1. Aha do poda na disurat di Pilippi 2:3, jala aha do labana molo taulahon i?

UNDUK do hita tu paretta ni Jahowa, alana Ibana do na umboto aha na dumenggan di hita. (Eps. 4:22-24) Molo serep rohatta, gabe urrikkot do di hita lao mangulahon lomo ni roha ni Jahowa, sian giot-giotta sandiri. Jala tabahen do halak na asing urrikkot sian diritta. Hasilna, gabe denggan ma parale-aleotta tu Jahowa dohot tu akka dongan.​—Jaha Pilippi 2:3.

2. Aha do na diboto si Paulus, jala aha do na lao taulas di parsiajaran on?

² Alai, molo dang manat hita, olo do gabe tarihut-ihut hita tu akka halak di portibi on. Ginjang do roha ni nasida, jala diharikkotton nasida do dirina sandiri. * Ra, on ma na masa tu piga-piga halak Kristen di abad na parjolo. Alani i, didok apostel Paulus ma tu halak Kristen na di Rom, “Hupaboa ma tu hamu sude: Unang ma didok rohamuna tumimbo dirimuna. Alai marbisuk ma hamu.” (Rom 12:3) Diboto si Paulus do, porlu do hita mangargai diritta sandiri. Alai molo serep rohatta, boi do i mangurupi hita asa toktong seimbang. Di parsiajaran on, taulas ma songon dia hita boi patuduhon serep ni roha di tolu situasi on, i ma (1) di parsaripeon, (2) tikki mangulahon tanggung jawab di organisasi jala (3) tikki mamakke media sosial.

3. Boasa boi tubu parsoalan di parsaripeon, jala songon dia piga-piga halak mangadopi parsoalan i?

³ Lomo do roha ni Jahowa asa marlas ni roha halak na marsaripe. Alai dang adong jolma na sempurna. Jadi, olo do gabe tubu parsoalan di parsaripeon. Sasittongna nungnga didok si Paulus hian, molo halak na marsaripe ikkon mangadopi godang hasusaan. (1 Kor. 7:28) Adong do piga-piga na sai torus marbadai dohot dongan saripena, jadi didok roha ni nasida tumagon hian ma dang saut nasida marhasohotan. Jala molo diihutton nasida pandapot ni akka halak di portibi on, gabe dirippu nasida ma marsirang do jalan keluarna. Na makkarikkotton dirina sandiri do nasida disi, alana dirippu nasida ikkon marsirang do asa boi las roha ni nasida muse.

4. Cara marpikkir na songon dia do na ikkon tapasiding?

⁴ Unang ma didok rohatta, dang boi be dipadenggan parsaripeonta. Alana didok di Bibel, holan ala mangulahon seks na so patut do halak na marsaripe boi marsirang. (Mat. 5:32) Jadi molo adong parsoalan di parsaripeon, unang ma gabe taharikkotton diritta sandiri. Unang ma gabe tadok, ‘Dang parduli ibana tu au. Dang holong be rohana tu au. Tumagon ma au tu na asing.’ Molo tadok songon i, holan diritta sandiri do na tapikkirhon. Akka halak di portibi on mandok, tumagon ma marsirang molo memang i do na mambahen las rohamuna. Alai Bibel mandok, “Unang ma holan mamparrohahon na ringkot di hamu, alai parrohahon ma na ringkot di na asing.” (Plp. 2:4) Lomo do roha ni Jahowa asa dijaga hamu parsaripeonmuna, jala dang gabe marsirang hamu. (Mat. 19:6) Jala lomo do rohana asa Ibana na taharikkotton, dang diritta sandiri.

5. Hombar tu Epesus 5:33, aha do na ikkon diulahon suami dohot istri asa denggan parsaripeonna?

⁵ Ikkon masihaholongan do suami dohot istri. (Jaha Epesus 5:33.) Di Bibel, diajari  do hita asa urringgas mangalehon sian na manjalo. (Ul. 20:35) Parange aha do na boi mangurupi suami dohot istri asa masihaholongan jala mangargai dongan saripena? I ma serep ni roha. Molo serep do roha ni nasida, urrikkot do di nasida “halak na asing” sian dirina sandiri.​—1 Kor. 10:24.

6. Aha do na boi taparsiajari sian pengalaman ni si Steven dohot si Stephanie?

⁶ Godang do suami dohot istri na marlas ni roha ala patuduhon serep ni roha. Misalna, sahalak donganta na margoar si Steven mandok, “Sada tim do suami dohot istri. Jadi ikkon kerjasama do hami, tarlumobi tikki adong parsoalan. Jadi unang ma tapikkirhon ‘aha ma na dumenggan di au?’, alai pikkirhon ma ‘aha na dumenggan di hami nadua?’” Songon i do tong na dihilala istrina, si Stephanie. Didok ibana, “Tikki adong parsoalan, dilului hami do boasa boi tubu parsoalan i. Ditangiakkon hami ma i, dibahen hami ma riset, jala dihatai hami ma songon dia pasaehon parsoalan i. Jala dang gabe marbadai hami alani i.” Jadi molo suami dohot istri dang makkarikkotton dirina sandiri, marlaba do i tu parsaripeon ni nasida.

