1. Mikitini Filipi 2:3, misapoener ko falocoˈ hano wa ngaˈay padama kitaanan mararihaday to tao hani?

MAMIHAI kita, mafanaˈay ci Yihofa o maanan ko sangaˈayay kitaanan, mihaenay o mamakahi misapoener ko falocoˈ a midoedo to palinian Ningra a maˈorip. (Ifiso 4:22-24) Misapoener kita, o harateng ni Yihofa mikikakaay ko kalimlaan to harateng no niyah, mikikakaay ko kangaˈay no tao to niyah saan ko piharateng. Ano mihaen i, o mamalo widang ni Yihofa kita, wa ngaˈay mararihaday to salikaka.—ˈOsien ko Filipi 2:3.

2. Mihaiay ko tarokos ci Pawlo to maanan hani? Oniya lalakaw wa milengo to maanan hani?

² Kawra, ano ecaka pisinanot kita i, o mamafiyor no hekal tamdaw, malo misatakaraway misateked. * Itini saka 1 hahekalan roma Krisciyang micadaay to mahaenay pifiyor, samanen masowalay no tarokos ci Pawlo i Loma: ‘Pasowalen ako kamo, aka patakarawen minengneng ko niyah, patatodongen ko harateng.’ (Loma 12:3) Soˈlin mihaiay ci Pawlo itini matatodongay a demak mamisaareteng kita to niyah, kawra o misapoeneray a tamdaw cowa ko papatakaraw a minengneng to niyah. Oniya lalakaw wa milengo, itini tolo a pakayraan, sasamaan kita mitafo to misapoeneray a falocoˈ: (1) Ano micada to raramod, (2) itini likakawa no Kawas mitamorong to ˈinorong, (3) misaka dademak to sapicawmaˈ malawidang a wangcan.

3. Latekay hano cowa kalecad ko harateng no raramod hani? Ano ira ko pasangaray no raramod i, samanay ko harateng no roma tamdaw a misaysay hani?

³ Patirengan ni Yihofa ko raramod, tokel Ningra o faˈinay ato fafahi malacafay lipahak a maˈorip. Kawra cowa ko malefotay ko tamdaw, iraay ko cowa kalecad a harateng no raramod. Pasowalay ci Pawlo o ciramoday a tamdaw wa tahalifa to ‘pades.’ (1 Korinto 7:28) Roma tamdaw marariday malacongis to ramod, mararaway ko mahelaay a tamdaw sanay miharateng, mararaway ko kaciramod. Ano ira ko no hekal a harateng nangra, dengan malalikong ngaˈ masaysay ko pasangaray saan. Oniyah aca ko miharatengan nangra, ano caka pilikong cowa ko papakahemek to niyah sanay.

4. Aka samaan ko piharateng ita hani?

⁴ Cowato ko mamasalof ko raramod no niyah, aka mihaen ko harateng. Mafanaˈay kita, o mihaian no Fangcalay Cudad malalikong a lalangian dengan ko maˈodangay. (Matay 5:32) Mihaenay, ano malifa ita ko misowalan ni Pawlo a pades i, aka pakayni pisatakaraw mihaen ko harateng: “Oniya raramod cowa ka haen o milongocan ako, na mamisongilaˈ ko ramod ako a maolah takowanan ngaˈ matatodong. Ano o roma tamdaw ko cafay, maedeng o lalipahak kako.” O mahaenay a harateng sahtoay o misatekeday. O misowalan no hekal a taneng pakalalokay to tamdaw mitoor to harateng noniyah a midemak, ano lipahakto ko niyah ngaˈayto, ano milikongto ngaˈayto. Kawra o taneng no Kawas pakalalokay kitaanan, ‘aka oniyah aca ko haratengen, haratengen ko tao.’ (Filipi 2:4) Tokel ni Yihofa padotocen mikedec ko raramod, cowa ko malalikongay. (Matay 19:6) Tokel Ningra salakaten misimsim ko pinengneng Ningra, cowa kono niyah a pinengneng.

