Koran̈iny Galatianina 5:22, 23 fa “vokatrany fan̈ahy zen̈y fitiavan̈a, haravoan̈a, fiadanan̈a, maharidraha, tsara fan̈ahy, man̈ano ny tsara, finoan̈a, malemy toetry, mahafehy ten̈a.” Kanefa tsy toetry sivy aby io fo toetry mety hanan̈antsika izikoa atsika ampiany fan̈ahy masin̈iny Zan̈ahary.

Talohany apostoly Paoly nanon̈ono vokatrany fan̈ahy aby io, ty raha nisoratiny: ‘Asany nofotro zen̈y fijangajangan̈a, fahalotoan̈a, fitondranten̈a mahamen̈atra, fanompoan̈a sampy, fisoman̈a aody, fitiavan̈a ady, ankany, be fô olo, heloko dila loatra, gidragidra lava, fisarasarahan̈a, sekty, fan̈irian̈a dila loatra, figiahantoaka dila loatra, fety tsy avoa fehy, ndreky raha miramira amy zen̈y.’ (Gal. 5:19-21) Matoa izy iô mivolan̈a “raha miramira amy zen̈y”, dikanizen̈y, tsy iro io fo tafiditry aminy “asany nofotro” niton̈oniny Paoly, fa misy toetry ratsy hafa koa, karaha toetry aby amy Kolosianina 3:5 ao. Karaha zen̈y koa nataony izikoa fa baka nanon̈ono toetry sivy an̈isany vokatrany fan̈ahy aby io. Izy nivolan̈a: “Tsisy lalàn̈a manohitry raha aby karaha io.” Misy fomba hafa koa mety nandikan̈a “raha aby karaha io” amy volan̈a griky. Izio mety adika “toetry karaha iro io.” Hita baka amy zen̈y fa sasany amy vokatrany fan̈ahy fo izy niton̈oniny Paoly iô io fa tsy jiaby.

Marin̈y tsara hevitry zen̈y izikoa listy io ampitovisintsika amy raha nisoratiny Paoly tamy fiangonan̈a ta Efesosy. Ho izy: “Vokatrany hazavan̈a zen̈y hatsarantoetry amy karazany jiaby, ndreky fahitsian̈a avio fahamarin̈ana.” (Efes. 5:8, 9) Koran̈iny iô fa samby “vokatrany hazavan̈a” na “hatsarantoetry” zen̈y na fahitsisan̈a na koa fahamarin̈ana. Dikanizen̈y, “hatsarantoetry” io tsy basiny vokatrany hazavan̈a fo fa, izio koa an̈isany “vokatrany fan̈ahy.”

Misy raha hafa koa ty. Apostoly Paoly nampirisiky Timoty ‘hitady fahamarin̈ana, fahafoezanten̈a amy Zan̈ahary, finoan̈a, fitiavan̈a, fiaretan̈a ndreky fahalimiantoetry.’ (1 Tim. 6:11) Izikoa dinihin̈y toetry tsiota voakoran̈a iô io, telo amizio fo “vokatrany fan̈ahy.” Tsy ino zen̈y fa finoan̈a, fitiavan̈a, baka io fahalimiantoetry. Ndray izy man̈ano zen̈y, nila fan̈ampiany fan̈ahy masin̈y fo koa Timoty baka hanan̈a toetry hafa aby ty: Fahamarin̈ana, fahafoezanten̈a amy Zan̈ahary, baka io fiaretan̈a.—Ampiràn̈a amy Kolosianina 3:12; 2 Petera 1:5-7.

Dikanizen̈y, tsy iro toetry sivy koran̈iny Galatianina 5:22, 23 aby io fo “vokatrany fan̈ahy” fa mbala misy toetry tsara maro hafa. Tokony hifen̈y fo atsika hanan̈a toetry hafa aby zen̈y izikoa tihanjary Kristianin̈y matotro. Ho vitantsika han̈ano zen̈y izikoa atsika ampiany fan̈ahy masin̈y ndreky “misikiny toetry vaovao niforon̈iny mifan̈araka amy sitrapony Zan̈ahary, amy fahitsian̈a ndreky tsy fivadihan̈a.”—Efes. 4:24.