1. Филиппыдагыларга 2:3-ле болзо, јобош болгоныс биске улусла јакшы колбуларлу болорго канайып болужат?

БИС јобош болуп Иегованыҥ нормаларыла јӱредис, нениҥ учун дезе ол биске не тузалу болорын билер деп оҥдоп јадыс (Еф. 4:22—24). Бис јобош болзоос, Иегованыҥ кӱӱн-табын баштапкы јерге тургузарыс ла бойысты улустаҥ артык деп сананбазыс. Мынаҥ улам Иеговала да, ака-эјелерисле де јакшы колбуларлу болодыс. (Филиппыдагыларга 2:3 кычырыгар.)

2. Апостол Павел нени оҥдогон? Бис бу јӧрмӧлдӧ нени шӱӱжерис?

² Ајарыҥкай болбозоос, бу телекейдиҥ улузы чылап бийиркенип, јаҥыс бойысты сананып баштаардаҥ айабазыс *. Шак ла мындый неме баштапкы чактыҥ кезик христиандарыла болгон. Оныҥ учун апостол Павел Римдегилерге бичиген самаразында мынайып айткан: «Кажыгарга ла айдып турум: бойыгар кандый болгоныгардаҥ бийик сананбагар. Карын, кажыгарга ла Кудайдаҥ бӱдери канча кире берилгениле кеминде сананыгар» (Рим. 12:3). Павелдиҥ сӧстӧриле болзо, биске бойыс керегинде сананар керек. Је бийиркене бербеске, биске јобош болор керек. Бу јӧрмӧлдӧ кандый ӱч учуралда јобош болор керек деп сурак кӧрӱлер: 1) биледе, 2) Иегованыҥ организациязында каруулу  молјулар бӱдӱреринде ле 3) социальный сетьтерди тузаланарында.

3. Нениҥ учун кезикте эш-нӧкӧрлӧр бой-бойын оҥдошпой јат? Оҥдошпостордоҥ улам олордыҥ кезиги кандый санаага келгилейт?

³ Иегова эш-нӧкӧрлӧрди ырысту јӱрзин деп кӱӱнзейт. Је ончо улус толо кемдӱ эмес, оныҥ учун биледе оҥдошпостор тӱҥей ле болор. Павел биле тӧзӧгӧн улуста јаҥы уур-кӱчтер болор деп бичиген (1 Кор. 7:28). Кезик эш-нӧкӧрлӧр јаантайын ачыныжып јат, оныҥ учун јаражып болбойтон эмтирис деп санангылайт. Андый эш-нӧкӧрлӧр бу телекейдиҥ кӧрӱмиле башкарынза, кажызы ла бойына јакшы болзын деп сананып, капшай ла айрылыжып калар эди.

4. Эш-нӧкӧрлӧрдӧ кандый санаалар болбос керек?

⁴ Эш-нӧкӧрӧӧрлӧ оноҥ ары јадып болбозоор деп, качан да сананбагар. Кудайдыҥ кӧрӱмиле болзо, эш-нӧкӧрлӧр јӱк ле бир шылтактаҥ улам айрылыжар аргалу — олордыҥ бир-бирӱзи ӧскӧ кижиле конгон болзо (Матф. 5:32). Оныҥ учун слерде Павел бичиген кӱчтер боло берзе, бийиркенип мындый санааларга алдыртпагар. Темдектезе: «Мындый эш-нӧкӧр меге керек пе? Мен не мынайып шыралап јӱретем? Айса болзо, ӧскӧ кижиле ырысту јӱрер болорым ба?» Мындый санааларлу кижи јӱк бойын сананат. Мындый учуралда бу телекейдиҥ улузы бойыҥныҥ јӱрегиҥди ук деп айдат. Эмезе ырысту јӱрерге айрылып та калза кем јок деп айдат. Је Иегова: «Кажыгар ла бойындыйын эмес, је кажыгар ла ӧскӧ дӧ улустыйын сананзын» — деп, јӧп берет (Флп. 2:4). Кудай билени чачылбазын деп кӱӱнзеп јат (Матф. 19:6). Кудайдыҥ јакарганыла эш-нӧкӧрлӧргӧ бойыныҥ кӱӱниле эмес, је Агару Бичиктиҥ принциптериле башкарынар керек.