5. Mikitini Ifiso 5:33, o faˈinay ato fafahi sasamaan macacada hani?

⁵ O faˈinay ato fafahi oha masasingodo ato masasiolah. (ˈOsien ko Ifiso 5:33.) Pasifanaˈay  ko Fangcalay Cudad kitaanan, adihayen ko misadakan i tao, eca ka piharateng mikitini i tao milifok to maanan. (Dmak 20:35) O maanan a capeling ko ngangaˈay padama to mararamoday masasiolah ato masasingodo hani? O misapoeneray. Paihkal ko faˈinay ato fafahi to misapoeneray, wa patado to ramod a miharateng, eca ka oniyah aca ko haratengen.—1 Korinto 10:24.

6. Mikitini i sowal ni Stifen ato fafahi ningra mananamay iso ko maanan hani?

⁶ Paihkal to misapoeneray ko ciraramoday a Krisciyang, wa lipahak ko kaˈorip ato ramod. O cecay ciramodayto a salikaka ci Stifen, sanay: “O mararamoday malecaday o cecay kapot, o mamadadama, ano misiˈayaw to pasangaray i malacafay a misaˈicel. Cowa ko mamiharateng kita ‘o maanan ko sangaˈayay takowanan,’ o mamiharateng, ‘o maanan ko sangaˈayay tamiyanan.’” Malecaday ko harateng no fafahi ningra ci Stifeni, sanay: “Awaay ko maolahay kalacafay to ˈada. Ano ira ko pasangaray i, wa misaˈicel kita mikilim to lalangian, misarocod mitolon, mikilim to lalakaw, malacafay malalengo. O cacoˈayen niyam a ˈada oya pasangaray, cowa ko ramod.” O faˈinay ato fafahi eca pisatakaraw minengneng to niyah, eca piharateng to oniyah ko kalimlaan, mihaen o lalipahakto a tatosa.

7. Ano malifok no salikaka ko cecay ˈinorong i, pairaen ko masamanay a waywayan hani?

⁷ Matayal kita saki Yihofaan, ano o maananto a demak kalikoan a haratengen. (ˈOlic 27:4; 84:10) Cecay salikaka makahiay mihadak to ˈicel, mitongal to demak saki likakawa no Kawas, tada o papakahemeken. Sanay ko sowal no Fangcalay Cudad: ‘Misaˈicel ko tamdaw mitoor to tatodong no kantok, o masemeray to makapahay a tayal.’ (1 Timoti 3:1) Kawra, ano malifok ningra ko cecay ˈinorong i, caay kangaˈay patakaraw minengneng to niyah. (Luka 17:7-10) O patosokan ningra o mamisapoener ko falocoˈ a matayal saki tao.—2 Korinto 12:15.

8. O tinakoan ni Titefis, Osiya, Apsalom pahapinangay kitanan to maanan hani?

⁸ Itini i Fangcalay Cudad iraay ko tatiihay tinakoan, pahapinang kitaanan patakaraway minengneng to niyah a tamdaw o masamaanay. Ci Titefis itini kasakopang ‘maolahay to ˈakawangay saaroˈan,’ cowa ka pisapoener ko falocoˈ. (3 Yohani 9) Misatakaraway ci Osiya, sapidemakaw to cowa papidemaken ni Yihofa cingraanan a demak. (2 Rayray 26:16-21) Ci Apsalom sapilifokaw to saaroˈan no hongti misamangahay sao maolahay to tamdaw, sapilifokaw to sadama no finawlan. (2 Samuil 15:2-6) Oniya tinakoan pahapinangay kitaanan, mapiliˈay ci Yihofa to micangacangay to sapaˈdil to niyah a tamdaw. (Taneng 25:27) Misatakaraway, maˈanofay a tamdaw ka adayayan ko teloc.—Taneng 16:18.

9. Patirengay ci Yis to maanan a taˈarawan hani?

⁹ Dotoc, nengnengen ita ko ngaˈayay taˈarawan ni Yis. Sowal no Fangcalay Cudad: ‘Na iraay kono Kawas a pinangan ningra, kawra cowa piharateng to sapilifokaw to malecaday no Kawas a saaroˈan.’ (Filipi 2:6) Soˈlin o padoedoay ci Yihofaan ko saaroˈan ni Yis, kawra cowa patakaraw cingra minengneng to niyah. Sanay ko sowal ningra to nisawawaan: “Itini lalomaˈ namo, o misapoeneray ko demak a tamdaw i, o sataˈangayay.’ (Luka 9:48) ˈAlomanay misakafahay, dama sikawdan, malohemay malitengay ato kasakilac a kantok misaˈicelay mitodong ci Yisan paihkal to misapoeneray, ngaˈay malacafay cangranan a matayal tada o taˈangayay sapalemed! O matayalay saki Yihofaan a tamdaw paihkalay to misapoeneray, matomesay ko olah i likakawa no Kawas, o olah o tahapinangan no soˈlinay a Krisciyang.—Yohani 13:35.

