1. Nasehat kai si lit bas Pilipi 2:3, janah kai manpaatna adi sidalanken nasehat e?

PERBAN Jahwe ngenca si meteh kai si mehulina man banta, patuh kita man baNa alu meteruk ukur. (Ep. 4:22-24) Adi meteruk ukur kita, pentingen siakap sura-sura Jahwe ras kalak si deban asangken dirita sendiri. Asilna, banci kita rembak ras Jahwe bage pe turang senina.​—Baca Pilipi 2:3.

2. Kai si banci sisimpulken arah kata-kata Paulus, janah kai kari sibahas bas artikel enda?

² Bas doni enda, enterem kel kalak si meganjang rukur ras si mentingken bana. Adi la kita hati-hati, banci kita bagi kalak e. * Bas abad pertama pe, banci saja kalak Kristen pernah ipengaruhi cara rukur si bage, emaka itulis Paulus surat man kalak Roma, nina, “Kukataken man kena kerina gelah ula iakap kena ganjangen diri kena asangken si patutna, tapi banlah perukuren kerna diri kena uga litna.” (Rom. 12:3) Arah kata-kata Paulus teridah maka perlu ka nge siperdiateken dirita. Tapi, perlu kita seimbang i bas ngenen dirita. Maksudna, la siakap penting banta. Emaka perlu kita meteruk ukur. Bas artikel enda sibahas kari telu bagin uga sipat meteruk ukur nampati kita gelah ula meganjang rukur. Bas kai saja e? (1) Bas perjabun, (2) tanggung jawap bas organisasi Jahwe, ras (3) bas nggunaken media sosial.

3. Engkai maka lit masalah i bas perjabun, janah menurut piga-piga kalak kai jalan keluarna?

³ Ate Jahwe ermeriah ukur min perbulangen ras ndehara  i bas perjabunna. Perban la sempurna, banci saja lit si erban kalak e la sicocoken. Bagi si itulis Paulus maka kalak si erjabu ngenanami melala kesusahen. (1 Kor. 7:28) Lit ka piga-piga perbulangen ras ndehara rusur kel rubati, emaka iakapna labo min ndai arusna kalak e erjabu. Adi perukuren kalak e bali bagi kalak si lit i doni enda, mis iakapna maka cerai me jalan keluar si mehulina. Kalak si bage ngukurken keriahen ukurna saja.

4. Cara rukur si uga nge si arus sipedauh?

⁴ Ula siakap maka perjabunta enggo gagal. Menurut Pustaka, sada ngenca alasen si banci erban kalak cerai, eme erlua-lua. (Mat. 5:32) Emaka adi lit masalah bas perjabunta, ula kita meganjang rukur janah ula bagenda carata rukur: ‘La ermediate teman geluhku man bangku. La kudat kekelengen bagi si kuarapken. Kuakap ntah sikapen nge kari geluhku adi aku ras kalak si deban.’ Adi bage carata rukur, dirita saja ngenca siukuri labo teman geluhta. Perukuren doni enda ngatakenca, “Ikutken kai nina pusuhndu janah lakoken kai si erban kam ermeriah ukur.” Cara rukur si bage si erbanca melala kalak cerai. Tapi nina Pustaka, “Perdiatekenlah kepentingen kalak si deban labo kepentingenndu saja.” (Pil. 2:4) Sura-sura Jahwe ula min kam cerai. (Mat. 19:6) Ate Jahwe pentingen min siakap peratenNa asangken sura-surata sendiri.

5. Menurut Epesus 5:33, uga arusna perbahanen perbulangen ras ndehara?

⁵ Perbulangen ras ndehara arus sikeleng-kelengen bage pe siergan. (Baca Epesus 5:33.) Iajari Pustaka kita gelah buen min kita mere asangken ngalo. (Perb. 20:35) Sipat kai si banci nampati perbulangen ras ndehara gelah sikeleng-kelengen bage pe siergan? Meteruk ukur. Perbulangen ras  ndehara si meteruk ukur labo kepentingenna saja si ukurina tapi kepentingen teman geluhna.​—1 Kor. 10:24.

6. Kai si banci ipelajarindu arah Steven ras Stephanie?

⁶ Sipat meteruk ukur enggo nampati melala kalak Kristen gelah ertambahna keriahen ukur bas perjabunna. Contohna, nina sekalak perbulangen si gelarna Steven, “Ndehara ras perbulangen arus lalap kerja sama, khususna sanga lit masalah. Asangken ngukuri ‘kai si mehulina man bangku,’ ukurilah ‘kai si mehulina man kami.’” Bage ka nge pendapat ndeharana si gelarna Stephanie, nina, “Labo lit si ngasup tading ras kalak si lalap atena rubati. Adi lit masalah, darami kami lebe kai si erban masalah e terjadi. Kenca si e totoken kami, darami kami nasehat Pustaka si cocok, janah cakapken kami. La kami rubati tapi darami kami jalan keluarna.” Perbulangen ras ndehara banci tuhu-tuhu ermeriah ukur adi pentingen iakapna teman geluhna.