5. Ефестегилерге 5:33-ле болзо, эш-нӧкӧрлӧр бой-бойына канайып баштанар учурлу?

 ⁵ Эш-нӧкӧрлӧр бой-бойын сӱӱп, тооп турар учурлу. (Ефестегилерге 5:33 кычырыгар.) Агару Бичик бисти мынайып ӱредет: «Алып турганы эмес, берип турганы оноҥ артык кежиктӱ» (Ап. ижи 20:35). Је олорго бой-бойын сӱӱп, тооп турарга не болужар? Јобош болоры болужар. Јобош эш-нӧкӧрлӧр библиялык мындый јӧплӧ јӱргилейт: «Кем де бойына туза бедиребезин, је ӧскӧ кижиге бедирезин» (1 Кор. 10:24).

6. Слер Стивен ле Стефаниныҥ сӧстӧринеҥ неге ӱренедигер?

⁶ Јобош болорго албаданган кӧп христиан билелер ырысту болуп калган. Стивен деп ака мынайып куучындайт: «Слер бир команда болзоор, кӱчтер де болзо, ӱзе немени кожо эдереер. Слер: „Меге јакшы болзын“ — деп сананбай, карын: „Биске јакшы болзын“ — деп сананараар». Бу аканыҥ Стефани деп ӱйи база анайып ла сананат. Ол мынайып айдат: «Сенле качан да јӧпсинбей турган кижиле јадарга, кем де кӱӱнзебей турган эмей. А оҥдошпостор боло берзе, бис оныҥ шылтагын оҥдоп аларга албаданадыс. Оныҥ кийнинде мӱргӱп јадыс, керектӱ суракты шиҥдеп јадыс ла бу сурактыҥ аайына канайып чыгарын шӱӱжип јадыс. Бис бой-бойысла эмес, је оҥдошпосторло тартыжадыс». Айдарда, јаҥыс бойын сананбай турган эш-нӧкӧрлӧр чыннаҥ ла ырысту болот.

7. Каруулу молјулар алган ака бойына кандый кӧрӱмду болор учурлу?

⁷ Бис Иеговага иштеер аргалардыҥ кажызын ла јаан кӱӱндӱ деп кӧрӧдис (Сар. 27:4; 84:10). Иегованыҥ организациязында каруулу молјулар бӱдӱрерге белен акаларды, мактап јадыс! «Епископтыҥ ижине јӱткиген кижи јакшы иш кӱӱнзеп јат» — деп, Агару Бичикте айдылат (1 Тим. 3:1). Је качан акага јакылта берилзе, ол бийиркенбес учурлу (Лука 17:7—10). Оныҥ амадузы — јобош болуп улуска болужары болор керек (2 Кор. 12:15).

8. Бис Диотрефтиҥ, Озияныҥ ла Авессаломныҥ темдеринеҥ неге ӱренедис?

⁸ Агару Бичикте бойын улустаҥ бийик деп сананган улустыҥ темдери бар. Темдектезе, Диотреф бийиркенип, јуунда баштапкы болорго сӱӱйтен (3 Иоанн 9). А Озия дезе билееркеп, абыстардыҥ ижине киришкен (2 Лет. 26:16—21). Авессалом каан болорго, албатыга јараарга сӱмеленген (2 Сам. 15:2—6). Бу темдердеҥ, Иеговага бойына мак бедиреп турган улус јарабай јат деп, јарт кӧрӱнип јат (Укаа 25:27). Бийиркениш ле улуркаш учы-учында јаман немеге экелет (Укаа 16:18).

9. Иисус биске кандый тем кӧргӱскен?

