1. Филиппилиләрә 2:3 ајәсиндә һансы мәсләһәт вар вә она әмәл етмәк бизә һансы фајданы ҝәтирәҹәк?

БИЗ Јеһованын әмрләринә тәвазөкарлыгла табе олуруг, чүнки анлајырыг ки, О бизим үчүн нәјин даһа јахшы олдуғуну билир (Ефес. 4:22—24). Тәвазөкар оларыгса, биз өз истәјимизи јох, Јеһованын ирадәсини јеринә јетирәҹәјик вә башгаларыны өзүмүздән үстүн сајаҹағыг. Беләҹә, һәм Јеһова илә, һәм дә диндашларымызла мүнасибәтимиз јахшы олаҹаг. (Филиппилиләрә 2:3 ајәсини охујун.)

2. Һәвари Булусун сөзләри нәји ҝөстәрир вә бу мәгаләдә нәји арашдыраҹағыг?

² Еһтијатлы олмасаг, Шејтан дүнјасында јашајан гүрурлу вә худбин инсанларын тәсири алтына дүшә биләрик *. Ҝөрүнүр, ерамызын биринҹи әсриндә јашајан мәсиһиләрин бәзиләри белә тәсирә ујмушду. Буну һәвари Булусун нөвбәти сөзләриндән ҝөрмәк олар: «Һәр биринизә дејирәм: өзүнүз барәдә лүзумундан артыг фикирләшмәјин. Һәр кәс... сағлам дүшүнҹәни горујуб сахласын» (Ром. 12:3). Һәвари Булусун сөзләринә әсасән, өзүмүз барәдә мүәјјән дәрәҹәдә фикирләшмәлијик. Амма тәвазөкарлыг бизә һәдди ашмамаға көмәк едәҹәк. Ҝәлин ҝөрәк тәвазөкарлыг бизә 1) аилә һәјатында,  2) тәшкилатдакы мәсул ишләрдә вә 3) сосиал шәбәкәләрдән истифадә заманы неҹә көмәк едәҹәк.

3. Аиләдә проблемләрин јаранмасына сәбәб нә ола биләр вә бәзиләри чыхыш јолуну нәдә ҝөрүр?

³ Јеһова никаһын әрлә арвада хошбәхтлик бәхш етмәсини нијјәт етмишди. Амма һеч ким камил олмадығы үчүн аиләдә сөз-сөһбәтин јаранмасы гачылмаздыр. Һәвари Булус демишди ки, аилә һәјаты гуранларын мүәјјән чәтинликләри олаҹаг (1 Кор. 7:28). Бәзи әр-арвадлар бир-бирилә јола ҝедә билмир, буна ҝөрә белә гәнаәтә ҝәлирләр ки, јанлыш инсанла аилә гурублар. Әҝәр онлар дүнјанын тәсиринә ујарларса, чыхыш јолуну бошанмагда ҝөрәҹәкләр. Әрдә, јахуд арвадда белә фикир јарана биләр ки, һәр шејдән ваҹиб өз хошбәхтлијидир.

4. Һансы фикри ағлымыза ҝәтирмәмәлијик?

⁴ «Һәјат јолдашым үрәјимҹә дејил» фикрини ағлымыза белә ҝәтирмәмәлијик. Баша дүшүрүк ки, Мүгәддәс Китаб јалныз никаһда ҹинси әхлагсызлыг олдуғу һалда бошанмаға әсас верир (Мәт. 5:32). Она ҝөрә дә һәвари Булусун гејд етдији кими, чәтинликләрлә үзләшәндә јол вермәмәлијик ки, үрәјимиздә гүрур баш галдырсын вә биздә белә фикирләр јарансын: «Мән јолдашымын веҹинә дејиләм. О мәнә лајиг олдуғум мәһәббәти ҝөстәрмир. Бәлкә дә, мән башга инсанла даһа хошбәхт оларам». Бу ҹүмләләрдәки «мән» сөзүнә фикир вердиниз? Бу дүнјанын һикмәти ашылајыр ки, «үрәјинин сәсинә гулаг ас, сәни нә хошбәхт едәҹәксә, ону да ет, һәтта бу, бошанмаг олса белә». Илаһи һикмәт исә дејир ки, «тәкҹә өзүнүзү фикирләшмәјин, башгаларыны да фикирләшин» (Филип. 2:4). Јеһова аиләнизи дағытмағынызы јох, горумағынызы истәјир (Мәт. 19:6). О истәјир ки, гәрарларыныз худбин арзуларыныза јох, Онун принсипләринә әсаслансын.

5. Ефеслиләрә 5:33 ајәсинә әсасән, әр-арвад бир-бирилә неҹә рәфтар етмәлидир?