7. Kai nge si arus ilakoken sekalak dilaki adi ialokenna sada tugas?

⁷ Kai pe tugasta i bas ngelayani Jahwe, e sada kehamaten man banta. (Msm. 27:4; 84:11) Mehuli kel adi lit sekalak dilaki si nggit ngelakoken terbuen i bas organisasi Jahwe. Bagi si ikataken Pustaka, “Adi iusahaken sekalak dilaki jadi pengawas, dahin si mehuli kap si isurakenna e.” (1 Tim. 3:1) Tapi, adi ialokenna sada tugas, ula e erbanca enggo penting iakapna bana. (Luk. 17:7-10) Tujunna arus nampati kalak si deban alu meteruk ukur.​—2 Kor. 12:15.

8. Kai si banci sipelajari arah Diotrepes, Ussia, ras Absalom?

⁸ Melala contoh bas Pustaka si nceritaken kerna kalak si ngukuri dirina saja. Misalna, Diotrepes si la meteruk ukur, iusahakenna “jadi nomor sada” bas runggun. (3 Joh. 9) Perban meganjang rukur, ilakoken Ussia pendahin si labo itugasken Jahwe man bana. (2 Kro. 26:16-21) Perban ersura-sura Absalom jadi raja, alu cara si licik iusahakenna gelah ndatken dukungen arah rakyat. (2 Sam. 15:2-6) Arah contoh-contoh bas Pustaka ndai, jelas teridah maka la senang Jahwe man kalak si ndarami kemulian man dirina saja. (Kua. 25:27) Dungna, kalak si meganjang rukur ras si ipuji atena lalap, pasti kena masalah.​—Kua. 16:18.

9. Contoh kai si ibereken Jesus?

⁹ Beda kel Jesus ras contoh-contoh si ndai, perban “aminna pe ia bali bagi Dibata, la pernah turah i bas ukurna guna muat keduduken Dibata ntah pe gelah seri ras Dibata.” (Pil. 2:6) Aminna pe Jesus nomor dua si hebatna bas alam semesta kenca Jahwe, la pernah penting iakapna bana. Nina man murid-muridna, “Ise si perbahanenna selaku kalak si kitikna i bas kena kerina, ia me si mbelinna.” (Luk. 9:48) Sada pasu-pasu kel banci ngelayani ras perintis, sinampati runggun, pertua, bage pe ras pertua keliling si meteruk ukur bali bagi Jesus! Adi meteruk ukur kita, kita jadi kalak si perkeleng. Janah nina Jesus maka ciri umat Dibata eme sikeleng-kelengen.​—Joh. 13:35.

10. Kai nge si ilakokenndu adi lit masalah bas runggun janah akapndu la idungi masalah e alu mehuli?

¹⁰ Kai nge si ilakokenndu adi lit masalah bas runggun si iakapndu la idungi alu cara si mehuli? Asangken jungut-jungut, meteruk ukurlah kam alu ndukung turang senina si muat pinpinen bas runggun. (Heb. 13:17) Gelah menukah kapndu meteruk  ukur, sungkunilah bandu, ‘Serius kel nge masalah e maka arus idungi? Gundari nge waktu si pas guna ndungisa? Baginku nge ndungi masalah e? Situhuna kai nge tujunku? Kuusahaken nge gelah runggun tetap ersada, ntah kuusahaken gelah penting iakap kalak aku?’

11. Menurut Epesus 4:2, 3, kai nge asilna adi silayani Jahwe alu meteruk ukur?

¹¹ Aminna pe lit keterampilenta tapi adi la kita meteruk ukur labo lit ertina. Janah amin pe banci silakoken pendahin alu cara si meter janah tepat, tapi adi la kita ersada labo ka lit ertina. Sebap si pentingna iakap Jahwe eme meteruk ukur ras persadan. Emaka, alu meteruk ukur teruslah lakoken si mehulina bas ngelayani Jahwe. Alu bage, iusahakenndu gelah runggun tetap ersada. (Baca Epesus 4:2, 3.) Kai saja si banci silakoken guna mbuktiken maka kita meteruk ukur? Erberitalah asa ngasupndu. Daramilah cara gelah banci isampatindu kalak si deban. Nggitlah mere man kerina kalak, termasuk man kalak si la lit tanggung jawapna bas runggun. (Mat. 6:1-4; Luk. 14:12-14) Tetaplah kam meteruk ukur sanga kerja sama ras turang senina. Alu bage, idah kalak e me kari maka labo ngenca lit keterampilenndu, tapi idahna ka maka kam kalak si meteruk ukur.

12. Menurut Pustaka perlu nge lit temanta? Jelasken.

¹² Ate Jahwe lit min waktuta man teman-temanta bage pe man keluargata. (Msm. 133:1) Jesus pe melala temanna. (Joh. 15:15) I bas Pustaka pe ikataken maka erguna kel adi lit temanta situhu-tuhu.  (Kua. 17:17; 18:24) Janah ikataken Pustaka ka kai bahayana adi kita nerapken bana. (Kua. 18:1) Enterem kalak erpengakap maka media sosial banci nampati kalak e ndatken melala teman janah lanai akapna melungen. Tapi, arus ka kita hati-hati sanga nggunaken media sosial.