⁹ Эмди, бу бийиркек улустаҥ чек башка болгон Иисустыҥ темин кӧрӱп ийектер. «Ол — кӧрӱнбес Кудайдыҥ сӱр-кебери» де болзо, «Ада Менеҥ јаан ине» — деп айткан (Кол. 1:15; Иоанн 14:28). Иегованыҥ јайаандарын алза, Иисус эҥ ле улу јайаан. Је ол качан да бойын бийик деп сананбай јат. Ол бойыныҥ ӱренчиктерине мынайып айткан: «Ортогордо эҥ кичӱгер, улу болор» (Лука 9:48). Бис Иисус ла чылап јобош болорго албаданып турган пионерлерле, болушчы ишчилерле, аксагалдарла, аймак кӧрӧӧчилерле кожо иштенерге, сӱӱнип јадыбыс! Иегованыҥ јобош ишчилери јуундагы ака-эјелерди бой-бойына сӱӱштӱ баштанарына кӱӱнзедет. А сӱӱш, Иисустыҥ сӧстӧриле болзо, чындык христиандардыҥ аҥылу кылык-јаҥы (Иоанн 13:35).

10. Аксагалдар јуунныҥ кӱчтериниҥ аайына јазап чыкпай турган деп билдирип турза, нени эдер керек?

 ¹⁰ Аксагалдар јуунныҥ кӱчтериниҥ аайына јазап чыкпай турган деп билдирип турза, слер нени эдеригер? Мындый учуралда комыдаардыҥ ордына, јобош болуп акаларга багынар керек (Евр. 13:17). Багынарга слерге не болужар? Бойыгардаҥ сурагар: «Бу чыннаҥ ла јаан сурак па? Оныҥ аайына эмди ле чыгар керек пе? Мениҥ кирижер јаҥым бар ба? Мен јуунныҥ бирлиги керегинде сананадым ба эмезе бойымга ајару эдерге тургам ба?»

11. Ефестегилерге 4:2, 3-ле болзо, Иеговага јобош иштенип турганыс јуунга кандый туза экелер?

¹¹ Иегова бистиҥ немени эпчил ле тӱрген эткенисти эмес, је јобош ло бирлик болгонысты баалайт. Оныҥ учун Иеговага јобош иштенерге албаданыгар. Анайып јуунда бирлик болор. (Ефестегилерге 4:2, 3 кычырыгар.) Јарлаар ишке эрчимдӱ туружыгар. Улуска јакшыны эдерге албаданыгар. Айылыгарга ака-эјелерди, ол тоодо јуунда кандый да молјулар јок јарчыларды кычырып, кӱндӱлеп туругар (Матф. 6:1—4; Лука 14:12—14). Слер ака-эјелерле бийиркенбей иштенерге албаданып турзагар, олор слердиҥ јаҥыс ла эпчил болгоноорды эмес, је јобош то болгоноорды кӧрӱп ийер.

12. Агару Бичик најылажары керегинде нени айдат?

¹² Иегова бисти билегисле, најыларысла куучындажып, сӱӱнчи алзын деп кӱӱнзеп јат (Сар. 133:1). Иисус јерде јӱрерде, ондо јакшы најылар болгон (Иоанн 15:15). Агару Бичикте чын најыларлу болгоны јаан туза экелет деп айдылат (Укаа 17:17; 18:24). Анайда ок улустаҥ башкаланбас керек деп  айдылат (Укаа 18:1). Кӧп улустыҥ санаазыла болзо, социальный сетьтер кӧп најыларлу болорго ло јаҥысканзырабаска болужат. Је социальный сетьтерле тузаланарында ајарыҥкай болор керек.

13. Нениҥ учун социальный сетьтерле тузаланып турган кезик улус јаҥысканзырап, кунугып јат?

¹³ Кезик шиҥжӱлерле болзо, соцсетьтерде кӧп отурып турган улус јаҥысканзырап, кунугып јат. Нениҥ учун? Нениҥ учун дезе социальный сетьтерге улус кӧп сабада јӱрӱминиҥ эҥ ле јилбилӱ учуралдарын чыгарадылар. Олор бойыныҥ, најыларыныҥ эмезе јорыктаган јерлериниҥ эҥ јакшы фотолорын талдап јат. Бу фотолорды кӧргӧн кижи бойыныҥ јӱрӱмин кара-боро деп сананар болор. 19 јашту бир сыйын мынайып куучындайт: «Кезик ака-эјелердиҥ амыраар кӱндерде сӱрекей јакшы амыраганын кӧрӱп ийзем, меге коркышту ачынчылу болотон. А мен бу ӧйдӧ айылда јаҥысканзырап, эдер неме таппай туратам».