7. Aha do na ikkon diulahon sahalak donganta bawa molo dapotna sada tanggung jawab na rikkot di organisasi ni Jahowa?

⁷ Tottu sada hasangapon do di hita ala boi mangalehon gumodang tikki dohot gogo lao manomba Jahowa. (Ps. 27:4; 84:11) Jadi molo adong donganta bawa na rade mangalehon gumodang tikkina tu Jahowa, tapujihon do i. Didok do di Bibel, “Molo marsitutu sahalak baoa naeng gabe sintua, na lomo do rohana mandapot ulaon na denggan.” (1 Tim. 3:1) Alai molo dapotna sada tanggung jawab na rikkot, unang ma gabe didok rohana urrikkot do dirina sian na asing. (Luk. 17:7-10) Ikkon toktong do serep rohana jala marsitutu lao mangurupi na asing.​—2 Kor. 12:15.

8. Aha do na boi taparsiajari sian si Diotrepes, si Usia, dohot si Absalom?

⁸ Di Bibel, dipaboa do taringot akka halak na makkarikkotton dirina sandiri. Ginjang do roha ni si Diotrepes, marsitutu do ibana “patimbohon dirina” di huria. (3 Joh. 9) Ala ginjang do roha ni si Usia, diulahon ibana do tugas na so dilehon Jahowa tu ibana. (2 Kron. 26:16-21) Marsitutu do si Absalom mambuat roha ni akka halak, asa dibahen nasida gabe raja ibana. (2 Sam. 15:2-6) Sian akka contoh i, takkas ma dang lomo roha ni Jahowa mangida akka halak na marsitutu pasangappon dirina. (Poda 25:27) Marjea do ujungna akka halak na ginjang rohana jala pasangappon dirina.​—Poda 16:18.

9. Sitiruon aha do na dibahen Jesus tu hita?

⁹ Imbar situtu do Jesus sian tolu bawa i. Didok do di Bibel, “Nang pe songon Debata ibana, alai ndang hea tarpingkir ibana laho manggulut asa sarupa tu Debata.” (Plp. 2:6) Holan Jahowa do na umgogo sian Jesus, dang adong be na asing. Alai dang olo Jesus asa gabe sarupa songon Bapakna. Dang didok rohana urrikkot do dirina sian na asing. Didok Jesus do tu akka siseanna, “Manang ise na ummetmet di hamu, ibana do na umbalga.” (Luk. 9:48) Tottu, las situtu do rohatta molo rap saulaon dohot akka perintis, parhobas, sintua dohot pengawas wilayah na marserep ni roha songon Jesus! Molo serep rohatta, gabe lam balga ma holongta tu akka dongan. Jala gabe ditanda ma hita naposo ni Debata ala masihaholongan.​—Joh. 13:35.

10. Aha do na ikkon diulahon hamu molo dihilala hamu dang denggan cara ni akka sintua pasaehon sada parsoalan?

¹⁰ Boha molo adong parsoalan di huria,  jala dihilala hamu dang denggan cara ni akka sintua menangani parsoalan i? Unang ma marungut-ungut. Sai patudu ma serep ni roha, jala toktong ma unduk tu akka dongan na manguluhon hamu. (Heb. 13:17) Asa boi hamu mangulahon i, sukkun ma dirimuna, ‘Memang serius hian do parsoalan on umbahen ikkon hupasingot akka sintua i? Cocok do molo saonari hupasingot nasida? Memang tugashu do lao pasingotton nasida? Sasittongna, aha do tujuanku pasingotton nasida, asa mambahen huria gabe marsada do, manang holan naeng pasangappon dirikku sandiri?’

11. Hombar tu Epesus 4:2, 3, aha do hasilna molo tapatudu serep ni roha lao manomba Jahowa?

¹¹ Dao do urrikkot di Jahowa serep ni rohatta sian bakatta. Jala dao do urrikkkot di Jahowa molo hita marsada sian apala marhasil hita mangulahon sada ulaon. Alani i, marsitutu ma asa toktong serep rohatta manomba Jahowa. Molo taulahon i, boi ma gabe marsada huria. (Jaha Epesus 4:2, 3.) Sai toktong ma ringgas hita di ulaon marbarita. Lului ma cara asa boi mangurupi na asing jala burju ma hita tu nasida. Burju ma hita tu sude akka dongan, tarmasuk ma akka dongan na so pola adong tanggung jawabna di huria. (Mat. 6:1-4; Luk. 14:12-14) Molo serep do rohamuna, dang holan bakatmuna na diida akka dongan di huria, alai tarmasuk do serep ni rohamuna i.