10. Oniya demak ano cowa ka tatodong ko pisaysay ano saan kiso miharateng, samaanto hani?

 ¹⁰ Ano mifekad ko pasangaray i kasakopang, oniya demak cowa ka tatodong ko pisaysay ano saan kiso miharateng, samaanto hani? Aka ngaliwngiw, paihkalen ko misapoeneray, misaˈicel a midama to mikeriday a salikaka. (Hipray 13:17) Haratengen ko laenoay salicay waira ko sadama: “Soˈlinay pakidem koniya demak, o sasaysayen han? O sangaˈayay a tatokian nohatini misaysay toniya demak han? Iraay ko fadangalan ako misaysay toniya demak han? Soˈlinen ko sowal, mihaen ko demak ako pakayniay sapicowataw to rihaday, anca sapaihkalaw to kalimlaan ko niyah han?”

11. Mikitini Ifiso 4:2, 3, misapoener kita matayal saki Yihofaan wa milifok to maanan a ngaˈay minaroˈan hani?

¹¹ O misaaretengan ni Yihofa o misapoeneray cowa ko inaneng, o kakelec cowa ko kaliki no demak. Mihaenay, misaˈicel kita misapoener a matayal saki Yihofaan, wa ngaˈay micowat to kakelec ato rihaday no kasakopang. (ˈOsien ko Ifiso 4:2, 3.) Ka fanekfek a mitosil, miharatengho ngangaˈay midemak to maanan padama to salikaka, paihkal to kaciharateng cangraanan. Hinapaladaˈ to polong a tamdaw, mahawpay ko awaay ko ˈinorong i kasakopang a tamdaw. (Matay 6:1-4; Luka 14:12-14) Ano misapoener kiso a malacafay to salikaka a matayal, cowa ko inaneng aca iso ko mahapinangay nangra, wa mahapinangho o misapoeneray a tamdaw kiso.

12. O Fangcalay Cudad pakalalokay kitaanan mikilim to hawidang han? Tadtaden.

¹² Mitokelay ci Yihofa lipahak ko kalacafay ita to salawina ato widang. (ˈOlic 133:1) ˈAlomanay  ko widang ni Yis. (Yohani 15:15) Sowal no Fangcalay Cudad irako ngaˈayay widang adihayay ko epoc, somowalayho aka misiwatid to niyah. (Taneng 17:17; 18:1, 24) ˈAlomanay tamdaw anini ngaˈayay pakayni sapicawmaˈ malawidang a wangcan mafanaˈ to adihayay widang, ngaˈay palahdaw to matoˈoray harateng sanay. Kawra, o maminaˈon kita misaka dademak to sapicawmaˈ malawidang a wangcan.

13. Misaka dademak to sapicawmaˈ malawidang a wangcan hano madolo ko tamdaw matoˈor ato matoled hani?

¹³ Paihkalay ko mikingkiwan, adihayay ko toki minengneng to lihaf ato sasing i wangcan a tamdaw, ikor matoˈoray a matoled. Misamanay hani? Cecay lalangian i, o mihadakan no tamdaw i wangcan o sangaˈayay i nokaˈorip a tatokian, o sapaˈaraw i o sangaˈayay a sasing nangra ato widang, o ngaˈayay pisalamaan a kitiraan. Telocto, o harateng no minengnengay to sasing a tamdaw, palinisa to kaˈorip no niyah cowa ka samaan, awaay ko hemek. Cecay 19 ko mihecaan a fafahiyan salikaka sanay: “Maˈaraw ko tao lipahak a misalama to paselaˈan, oniyah saan itini sanay i lomaˈ, masemeray a maˈinap kako.”

