Gal verse ney e be weliy murung’agen mereb e fel’ngin ni ma m’ug rok e piin Kristiano. Be gaar: “Wom’engin gelngin Got nib thothup e aram e t’ufeg, nge felfelan’, nge gapas, nge gum’an’, nge gol, nge fel’ ngak e girdi’, nge michan’, nge sumunguy, nge t’ar laniyan’.” Machane, gathi kemus e pi fel’ngin nrayog ni nge ayuwegdad gelngin Got nib thothup ni nge yag ngodad.

Uw rogon ni kad nanged e re n’ey? U m’on ni nge weliy apostal Paul murung’agen wom’engin gelngin Got nib thothup me yoloy ni gaar: “Tin nib kireb ni yima ar’arnag e . . . ngongol ni darngal, nge ngongol ni golong, nge ngongol ni puwlag; nge ta’fan nge meybil ngak e liyos ni ma meybil boch e girdi’ ngay, nge pig; nge tathil ni be tay e girdi’, nge cham ni yad be tay, nge awan’, nge damumuw, nge athamgiliy ban’en ni fan e gur faanem e nga nog e sorok ngom. Ma yad be wer ngar yuraba’gad ara ra yuulunggad; ma yad ba chogow, ma yad be balyang ko rrum, ma yad be ngongliy e mur ni yibe wagagey u fithik’, ma yad be rin’ boch ban’en ni bod e tiney.” (Gal. 5:19-21) Ere ku rayog ni nge weliy Paul murung’agen yugu boch e ngongol nib muun ko “tin nib kireb ni yima ar’arnag” ni bod fapi ngongol ni kan weliy murung’agen ko Kolose 3:5. Ku aray rogon e n’en ni rin’ u nap’an ni yoloy nga but’ fa mereb i fel’ngin. I yog ko verse 23 ni gaar: “Dariy ba motochiyel nib togopuluw ko pi n’ey.” Ere de yog Paul urngin e pi fel’ngin nib manigil nrayog ni nge ayuwegdad gelngin Got nib thothup ni nge yag ngodad.

Rayog ni nge tamilang e re n’ey u wan’dad ni faan gad ra taarebrogonnag e pi fel’ngin ney ko n’en ni yoloy Paul murung’agen nge pi’ ko fare ulung u Efesus ni gaar: “Tamilang e boor wom’engin urngin mit e fel’, nge mat’aw, nge tin riyul’ ni ma pi’.” (Efe. 5:8, 9) Arrogon, “fel’” ngak e girdi’, nge tin nib mat’aw, nge tin riyul’ e aram bang u “wom’engin” e tamilang, nge “gelngin Got nib thothup.”

Ku rayog ni nge tamilang e re n’ey u wan’dad ni faan gad ra taarebrogonnag fapi wom’engin gelngin Got nib thothup ko fare nel’ i fel’ngin ni yog Paul ngak Timothy ni nge maruweliy. Pi fel’ngin nem ni nge maruweliy e aram e ‘tin nib mat’aw, nge tin nib fel’ u p’eowchen Got, me par nib mich Got u wan’, mab t’uf Got rok nge girdi’, mi i par nib k’adan’, mab sumunguy.’ (1 Tim. 6:11) Kemus ni dalip ko pi fel’ngin nem ni yog Paul ngak Timothy ni nge maruweliy ni aram e michan’, nge t’ufeg, nge sumunguy e bang u “wom’engin gelngin Got nib thothup.” Machane kub t’uf gelngin Got nib thothup rok Timothy ni faanra nge maruweliy e tin nib mat’aw ban’en, nge tin nib fel’ u p’eowchen Got, nge k’adan’.​—Mu taarebrogonnag ko Kolose 3:12; 2 Peter 1:5-7.

Ere der weliy e Galatia 5:22, 23 murung’agen gubin e fel’ngin nsusun e nge maruweliy e piin Kristiano. Gelngin Got nib thothup e rayog ni nge ayuwegdad ni nge yag e re mereb i fel’ngin ney ngodad ni aram bang u “wom’engin gelngin Got nib thothup.” Machane ku bay boch e fel’ngin ni kub t’uf ni nge maruweliy e piin Kristiano ya nge yag nra mon’oggad ko tirok Got ban’en, mi yad yon’ nga dakenrad e ‘bin nib beech i yad ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yog ngorad.’​—Efe. 4:24.