1. Ka adundehani líchugunbei Filipuna 2:3 woun, ani kaba wibiha anhein wíchiga lidan wabagari?

WAGÍA lubúeingu Heowá ǘnabugutiwa ani gaganbaditiwa lun lugumadin, lugundun gunfuranda wamuti subudi lumuti lan le buídutimabei woun súnwandan (Efe. 4:22-24). Adügati ǘnabuguni lun wíchuguni lugundan Heowá lubaragiñe le wabusenrubei luma lun buidulá wanügüniña amu gürigia wawéi guánarügü. Ligía buidu lubéi wamadagua luma Heowá luma hama wíbirigu (aliiha huméi Filipuna 2:3).

2. a) Ka uagu líchiga Pábulu fe? b) Kaba wakutiha lidan arütíkulu le?

² Ligíati, ánhawa móunigi, gayaraati labadülerun igaburi le hawagubei gürigia ha lábugiñebei lubafu mafia wawagu, igaburi kei burí pantaü luma wasaminarun wawougua. * Genegeti dencha lan meha habagari kristiánugu ha lídanbaña furumiñeti sígulu, ligía meha líchugunbalin apostolu Pábulu adundehani le houn lílana damuriguaü ha Rómabaña: “Ariñagatina hun sun huguya, lun ua lan ni aban hídangiñe aritaguti luougua weiri sügǘ lau le lubeibei. Lubaragiñe lira, lunti lasubudiragun kada aban lungua, según afiñeni le ru laalibei Bungiu lun” (Rom. 12:3). Kei aubei warihei subudi lumuti meha Pábulu lunti lan wasaminarun wawougua. Lau sun lira, líderagun baadiwa ǘnabuguni lun masaminarun wama saragu wawougua. Lidan arütíkulu le, wakutihaba ǘrüwa katei le ñein lubéi líderagun baadiwa lan ǘnabuguni lun masaminarun wamá saragu wawougua: lidan wabagari keisi maríeitiña, lidan  dasi tidan lóundarun Heowá luma lidan páhina lánina hadügǘn umadagu.

3. a) Ka uagu kamani lubéi lun ñein lan turobuli lidan habagari maríeitiña? b) Ka hadügübei fiu kristiánugu maríeitiña dan le hagagibudagun luma turobuli le?

³ Busenti Heowá lun gunda hamá maríeitiña. Gama lumoun, kei sun lubéi wagía charatiwa, kamaniti ñein lan magundani. Ligía lariñagubei Pábulu, ha lan lúnbaña hamarieidun gaturobulibaña lan (1 Ko. 7:28). Añahein hádangiñe kristiánugu maríeitiña sanditiña súnwandan lan gaturobulin hamá hámagua, ani gayaraati hasaminarun madügǘntiña lan lun hawinwandun hámagua. Anhein ígiraguagüdaaña lubéi hougua lun lisaminan ubóu, hawouguounrügüba hasaminara ani hasaminaruba giñe le lan buídutimabei houn lun hígiragun.

4. Ka katei moun lumuti lun wasaminarun luagu?

⁴ Moun lumuti wasaminarun günringua lan wabagari keisi maríeitiña. Subudi wamuti ábanrügüñein lan lébuna ígiraguni tíchugubei Bíbülia, magíaguni (Mat. 5:32). Ligíati, dan le wagagibudagun luma turobuli le uágubei layanuha Pábulu, mígiraguagüda wamá woungua lun ladügün pantaü lun wálügüdagun woungua: “Ibiha numuti san le nemegeirubei lídangiñe maríei le? Resibi numuti san ínsiñeni le yuubei nun? Gúndaatimabadina hamuga san ánhana adarira amu gürigia?”. Ma luriban saminaü! Lariñaguba lichú aau le lánina ubóu woun lun wadügün gasu lau wasaminan luma lun wáluahani wagundan guánarügü, íbini wígiragun. Ánhañati ha ígiraguagüdübaña houngua lun lichú aau le ñǘbuinbei lúmagiñe Bungiu ‘mámarügü katei le buídubei houn háluaha, áluaha hamuti giñe le buídubei houn amu’ (Fili. 2:4). Busenti Heowá lun wóunigiruni wabagari keisi maríeitiña mama lun wagünrinchaguni (Mat. 19:6). Agurabati lun wasaminarun luagu le labusenrunbei woun, mama luagu le wabusenrubei.

5. Según le lariñagunbei Éfesuna 5:33, ida luba hóuseragun maríeitiña hámagua?

 ⁵ Lunti hóuseragun maríeitiña houngua lau ínsiñeni luma inebesei (aliiha huméi Éfesuna 5:33). Arufudahatu Bíbülia woun lúntima lan wasaminarun lun gíchigadi wamá sügǘ luéi weresibirun (Adü. 20:35). Lun gayara lan harufudun biángubei hagía ínsiñeni luma inebesei lunti ǘnabugu hamá. Líderagubaña katei le lun mámarügü lan hagundan guánarügü háluaha (1 Ko. 10:24).

6. Ka wafurendeirubei lídangiñe le lariñagubei Steven tuma Stephanie?

⁶ Seremei ǘnabuguni, saragu maríeitiña ha kristiánugu gúndaatimatiña. Kéiburi aban íbiri le gíribei Steven, ariñagati: “Ánhaña lídanñanu lubéi aban híderaguba hámagua, dántima le ñein lan turobuli. Lubaragiñe hasaminarun, ‘ka san buídutimabei nun?’, lunti hasaminarun ‘ka san buídutimabei woun?’”. Ligiaméme giñe tasaminarunbei Stephanie, to lani weiriou. Ariñagatu: “Úati ni aban gürigia busenti lawinwandun luma aban ágani. Dan le anihein lan magundani waganagua, áluahatiwa wasubudiruni ka lan lébunabei. Ábanti wafurieidun, áluaha wagía ariñahani ayanuha wagía wámagua. Áfaaguatiwa lun waranseruni turobuli, mama lun wageindagun wámagua”. Anhein maweirin wasaminarun wawougua gúndaabei wabagari keisi maríeitiña.