 ⁵ Әр-арвад бир-бирилә мәһәббәт вә һөрмәтлә давранмалыдыр. (Ефеслиләрә 5:33 ајәсини охујун.) Мүгәддәс Китаб бизи гаршы тәрәфдән нә ала биләҹәјимиздән чох, өзүмүзүн нә верә биләҹәјини дүшүнмәјә тәшвиг едир (Һәв. 20:35). Бәс мәһәббәт вә һөрмәт ҝөстәрмәјә һансы хүсусијјәт көмәк едә биләр? Тәвазөкарлыг. Тәвазөкар әр вә арвад өз хејрини јох, гаршы тәрәфин хејрини дүшүнәҹәк (1 Кор. 10:24).

6. Стивен вә Стефанинин сөзләриндән нә өјрәндиниз?

⁶ Бир чох мәсиһи әр-арвад тәвазөкар олмағын сајәсиндә даһа хошбәхт олуб. Мисал үчүн, Стивен адлы бир әр дејир: «Әҝәр сиз бир команда олсаныз, бир-биринизлә әмәкдашлыг едәҹәксиниз, әсас да проблем јарананда. Онда “мәним үчүн” јох, “бизим үчүн нә даһа јахшы оларды” дүшүнәҹәксиниз». Онун јолдашы Стефани дә ејни фикирдәдир: «Һеч ким рәгиби илә бир евдә јашамаг истәмәз. Арамызда проблем јарананда сәбәбини мүәјјән едирик. Сонра дуа едирик, арашдырма апарырыг вә һәллини мүзакирә едирик. Биз бир-биримизин үстүнә дүшмүрүк, проблемин үстүнә дүшүрүк». Әр вә арвад өзү барәдә лүзумундан артыг фикирләшмәсә, мүтләг бунун хејрини ҝөрәҹәк.

7. Һансыса мәсулијјәт алан гардашын әһвали-руһијјәси неҹә олмалыдыр?

⁷ Јеһоваја хидмәтдә әлимиздән ҝәләни етмәк бизим үчүн шәрәфдир (Зәб. 27:4; 84:10). Әҝәр гардаш Јеһоваја хидмәтдә даһа чох шеј етмәјә һазырдырса, бу, тәрифәлајигдир. Мүгәддәс Китабда јазылыб: «Нәзарәтчи олмаға ҹан атан јахшы шеј арзулајыр» (1 Тим. 3:1). Бунунла белә, гардаш һансыса мәсулијјәт аланда өзү һагда јүксәк фикирдә олмамалыдыр (Лука 17:7—10). Онун мәгсәди башгаларына тәвазөкарлыгла хидмәт етмәк олмалыдыр (2 Кор. 12:15).

8. Диотреф, Үзијјә вә Абсаламын һәрәкәтиндән һансы ибрәти ҝөтүрүрүк?

⁸ Мүгәддәс Китабда өзләри һагда лүзумундан артыг дүшүнән инсанлардан данышылыр. Онлардан бири Диотреф јығынҹагда башчылыг етмәк севдасына дүшмүшдү (3 Јәһ. 9). Үзијјә гүрурланараг һәддини ашмышды, Јеһованын она тапшырмадығы бир иши ҝөрмәјә ҹәһд етмишди (2 Салн. 26:16—21). Абсалам исә падшаһ олмаг истәдији үчүн һијләҝәрлик едиб инсанлары өз тәрәфинә чәкмәјә чалышырды (2 Ишм. 15:2—6). Бу һадисәләр ајдын шәкилдә ҝөстәрир ки, Јеһова өзүнү уҹалдан инсанлары бәјәнмир (Мәс. 25:27). Гүрур вә шөһрәтпәрәстлик инсаны учурума апарыр (Мәс. 16:18).

9. Иса Мәсиһ һансы нүмунәни гојуб?

⁹ Бу инсанлардан тамамилә фәргләнән Иса Мәсиһ «Аллаһын симасында олса да, һакимијјәти әлә кечирмәји, јәни Аллаһа бәрабәр олмағы фикринә белә, ҝәтирмәди» (Филип. 2:6). Каинатда Јеһовадан сонра икинҹи ән сәлаһијјәтли варлыг олмасына бахмајараг, Иса һеч вахт өзү һагда лүзумундан артыг дүшүнмәјиб. О, шаҝирдләринә демишди: «Аранызда ән тәвазөкар кимдирсә, бөјүк одур» (Лука 9:48). Иса Мәсиһдән өрнәк ҝөтүрәрәк тәвазөкарлыг ҝөстәрән өнҹүлләрлә, јығынҹаг хидмәтчиләри илә, ағсаггалларла вә рајон нәзарәтчиләри илә хидмәт етмәк адама зөвг верир! Јеһоваја тәвазөкарлыгла хидмәт едән мәсиһиләр бир-биринә Јеһованын тәшкилатынын нишанәси олан мәһәббәт хүсусијјәтини ҝөстәрирләр (Јәһ. 13:35).