13. Engkai maka kalak si nggunaken media sosial banci dungna melungen iakapna janah depresi?

¹³ Menurut piga-piga penelitin, adi lit kalak si melala nggunaken waktuna ngenen foto ras komentar kalak si deban i media sosial, dungna banci saja melungen iakapna janah depresi ia. Engkai? Salah sada alasenna perban foto si rusur itama kalak i media sosial eme foto-foto si mehulina. Ipilih kalak si nama foto e foto-foto si mehulina kerna dirina, teman temanna, bage pe ingan si mejile si idahina. Emaka, adi ibandingken kalak si ngenen foto-foto e ndai dirina ras si namaken foto e, dungna lanai iakapna ia jadi kai pe. Nina sekalak turang seninata si umurna 19 tahun, “Sanga kuidah kalak gawah-gawah bas wari Sabtu ntah pe Minggu, janah aku i rumah saja ngenca dungna turah me ateku cian.”

14. Uga nasehat bas 1 Petrus 3:8 nampati kita gelah pentar nggunaken media sosial?

¹⁴ Banci sigunaken media sosial alu cara si mehuli, contohna, banci kita ngerana-ngerana ras keluarga bage pe temanta. Banci nge perdiatekenndu maka kalak si namaken foto, video, bage pe komentar-komentar i media sosial merhat gelah ipuji-puji kalak? Tempa-tempa bagenda nina, “Nen min aku.” Piga-piga lit ka si namaken komentar si kasar janah la sopan bas foto-fotona bage pe bas foto-foto kalak si deban. Beda kel e ras sipat meteruk ukur bage pe sipat sepenggejapen si arus ipebelin kalak Kristen.​—Baca 1 Petrus 3:8.

15. Nasehat kai saja si lit i bas Pustaka si banci nampati kita gelah la siakap penting kel banta?

¹⁵ Adi kam nggunaken media sosial, sungkunilah bandu, ‘Arah komentar, foto, ntah pe video si kutama bas media sosial, banci nge e erban kalak erpengakap maka aku kalak si meganjang rukur? Banci  nge e erban kalak cian?’ Nina Pustaka, “Kerina si lit bas doni enda, eme sura-sura daging, sura-sura mata, bage pe sura-sura i bas ncidahken erta. Si enda kerina labo rehna i bas Bapak nari tapi i bas doni nari.” (1 Joh. 2:16) Salah sada terjemahen Pustaka nerjemahken “sura-sura i bas ncidahken erta” jadi “kalak si ncidahken kehebatenna.” Selaku kalak Kristen ula min siakap penting banta ntah pe gelah ipuji-puji kalak ateta. Ikutken kalak e nasehat Pustaka si ngataken, “Ula min kita sombong, ersaing, ntah pe sician-cianen.” (Gal. 5:26) Adi kita meteruk ukur la kita nggit bagi kalak si lit i doni enda si meganjang rukur janah penting kel iakapna bana.

16. Engkai maka la banci kita meganjang rukur?

¹⁶ Perlu sipebelin sipat meteruk ukur perban kalak si meganjang rukur la ibanna perukuren kerna dirina “uga litna.” (Rom. 12:3) Kalak si meganjang rukur meriah akapna sijawapen janah mentingken bana. Cara rukur bage pe perbahanen kalak si meganjang rukur, rusur ngerugiken dirina bage pe kalak si deban. Adi la iubah kalak e carana rukur, dungna perukurenna banci icedai ras ipepentang Setan. (2 Kor. 4:4; 11:3) Tapi, kalak si meteruk ukur ibanna perukuren kerna dirina uga litna. Sadar ia maka buen si banci ilakoken kalak si deban asangken dirina. (Pil. 2:3) Janah itehna maka “kalak si meganjang rukur itulak Dibata, tapi man kalak si meteruk ukur iberekenNa lias ateNa si mbelin.” (1 Pet. 5:5) Kalak si meteruk ukur la atena itulak Dibata.

17. Kai si arus silakoken gelah tetap meteruk ukur?

¹⁷ Gelah tetap meteruk ukur, arus sidalanken pedah Pustaka enda, “tangtangilah sipat-sipat si ndekah ras kerina perbahanenna, janah pakelah sipat-sipat si mbaru.” Memang e la menukah. Perlu sipelajari kerna Jesus, janah siusahaken asa ngasupta ngusih ia. (Kol. 3:9, 10; 1 Pet. 2:21) Adi silakoken e mbelin kel gunana man banta. Adi sipebelin sipat meteruk ukur, reh tambahna me keriahen ukur bas keluargata, siban runggun tetap ersada, janah pentar kita i bas nggunaken media sosial. Si pentingna ngena ate Jahwe kita janah ipasu-pasuNa kita.