Pa lilembali pakusasala ndamo syakwana 9 sya ukusakoposya msimu weswela. Ndamo syakwe sili: “chinonyelo, chisangalalo, mtendele, kulitimalika, chanasa, umbone mtima, chikulupi, kufasa soni kuligosa.” Tukagambaga ganisya kuti msimu wa Mlungu ukusamkamuchisya mundu kola ndamo syelesi basi.

Alole yaŵasasile ndumetume Paulo mkanasale ya ndamo sya ukusakoposya msimu weswela. Jwalakwe jwatite, “Yitendo ya ndamo syakunonyela yakusakala . . . yili ayi; chikululu, ganisya yakusakala ni kutenda yakutesya sooni, kujipopelela milungu jakupanganyidwa, usaŵi, uŵengani, ukangani, wiwu, kupya mtima, kulinonyela, kungapikangana ni kugaŵikana m’makuga pasikati pawo, litima, kukolelwa ni yine yejinji.” (Aga. 5:19-21) Pa lilembali Paulo jwamalisisye ni maloŵe gakuti “ni yine yejinji,” yayikulosya kuti jwalakwe nganasala ndamo syosope syasili “yitendo ya ndamo syakunonyela yakusakala” syakusasikolanga pa Akolose 3:5. Mwakulandana ni yeleyi, paŵamasile kusala ya ndamo syambone, jwalakwe jwatite, “Pangali lilamusi lyakulekasya yeleyi.” Pelepa Paulo nganasala ndamo syambone syosope 9 syampaka mundu akole ni chikamuchisyo cha msimu weswela.

Mpaka tuyipikanichisye yeleyi patukulandanya “ndamo sya ukusakoposya msimu weswela” ni “ndamo sya lilanguka” syaŵasasile Paulo mu chikalata chakwawula ku Efeso. Jwalakwe jwatite, “Pajatu ndamo sya lilanguka sili umbone mtima, chilungamo ni usyesyene.” (Aef. 5:8, 9, NWT) Usyesyene nambosoni chilungamo, yilisoni “ndamo sya lilanguka,” nambope ndamoji jilisoni jimo mwa “ndamo sya ukusakoposya msimu weswela.”

Mwakulandana ni yeleyi, Paulo ŵamlimbikasisye Timoteyo kuti akusosekwa ‘kola mtima wakukuya chilungamo, kumchimbichisya Mlungu, kulupichika, chinonyelo, kupilila, soni kufasa.” Syosopesi sili ndamo syambone. (1 Tim. 6:11) Ndamo sitatupe (chikulupi, chinonyelo, kufasa) pa ndamo syosopesi, sikusakolanjidwa kuti sili “ndamo sya ukusakoposya msimu weswela.” Kuti Timoteyo akole ndamo mpela chilungamo, kumchimbichisya Mlungu soni kupilila, jwasosekwaga chikamuchisyo cha msimu weswela.—Aŵanichisye ni Akolose 3:12; 2 Petulo 1:5-7.

Pelepatu ngayikugopolela kuti pa Agalatiya 5:22, 23, pakusala ya ndamo syosope syakusosekwa kola Aklistu. Msimu weswela wa Mlungu mpaka utukamuchisye kuti tukole ndamo syosope 9 sya “ukusakoposya msimu weswela.” Nambope pana ndamo syejinji syambone syatukusosekwa kola kuti tuŵe Aklistu ŵakomangale soni kuti ‘tuwale umundu wasambano wawupanganyisye Mlungu mwakulandana najo pelepo tuchiŵa ŵakulungamika ni ŵaswela mtima kusyesyene.’—Aef. 4:24.