1. 1) ¿Chem ngülamtueiñmu Filipense 2:⁠3? 2) ¿Chumngechi kümelkayafeiñmu feytachi ngülam?

JEWBA müten kimniey chumngechi taiñ kümelkaleal. Feymu ñom piwke mu, inakefiyiñ tañi ngülam (Efes. 4:⁠22-24). Ñom piwkengeliyiñ, doyümafiyiñ Jewba ñi ayükeel taiñ mongen mu. Ka doykülelu trokiafiyiñ kakelu che. Feymu küme yewküleaiñ Jewba mu, ka taiñ pu peñi ka lamngen mu (papeltunge Filipense 2:⁠3).

2. 1) ¿Chem feypi ti apostol Pablo? 2) ¿Chem ngüneduamaiñ tüfachi chillkatun mu?

² Kuñiwtukuwnoliyiñ, inayenturpuafuiñ pu mallma piwkengelu.⁠ * Femngechi femingün chi kiñeke cristiano kuyfi mu. Feymu Pablo ngülamtueyew: “Itrokom eymün feypiwayiñ tamün kidutu mallmawkülenoal tamün rakiduam mew. Tamün femafel, feley tamün nieal küme rakiduam küme tüngduam mew” (Rom. 12:⁠3). Kümey taiñ falintuwal, welu chumngechi feypi Pablo, müley taiñ ñom piwkengeal, mallmawnoal. Feytachi chillkatun mu, peaiñ chumngechi ñom piwkengeal kelluafi pu kurewen, pu nielu elfal küdaw trawünche mu, ka pu adümkefilu redes sociales.

3. 1) ¿Chumngelu yafkawkey pu kurewen? 2) ¿Chumkey kiñeke kurewen yafkawün mu?

³ Jewba ayükey pu kurewen ñi ayüwküleal, welu tañi culpafe chengen mu yafkawafuy kiñeke mu. Feymu Pablo feypi pu kurewen fillke weda dungu rupakey (1 Kor. 7:⁠28). Kiñeke kurewen poyekefilu ta Jewba, fente tañi yafkawken rakiduamkey ñi wüdayal müten. Tüfachi pu kurewen mallma ngefule, rakiduamafuy ñi kidutu ayüwküleal müten, fey eluwafuy ñi wüdayal autoridad ñi ley dungu mu.

4. ¿Chem weda rakiduam inalayaiñ?

⁴ Biblia feypi mülele ñiwaluwün, fey müten wüdayafuy pu kurewen autoridad ñi ley dungu mu (Mat. 5:⁠32). Rupaliyiñ wedake dungu taiñ kurewen-ngen mu, rakiduamlayaiñ taiñ turpu kümelkawtunoal. Kiñeke kurewen rakiduamkey: “Iñche duamnielaenew tañi afkadi. Iñche mülefuy tañi doy piwkeyengeal. Ka che iñchiw mülefuli, doy ayüwkülepelayafun”. Femngechi rakiduamliyiñ, pengelaiñ taiñ kidutu duamuwken müten. Pu che inakefilu Weküfü ñi rakiduam feypiafeiñmu: “Inange tañi chem piken tami piwke, femngechi müten rüf ayüwküleaymi. Elkünufilmi rume tami afkadi, ka kümekayafuy”. Welu iñchiñ, Chaw Dios tañi pu che ngen, inalayaiñ feytachi wedake rakiduam. Doy may inayaiñ feytachi ngülam: “Iney no rume ayükilpe kidu müten tañi küme feleal, welu may ka femngechi kakelu tañi ayülngeal ñi küme feleal engün” (Filip. 2:⁠4). Jewba ayüniey pu kurewen ñi rumel kiñewküleal (Mat. 19:⁠6). Jewba ayükey taiñ femal kidu ñi ayükeel, iñchiñ taiñ ayükeel no.

5. Ñi feypin Efesio 5:⁠33, ¿chumngechi mülefuy ñi küme yewküleal ti pu kurewen?