10. Јығынҹагда һансыса проблемләрин дүзҝүн шәкилдә һәлл олунмадығыны дүшүнүрсүнүзсә, нә етмәлисиниз?

¹⁰ Бәс јығынҹагда мүәјјән проблемләрин  олдуғуну вә ағсаггалларын онлары дүзҝүн шәкилдә һәлл етмәдијини дүшүнүрсүнүзсә, онда неҹә? Ҝилејләнмәкдәнсә, јахшы олар ки, тәвазөкарлыг ҝөстәриб рәһбәрлик едән гардашлара дәстәк оласыныз (Ибр. 13:17). Нөвбәти суаллар сизә дүзҝүн дүшүнҹәјә саһиб олмаға көмәк едә биләр: «Ҝөрдүјүм проблемләр, һәгигәтәнми, о гәдәр ҹиддидир ки, онлара дүзәлиш етмәк лазымдыр? Буну етмәјин вахты индидир? Онлары һәлл етмәк мәним ишимдир? Дүрүст олсам, мән јығынҹагда бирлијин горунмасына ҝөрә нараһатам, јохса өзүмү ҝөстәрирәм?»

11. Ефеслиләрә 4:2, 3 ајәләринә әсасән, Јеһоваја тәвазөкарлыгла хидмәт етмәк һансы бәһрәләри ҝәтирир?

¹¹ Јеһова баҹарыгдан чох тәвазөкарлыға, наилијјәтдән чох бирлијә өнәм верир. Она ҝөрә дә вар ҝүҹүнүзлә чалышын ки, Јеһоваја тәвазөкарлыгла хидмәт едәсиниз. Белә етсәниз, јығынҹагда бирлији горујаҹагсыныз. (Ефеслиләрә 4:2, 3 ајәләрини охујун.) Тәблиғ ишиндә фәал олун. Башгаларына јахшылыг етмәјин јолларыны ахтарын. Һамыја, о ҹүмләдән јығынҹагда һансыса мәсулијјәти олмајанлара гонагпәрвәрлик ҝөстәрин (Мәт. 6:1—4; Лука 14:12—14). Тәвазөкар олсаныз, јығынҹагдакылар сизин тәкҹә баҹарыгларынызы јох, тәвазөкарлығынызы да ҝөрәҹәк.

12. Мүгәддәс Китабда достлуг һагда нә дејилир?

¹² Јеһова бизим достларымызла вә аилә үзвләримизлә вахт кечирмәкдән зөвг алмағымызы истәјир (Зәб. 133:1). Иса Мәсиһин дә јахшы достлары вар иди (Јәһ. 15:15). Мүгәддәс Китабда әсл достлара саһиб олмағын ҝөзәл бир немәт олдуғу вурғуланыр  (Мәс. 17:17; 18:24). Һәмчинин орада дејилир ки, тәнһалыға гапылмаг јахшы дејил (Мәс. 18:1). Чохларынын фикринҹә, сосиал шәбәкәләр достларын сајыны артырмаға вә тәнһалыға гапылмамаға көмәк едир. Амма бу үнсијјәт үсулундан истифадә едәркән чох еһтијатлы олмалыјыг.

13. Нәјә ҝөрә сосиал шәбәкәләрдән истифадә едәнләрин бәзиләри тәнһалыға вә депрессијаја даһа мејилли олур?

¹³ Арашдырмалар ҝөстәрир ки, сосиал шәбәкәләрдә пајлашылан шәрһләрә вә шәкилләрә бахмаға чох вахт сәрф едән инсанларын тәнһалыға вә депрессијаја гапылмаг еһтималы бөјүкдүр. Нәјә ҝөрә? Сәбәбләрдән бири одур ки, инсанлар сосиал шәбәкәләрдә, әсасән, һәјатларынын хүсуси анларында чәкилән шәкилләри, өзләринин вә достларынын ән гәшәнҝ шәкилләрини сәрҝиләјир, ҝәзиб-ҝөрдүкләри јерләрин шәкилләрини пајлашыр. Онларын пајлашдыгларына бахан инсанда елә һисс јарана биләр ки, онун һәјаты ади, һәтта сыхыҹыдыр. 19 јашлы бир баҹы дејир: «Ҝөрәндә ки, ҹамаат һәфтәсонлары јахшыҹа әјләниб, мән исә бүтүн ҝүнү евдә отуруб дарыхдырыҹы ҝүн кечирмишәм, пис олурдум».