12. Aha do na didok Bibel taringot marale-ale? Patorang ma.

¹² Lomo do roha ni Jahowa asa marlas ni roha hita raphon keluargatta dohot ale-aletta. (Ps. 133:1) Jesus pe adong do ale-alena. (Joh. 15:15) Di Bibel dipaboa do labana molo  marale-ale hita. (Poda 17:17; 18:24) Jala didok do di Bibel, dang denggan molo hita dang olo marsaor dohot halak na asing. (Poda 18:1) Godang halak makkilala, boi do media sosial mangurupi hita asa mandapot godang ale-ale jala asa unang kesepian. Alai, ikkon manat do hita mamakke media sosial.

13. Boasa adong piga-piga halak na mamakke media sosial gabe kesepian jala marsak?

¹³ Akka pakar mandok, halak na pajotjothu mangida komentar dohot poto na dibahen halak di media sosial, ujungna gabe kesepian jala marsak. Boasa? Alana, di media sosial jotjot do akka halak mambahen poto taringot akka na menarik di ngolu ni nasida. Misalna, dibahen nasida ma potona sandiri, poto ni akka donganna, dohot poto ni akka inganan na hea dikunjungi nasida. Halak na mangida poto sisongon i, ra gabe marpikkir biasa-biasa do ngoluna saleleng on, jala dang adong na menarik. Sahalak donganta borua na marumur 19 taon mandok, “Gabe mangiburu do au molo huida marsonang-sonang akka halak di akhir pekan, hape au sai monggop do di jabu.”

14. Songon dia poda na disurat di 1 Petrus 3:8 mangurupi hita asa marbisuk mamakke media sosial?

¹⁴ Tottu adong do laba na denggan sian media sosial. Misalna, gabe boi ma hita marsaor raphon keluarga dohot akka donganta. Alai molo taparrohahon adong do piga-piga halak na mambahen komentar, poto dohot video asa lomo roha ni halak mangida nasida. Sian na dibahen nasida i, hira na didok nasida ma, “Bereng hamu ma au!” Adong do muse na mambahen komentar na kasar dohot na rorang di poto ni nasida manang di poto ni halak na asing. Dijujui do halak Kristen asa marserep ni roha jala patuduhon holong. Jadi dang cocok molo songon i caratta mamakke media sosial.​—Jaha 1 Petrus 3:8.

15. Songon dia Bibel mangurupi hita asa unang manganggarhon diritta sandiri?

¹⁵ Molo dipakke hamu media sosial, sukkun ma dirimuna, ‘Sian komentar, poto, dohot video na hubahen, gabe diida halak do na ginjang rohakku? Gabe mangiburu do akka halak tu au?’ Didok do di Bibel, “Sude na adong di portibi on, i ma hisap-hisap ni daging, hisap-hisap ni mata dohot manganggarhon na  adong di ibana, ndang sian Ama i anggo i alai sian portibi on do.” (1 Joh. 2:16) Di sada terjemahan ni Bibel, hata “manganggarhon na adong di ibana” diterjemahon gabe “lomo rohana asa gabe na urrikkot”. Halak Kristen dang makkilala urrikkot dirina sian na asing. Diihutton nasida do poda di Bibel na mandok, “Tapasiding ma parange ginjang ni roha, ndang olo talu, dohot masilatean.” (Gal. 5:26) Molo serep rohatta, dang olo hita maniru akka halak di portibi on na sai manganggarhon dirina sandiri.

16. Boasa ikkon tapasiding ginjang ni roha?

¹⁶ Ikkon marsitutu do hita asa toktong marserep ni roha. Alana halak na so “marbisuk” do na ginjang rohana. (Rom 12:3) Halak na ginjang rohana, lomo rohana marbadai jala marpikkir urrikkot do dirina sian na asing. Jotjot do pamikkirion dohot parniulaon ni nasida i mambahen susa dirina sandiri dohot halak na asing. Molo dang muba halak sisongon i, boi do gabe sega pikkiran ni nasida i dibahen Sibolis. (2 Kor. 4:4; 11:3) Alai halak na serep rohana marbisuk do. Seimbang do carana mangida dirina sandiri, jala diattusi ibana do dumenggan do halak na asing sian ibana. (Plp. 2:3) Jala diboto ibana “dihasogohon Debata do ginjang ni roha, alai dipatuduhon Ibana do asi ni rohana na mansai balga i tu halak na serep marroha”. (1 Ptr. 5:5) Halak na marbisuk dang olo mambahen Jahowa gabe musuna.

17. Aha do na ikkon taulahon asa toktong serep rohatta?

¹⁷ Asa toktong serep rohatta, ikkon taulahon do poda di Bibel na mandok asa tatanggalhon pangalaho na leleng dohot akka na taulahon najolo. Jala tapakke ma pangalaho na imbaru. Dang mura mangulahon on. Ikkon marsiajar do hita sian Jesus, jala ikkon marsitutu do hita lao maniru ibana. (Kol. 3:9, 10; 1 Ptr. 2:21) Alai godang do laba na boi tadapot molo taulahon i. Molo serep rohatta, lam marlas ni roha ma keluargatta, lam marsada ma hita dohot akka dongan di huria, jala gabe taboto ma songon dia cara na denggan lao mamakke media sosial. Na urrikkot, tadapot ma pasu-pasu sian Jahowa, jala las rohana mangida hita.