 ⁵ Tati kurewen mülefuy tañi piwkeyewal ka yamuwal engu (papeltunge Efesio 5:⁠33). Biblia enseñalkeeiñmu doy falin-ngey taiñ wülal taiñ llowafel mu (Hecho 20:⁠35). Ti epu kurewen, ¿chem kelluafeyew ñi piwkeyewal ka ñi yamuwal engu? Mülefuy ñi ñom piwkengeal engu. Femngechi kidu duamuwlayayngu, welukontu duamuwayngu (1 Kor. 10:⁠24).

6. Ñi feypin ti epu kurewen, ¿chem kimeltukeeiñmu?

⁶ Pütrünke kurewen poyekefilu ta Jewba ñi ñom piwkengen mu doy ayüwkülekeyngün. Peaiñ chem pi ti peñi Esteban: “Tati epu kurewen mülefuy epuñpüle ñi kelluwal. Doy rupafule wedake dungu mu engu, doy mülefuy tañi kelluwal. Tati epu kurewen rakiduamlayay kidutu ñi küme feleal müten, doy may müley ñi rakiduamal ñi mür küme feleal engu”. Tañi domo Estefani pingelu, feypi: “Iney rume ayükelay ñi fillpipiaetew tañi füta. Kiñeke mu kiñewkülelayu tañi füta iñchiw, welu kintukeyu chemu tayu femken. Femngechi dungu mu ta rupan mu, ngillatukefiyu ta Jewba, kintukeyu Jewba tañi kümeke ngülam ka nütramkakeyu tañi doy kiñewal tayu rakiduam. Femngechi femün mu yafkawkelayu” pi. Tati pu kurewen ñom piwkengele, doy ayüwküleay.

7. Kiñe peñi elungele kiñe falin küdaw, ¿chem müley ñi femal?

⁷ Iñchiñ müna falintukefiyiñ ñi serfiafiel ta Jewba (Sal. 27:⁠4; 84:⁠10). Pu peñi doy ayünielu ñi küdawelafiel ta Jewba, sakifali. Feymu Biblia feypieiñmu: “Iney rume ayüle ñi longkoleal ta Ngünechen ñi feyentulelu mew, kiñe küme küdaw ayüniey” (1 Tim. 3:⁠1). Welu elungele kiñe falin küdaw, ngelay tañi mallmawal (Luka 17:⁠7-10). Doy may ñom piwke mu müley tañi serfiafiel tañi pu peñi ka pu lamngen (2 Kor. 12:⁠15).

8. Ñi femün Diotrefe, Uzías ka Absalón, ¿chem kimeltukeeiñmu?

⁸ Biblia feypi kuyfi mu kiñeke che mallma piwkengefuy. Peafiyiñ Diotrefe ñi femün. Kidu mallmawkefuy ka ‘ngenkawkefuy ñi wünenküleal’ (3 Juan 9). Ka femngechi Uzías mallma piwkengefuy ka ayüfuy ñi femal kiñe küdaw tañi femnoafel (2 Crón. 26:⁠16-21). Absalón tañi mallma piwkengen mew tutekefuy ti pu che, femngechi tañi kelluntukuaetew rey ngerpual (2 Sam. 15:⁠2-6). Jewba ayükelafi ñi femün tüfachi küla wentru. Ka femngechi famülke mu, Jewba ayükelafi pu mallma piwkengelu (Prov. 25:⁠27). Pu mallma piwkengelu rumel weda tripakey (Prov. 16:⁠18).

9. ¿Chumngelu inayentufali ta Jesus?