14. 1 Бутрус 3:8 ајәсиндә јазылан мәсләһәт сосиал шәбәкәләрдән дүзҝүн истифадә етмәјә неҹә көмәк едә биләр?

¹⁴ Әлбәттә ки, сосиал шәбәкәләрдән фајдалы мәгсәдләр үчүн дә истифадә етмәк олар, мәсәлән, аилә үзвләри вә ја достларла әлагә сахламаг үчүн. Амма јәгин фикир вермисиниз ки, бәзиләри пајлашдыглары шејләрлә өзләрини реклам едир. Белә етмәклә онлар санки «мәнә бахын» исмарыҹыны јоллајырлар. Бәзиләри һәтта өзләринин, јахуд башгаларынын пајлашдығы шәкилләрин алтында етикадан кәнар вә әдәбсиз шәрһләр јерләшдирир. Бу кими шејләр мәсиһијә јарашмаз, чүнки биз тәвазөкар вә шәфгәтли олмаға тәшвиг олунуруг. (1 Бутрус 3:8 ајәсини охујун.)

15. Мүгәддәс Китаб өзүмүзү нүмајишә гојмамаға неҹә көмәк едир?

¹⁵ Сосиал шәбәкәләрдән истифадә едәркән дүшүнүн: «Пајлашдығым шәрһләр, шәкилләр вә ја видеолар инсанларда елә тәәссүрат јаратмајаҹаг ки, өзүмлә өјүнүрәм? Кимдәсә пахыллыг һисси ојатмарам?» Мүгәддәс Китабда дејилир: «Дүнјадакы һәр шеј — ҹисмин истәји, ҝөзләрин истәји вә варын нүмајишә гојулмасы Атадан дејил,  дүнјадандыр» (1 Јәһ. 2:16). Башга бир тәрҹүмәдә «варын нүмајишә гојулмасы» ифадәси «ваҹиб инсан кими ҝөрүнмәк истәји» кими тәрҹүмә олунуб. Мәсиһиләр өзләрини ваҹиб инсан кими ҝөстәрмәји лазым билмирләр. Онлар Мүгәддәс Китаб мәсләһәтинә әмәл едирләр: «Мәғрур олмајаг, бир-биримизи рәгабәтә тәһрик етмәјәк, бир-биримизин пахыллығыны чәкмәјәк» (Гал. 5:26). Тәвазөкар олсаг, бу дүнјанын ловғалыг руһуна јолухмајаҹағыг.

16. Нәјә ҝөрә гүрурлу олмамалыјыг?

¹⁶ Гүрурлу инсан сағлам дүшүнҹәјә саһиб дејил (Ром. 12:3). Белә инсан мүбаһисә едир вә худбин олур. Онун дүшүнҹә вә һәрәкәтләри чох вахт өзүнә вә башгаларына зәрәр верир. Әҝәр о, дүшүнҹә тәрзини дәјишмәсә, Шејтан онун зеһнини корлајаҹаг, ону кор едәҹәк (2 Кор. 4:4; 11:3). Тәвазөкар инсан исә сағлам дүшүнҹәјә саһибдир. О өзү һагда лүзумундан артыг фикирләшмир, башгаларынын бир чох саһәләрдә ондан үстүн олдуғуну гәбул едир (Филип. 2:3). Һәмчинин о билир ки, «Аллаһ мәғрурлара гаршы чыхыр, тәвазөкарлара исә лүтф ҝөстәрир» (1 Бут. 5:5). Сағламдүшүнҹәли инсан Јеһованын онунла мүбаризә апармасыны истәмәз.

17. Тәвазөкар галмаг үчүн нә етмәлијик?

¹⁷ Тәвазөкар галмаг үчүн биз Мүгәддәс Китабда јазылан нөвбәти мәсләһәтә әмәл етмәлијик: «Көһнә шәхсијјәти әмәлләри илә бирҝә әјниниздән чыхарыб, јени шәхсијјәти ҝејинин». Бу елә дә асан дејил. Ҝәрәк Иса Мәсиһ һагда мүталиә едиб, аддымбааддым онун изи илә ҝедәк (Кол. 3:9, 10; 1 Бут. 2:21). Бунун үчүн зәһмәт чәкмәјә дәјәр. Тәвазөкарлыға јијәләндикҹә аиләмиз даһа хошбәхт олаҹаг, јығынҹагда бирлији горумуш олаҹағыг вә сосиал шәбәкәдән истифадә едәркән өзүмүзү нүмајиш етдирмәјәҹәјик. Ән әсасы исә Јеһованын рәғбәтини газанаҹағыг.