14. 1 Петр 3:8-теги јӧп биске социальный сетьтерди ле мессенджерлерди ойгор тузаланарга канайып болужат?

¹⁴ Социальный сетьтердиҥ ле мессенджерлердиҥ тузазы бар эмей. Олордыҥ болужыла бис јууктарысла, најыларысла куучындажадыс. Је кезикте социальный сетьтерде улус бойын рекламировать эдет деп ајарганаар ба? Олордыҥ страницазы: «Мени кӧрзӧӧр!» — деп айдып турган ошкош. А кезик улус бойыныҥ эмезе улустыҥ фотолорына јаман, эби јок комментарийлер бичийт. Мындый неме бийиркенбегер, бой-бойыгарды сӱӱгер деген библиялык јӧпкӧ келишпей јат. (1 Петр 3:8 кычырыгар.)

15. Агару Бичик биске улустаҥ артык болорго албаданбаска канайып болужат?

¹⁵ Слер соцсетьтерле ле мессенджерлерле тузаланып турган болзогор, бойоордоҥ сурагар: «Мениҥ чыгарып турган комментарийлерим, фотолорым ла видеолорым мени мактанып турган деп кӧргӱзип турган болор бо? Улус меге кӱйӱнип баштабас ба?» Агару Бичикте айдылат: «Телекейде бары ончозы: эт-кан кычазы, кӧс кычазы, јадын-јӱрӱмде оморкойтоны Аданаҥ эмес, телекейдеҥ келип јат» (1 Иоанн 2:16). Бир библеисттиҥ айтканыла болзо, «јадын-јӱрӱмде  оморкойтоны» деген сӧстӧр ӧскӧ улустаҥ артык деп кӧрӱнерге турган кижиге келижет. Је христиандар улустаҥ артык болорго албаданбай јат. Олор карын библиялык мындый јӧплӧ јӱрет: «Јакшыркабайлы, сайгакташпайлы, кӱйӱнишпейли» (Гал. 5:26). Бис јобош болзоос, улустаҥ артык болорго бастыра ийде-кӱчиле албаданып турган бу телекейдиҥ улузына тӱҥейлешпезис.

16. Биске нениҥ учун бийиркек болбос керек?

¹⁶ Биске јобош болорго ӱренер керек, нениҥ учун дезе бийиркек улуста бойына чын кӧрӱм болбой јат (Рим. 12:3). Бийиркек улус јаҥыс бойын сананат ла сӧс блаажарга сӱӱп јат. Андый улустыҥ санаалары ла эткен керектери бойына да, улуска да каршу јетирет. Олор бойыныҥ санаазын солыбаганча, Сатана олордыҥ сагыжын сокортор ло ӱреер (2 Кор. 4:4; 11:3). Је јобош кижи дезе бойына чын кӧрӱмдӱ болот. Ол бийиркенбей јат ла улусты бойынаҥ бийик тудат (Флп. 2:3). Јобош кижи «Кудай бийиркектерге удурлажат, јобожыгандарга јакшылык берет» деп билет (1 Петр 5:5). Бойына чын кӧрӱмдӱ улус Иеговага ӧштӱ болорго кӱӱнзебей јат.

17. Јобош болорго биске нени эдер керек?

¹⁷ Биске јобош болорго, мындый библиялык јӧплӧ јӱрер керек: «Јебрен кижини ончо керектериле кожо бойыгардаҥ алып... јаҥы кижини кийип ал[ыгар]» (Кол. 3:9, 10). Биске Иисус керегинде кӧптӧдӧ билер керек ле оноҥ тем аларга тыҥ албаданар керек (1 Петр 2:21). Бу јеҥил эмес, је албаданганыс калас болбос. Бис јобош болорго ӱренип турзаас, эш-нӧкӧрисле ырысту јадарыс, ака-эјелериске бирлик болорго болужарыс ла соцсетьтерле ойгор тузаланарыс. Је эҥ керектӱзи анайып бис Иегованыҥ јарадузын ла алкыжын аларыс.