⁹ Jesus femlay feychi küla pu wentru reke. Jesus rume newen-ngey, Jewba müten wüneley kidu mu (Filip. 2:⁠6, TNM). Welu Jesus mallma piwkengelay, feymu nokelkawlay tañi Chaw mu. Kidu feypifi tañi pu inanieetew: “Tati doy illamfalkülelu kom eymün mew, fey may ta longkoleay itrokom mew” (Luka 9:⁠48). Famülke mu fentren wünelekelu amuldungun mew, konakechi kellukelu (siervo ministerial), ka longkolelu trawünche mew ka pu witran-ngepakechi longkolelu ñom piwkengeyngün Jesus reke. Feymu ayüwünkechi trür serfikefiyiñ ta Jewba. Ñom piwkengeliyiñ, welukonkechi piwkeyewaiñ, femngechi pengelaiñ taiñ rüf poyekefiel ta Jewba (Juan 13:⁠35).

10. Ruparumele wedake dungu trawünche mu, ¿chem müley taiñ femal?

 ¹⁰ Kiñeke mu ruparumeafuy wedake dungu taiñ trawünche mu, fey “pu longkolelu chumlay rume” piafuiñ taiñ rakiduam mu. Femngechi rupale, ¿chumafuiñ? Tromtromkiyawlayaiñ, doy may ñom piwkengeaiñ ka kelluntukuafiyiñ ti pu longkolelu (Eb. 13:⁠17). Feymu ramtuwaiñ: “¿Rüf rupamekepey may feytachi wedake dungu trawünche mu? ¿Kam iñche müten femngentufiñ? Rüf mülele kay tüfachi weda dungu, ¿kümepeafuy may ñi küme elkünungetual fewla? ¿Kümepeafuy may iñche tañi konal feytachi dungu mu? ¿Rüf ayüniepefun may ñi kiñewküleal tati trawünche? ¿Kam ayüken ñi sakingeal müten?”.

11. Ñi feypin Efesio 4:⁠2, 3, ñom piwkengeliyiñ ¿chumlerpuay taiñ trawünche?

¹¹ Tunte pepiluwliyiñ rume, Jewba doy falintuñmakeeiñmu taiñ ñom piwkengeal. Jewba ayükey taiñ küme küdawfe ngeal, welu doy ayükey taiñ kiñewküleal. Feymu ñom piwkengeaiñ, femngechi kiñewküleaiñ taiñ trawünche mu (papeltunge Efesio 4:⁠2, 3). ¿Chumngechi pengelafuiñ taiñ ñom piwkengen? Kom taiñ newen mu amuldunguleaiñ llemay. Kellunieafiyiñ chem dungu mew rume kakelu pu che. Küme llowafiyiñ taiñ ruka mu kom taiñ pu peñi ka pu lamngen, nienole rume falinke küdaw trawünche mu (Mat. 6:⁠1-4; Luka 14:⁠12-14). Femliyiñ kom tüfachi dungu, taiñ pu peñi ka pu lamngen ngüneduamlayay taiñ  pepiluwün müten, doy may ngüneduamay taiñ ñom chengen.

12. ¿Chem pikeeiñmu Biblia taiñ nieal ta weni?

¹² Jewba ayükey taiñ küme rupaleal taiñ pu weni iñchiñ ka taiñ pu familia iñchiñ (Sal. 133:⁠1). Jesus niekefuy kümeke weni (Juan 15:⁠15). Biblia feypi kümey taiñ nieal kümeke weni (Prov. 17:⁠17; 18:⁠24). Biblia ka feypieiñmu taiñ wichunentuwnoal (Prov. 18:⁠1). Fentren che feypikey tati redes sociales kellukeeyew ñi alüke nieal ta weni, femngechi tañi kidulelu trokiwnoal. Welu adümfiliyiñ tati redes sociales, kuñiwtukuwaiñ.

13. ¿Chemu am tati adümkefilu redes sociales kidulelu trokiwafuyngün?

¹³ Pu che tukukey redes sociales mu tañi doy kümeke foto, pengelkey fente ñi küme rupan tañi pu weni engün ka chew tañi miyawün engün, ka kakelu falinke dungu ñi rupan tañi mongen mu. Pu che rume adkintufile feytachi adentun, “iñche ñi mongen mu ngelay ayüwün” piafuy, fey kidulelu trokiwafuy ka weda duamnagafuy. Kiñe lamngen 19 tripantu nielu, feypi: “Pen mu internet mu fente ñi küme rupaken kakelu che, müna weda duamken, kidulelu am iñche ruka mu”.