14. Pakayni kadademak to sapicawmaˈ malawidang a wangcan, o safalod no 1 Pitiro 3:8 iraay ko maanan sapadama kitaanan?

¹⁴ Manaokaniw, o sapicawmaˈ malawidang a wangcan o ciepocay a lalosidan, tinakoen ngaˈayay mararinnak to salawina ato ngaˈayay widang. Kawra, mahapinangay iso, miterek ko roma tamdaw to sowal, sasing, pakayniay sapiharateng no tao to niyah, mipahiyo to tao han? O roma tamdaw mihadakay to kaacekan a sowal milengo to sasing. Pakalalokay ko Fangcalay Cudad to Krisciyang paihkal to misapoeneray, misikol to nafalocoˈan no tao, madeng cowa ko mamihaen a misaka dademak kita to mahaenay sapicawmaˈ malawidang a wangcan.—ˈOsien ko 1 Pitiro 3:8.

15. Midoedo to limoˈot no Fangcalay Cudad hano papadama kitanan miliyas to pahiyoay to niyah hani?

¹⁵ Ano misaka dademakay kiso to sapicawmaˈ malawidang a wangcan, licayen ko niyah: “O pasadakan ako a sowal, sasing, o pahiyoay kako sanay ko piharateng no tao han? Wa mikidat to sakaˈinap no tao han?” Sowal no Fangcalay Cudad: “Kihcod no hekal, tinakoen o coos no tireng, coos no mata, pahiyoay to hafay a waywayan, cowa ko mikitiniay i kakarayan Wama, o  mikitiniay toniya hekal.” (1 Yohani 2:16) Cecay mihongyakan a Fangcalay Cudad mihongyak to ‘pahiyoay to hafay a waywayan’ o ‘patakaraway to niyah minengneng’ sanay. Kawra cowa kangaˈay ira ko mahaenay harateng no Krisciyang, o mamidoedo to limoˈot no Fangcalay Cudad, sanay ko sinael: ‘Aka ka malitaˈang, aka ka malalifet, aka ka sasiˈinap.’ (Kalatiya 5:26) Ano misapoeneray ko waywayan ita, cowa ko mamalecad to malitaˈangay a tamdaw no hekal, patakaraw a minengneng to niyah.

16. Hano caay ka ngaˈay kita misatakaraw hani?

¹⁶ Palahad to misapoeneray tada kalimlaan, samanen o misatakaraway a tamdaw awaay ko matatodongay a harateng. (Loma 12:3) Misatakaraway a tamdaw palitaˈangay to niyah, maolahay malacongis to tao. O harateng nangra ato waywayan marariday midokaˈ to niyah ato tao. Ano eca pifalic to pakayraan a miharateng, o mamaapoh ato manahol ni Satan. (2 Korinto 4:4; 11:3) Roma i, misapoeneray a tamdaw matatodongay ko harateng. Iraay ko masadafdafay matatodongay a pinengneng to niyah, mihai to ikakaay ko kangaˈay no tao to niyah i adihayay pakayraan. (Filipi 2:3) Mafanaˈay ko misapoeneray a tamdaw, ‘misaˈadaan no Kawas ko misatakaraway a tamdaw, palemeday to misapoeneray ko falocoˈ a tamdaw.’ (1 Pitiro 5:5) O matatodongay ko harateng a tamdaw cowa ka ciharateng malo ˈada ni Yihofa.

17. Sapitafoaw to misapoeneray, wa samaan ko hademak ita hani?

¹⁷ Sapitafoaw to misapoeneray, oha mamitoor kita to sowal no Fangcalay Cudad, ‘hepolen ko matelangay capeling ato matelangay a waywayan,’ hanaca ‘caˈedongen ko faelohay capeling.’ Oha mamisaˈicel kita, tangongol ko kafanaˈ ci Yisan, misarocod a mitodong to taˈarawan ningra. (Kolosay 3:9, 10; 1 Pitiro 2:21) Ciepocay mihaen to demak. Ano palahad kita to misapoeneray, wa ngaˈay micowat ko lipahak no paro no lomaˈ ato kakelec no kasakopang, cowa ko papahiyo to niyah i sapicawmaˈ malawidang a wangcan. Sakakaay i, mamalifok ita ko pihayda ni Yihofa ato sapalemed Ningra.