ngan pagkamalumo) an gin-uunabi sugad nga bahin han “bunga han espiritu.” Pero maruruyag gud liwat hi Timoteo nga mangaro han bulig han espiritu basi makultibar an iba pa nga kalidad nga gin-uunabi: katadongan, debosyon ha Dios, ngan pagpailob.​—Ikompara an Colosas 3:12; 2 Pedro 1:5-7.

Salit, an Galacia 5:22, 23 diri nag-uunabi han tanan nga maopay nga kalidad nga angay naton kultibaron. An espiritu han Dios makakabulig ha aton nga makultibar an siyam nga bahin nga gin-uunabi sugad nga “bunga han espiritu.” Pero may mga kalidad pa nga kinahanglan ta kultibaron basi magin hamtong kita nga Kristiano ngan ‘maisul-ot an bag-o nga personalidad nga ginlarang uyon ha kaburut-on han Dios, nga iginbasar ha tinuod nga pagkamatadong ngan pagkamaunungon.’​—Efe. 4:24.