14. Ñi feypin 1 Pedro 3:⁠8, ¿chumngechi kelluafeiñmu taiñ küme püneafiel tati redes sociales?

¹⁴ Küme pünelleafuiñ may tati redes sociales taiñ nütramkayal taiñ pu weni iñchiñ ka taiñ pu familia iñchiñ. Welu pütrüken che tukukey foto ka video tañi redes sociales mu re tañi sakingeal müten. Feytachi pu che ayükey tañi puwkintuniengeal müten. Kiñeke tüfachi pu che re wedake dungu wirintukukeyngün tañi foto mu ka tañi pu weni tañi foto mu. Iñchiñ taiñ cristiano ngen, ngelay taiñ femal feytachi dungu. Doy may müley taiñ ñom piwkengeal ka taiñ piwkeyechefengeal (papeltunge 1 Pedro 3:⁠8).

15. ¿Chumngechi kellueiñmu Biblia taiñ mallmawnoal?

¹⁵ Adümfiel mu tati redes sociales, ramtuwaiñ: “Tañi wirintukuel redes sociales  mu ka tañi foto ka tañi video, ¿chem pi iñche mu? ¿Mallmangey pingeafun? ¿Iñche tañi duam mu may ütrirpeafenew ta che?”. Biblia feypi: “Fey tüfachi mapu mew müley: tañi weda illutukeel ta che, ka tañi ayütukeel, ka tañi mallma piwkengen ñi niengen mew fentren chemkün. Fey tüfachi dungu Chaw Ngünechen ayükelay, tüfachi mapu mew am tripalu” (1 Juan 2:⁠16). Feytachi versiculo pengelkeeiñmu kiñeke ta che chekawkey. Iñchiñ taiñ cristiano ngen chekawkelaiñ, doy may inakefiyiñ tüfachi ngülam: “Mallmangelayaiñ, ka konwelayaiñ rume ta kewatun mew ka ütriruwlayayiñ ta iñchiñ” (Gal. 5:⁠26). Ñom piwkengeliyiñ, chekawün-ngelayaiñ.

16. ¿Chumngelu mallma ngelayaiñ?

¹⁶ Pu mallma piwkengelu küme rakiduam nielayngün, yafkawkeyngün iney mu rume ka chekawkeyngün (Rom. 12:⁠3). Ka tañi rakiduam mu ka tañi femken mu kidutu wedalkawkeyngün ka wedalkakefi kakelu che. Pu mallma piwkengelu küme elkünutunofile tañi rakiduam, Weküfü welulkayafeyew engün (2 Kor. 4:⁠4; 11:⁠3). Welu pu ñom piwkengelu küme rakiduam nieyngün, chekawkelayngün ka doykülelu trokikefi ta kakelu che (Filip. 2:⁠3). Kidu engün kimniey ‘Ngünechen katrütukefi tati pu mallmawün-ngelu, welu fürenekefi tati pu ñom piwkengelu’ (1 Ped. 5:⁠5). Iñchiñ ayünieiñ taiñ füreneaetew Jewba, feymu ñom piwkengeaiñ.

17. Taiñ ñom piwkengeal, ¿chem mülefuy taiñ femal?

¹⁷ Ayüliyiñ taiñ ñom piwkengeal, famtripayaiñ taiñ kuyfike weda mongen mu ka nietuaiñ kümeke mongen. Tüfa müna küdawngeafuy, müley taiñ küme kimafiel Jesus ñi femün ka inayentuafiel (Kol. 3:⁠9, 10; 1 Ped. 2:⁠21). Femliyiñ, müna kümelkaleaiñ. Ñom piwkengeliyiñ, taiñ pu familia doy ayüwküleay. Taiñ trawünche doy kiñewküleay ka küme püneafiyiñ tati redes sociales. Doyelchi may, doy ayüwülafiyiñ ta Jewba.