7. Ka igaburi lunbei gagaburi lani aban íbiri dan le leresibirun aban dasi?

⁷ Aban lubuidun chansi woun lun weseriwidun lun Heowá lau sun wayaraati (Sal. 27:4; 84:10). Buiti labusenrun aban íbiri laganwoundagüdüni leseriwidun tidan lóundarun Heowá. Ariñagatu Bíbülia: “Anhein abusenra aban gürigia lun alidihatibei lan, aban wadagimanu buiti labusenrubei ladügün” (1 Tim. 3:1). Anhein eresibira aban dasi, moun lumuti lanaagun lungua (Luk. 17:7-10). Le lunbei gabaroun lani lun leseriwidun houn amu lau ǘnabuguni (2 Ko. 12:15).

8. Ka wafurendeirubei lídangiñe ligaburi Diótürefesi, Osiasi luma Abüsalón?

⁸ Ayanuhatu Bíbülia hawagu gürigia ha asandiragubaña houngua súdini hamá. Kei burí Diótürefesi, úati meha ǘnabugu lan ani busenti meha lun “ábuti lan” lidan damuriguaü (3 Huan 9). Arufuda lumuti meha giñe Osiasi panta lan dan le ladügübei aban wadagimanu le úabei yu lan lun (2 Kro. 26:16-21). Lau ibibuni, áfaaguati Abüsalón lun lagañeiruni hínsiñehabu gürigia ladüga busén lan meha lun urúei lan (2 Sam. 15:2-6). Kei burí larufuduni abahüdaguni tídangiñeti Bíbülia burí le, magundanti Heowá hau gürigia ha áluahabaña uéiriguni houngua (Ari. 25:27). Ha ígiraguagüdübaña houngua lun pantaü luma memenihabuni wuribati hagumuchun (Ari. 16:18).

9. Ka larufudahabei Hesusu woun?

⁹ Amu le larufudahabei Hesusu woun. Ariñagatu Bíbülia:“Lau sun meha lenege lan Bungiu, masaminarunti lagidaruni lubara Bungiu luéi, lun ítara lan kei ligía.” (Fili. 2:6 TNM). Hesusu ligía gürigia gabafutimabei lárigiñe Heowá. Íbini ítara, masaminarunti saragu luougua. Aban lariñagun houn lani disipulugu: “Le lubeiti ǘnabugutimabei hidan, ligía wéirigutimabei” (Luk. 9:48). Ma lubuidun leseriwidúniwa lidan aban hama prekursorugu, ídehatiña lidan damuriguaü, wéiyaaña lidan afiñeni hama óunigirutiña sirkuitu ha áyeihabalin ǘnabugu lan Hesusu. Dan le ǘnabugu wamá wagía le lubúeingu Heowá, arufuda wamuti ínsiñeni le adügübei lun hasubudirúniwa lumutuniña Heowá (Huan 13:35).

10. Ka lunbei wadügüni anhein genege lubéi woun metenirúniwa lan lun turobuli le lídanbei damuriguaü lau lubudubu?

¹⁰ Ka lunbei wadügüni dan le genege lan woun anihein lan turobuli lidan damuriguaü ani saminatiwa mama lan laransehóuña lau lubudubu? Lubaragiñe wekeharun, ǘnabugu wamá ani  íderagua wamaña ha adundehabaliwa (Ebu. 13:17). Kaba íderaguawa ibihei? Álügüdagua wamá woungua: “Inarüni san hanarime lan lueirin turobuli le narihibei? Anhein mégeiwa lubéi lun laransehóuniwa, anihán san dan lun laransehóun? Nun san yu lan lun naransehani? Le linarün katei, ka san náluahabei, úarani san lun damuriguaü náluahabei odi uéiriguni núniwagua?”

11. Según Éfesuna 4:2, 3, kaba asusereda ánhawa ǘnabugu lidan weseriwidun lun Heowá?

¹¹ Súdinitimati ǘnabuguni lun Heowá sügǘ lau iyarani ani súdinitimati giñe lun lidan wamá aban lun sügǘ lau wáfaragun woungua lun wadügün somu katei buidu. Ligíati, áfaagua wamá lun ǘnabugu wamá lidan weseriwidun lun Heowá. Ítara luba wadügün lun ñein lan úarani lidan damuriguaü (aliiha huméi Éfesuna 4:2, 3). Redei wamá beresegu lidan apurichihani. Seriwi wamá houn amu lau wadügün katei buiti hawagu. Resibi wamaña sun wíbirigu wábiñe, mámarügü ha lídanbaña aban dasi espechaliti (Mat. 6:1-4; Luk. 14:12-14). Ánhawa adügei sun le, mámarügübei lun le gayara wabéi adüga hetenira wíbirigu, heteniruba giñe lun ǘnabugu wamá.

12. Ka tariñagubei Bíbülia luagu gamadagu wamá?

¹² Busenti Heowá lun buidu lan wásügürüni hama waduheñu luma hama wamadagu (Sal. 133:1). Gamadaguati meha Hesusu ha buítiña (Huan 15:15). Gama lumoun, ariñagatu Bíbülia buidu lan lun gamadagu lan gürigia umadagu inarünitiña (Ari. 17:17; 18:24). Ariñagatu giñe woun moun lumuti lan werederun wábuguarügü (Ari. 18:1). Afiñetiña saragu gürigia hu lan páhina lánina hadügǘn umadagu lun wadügün saragu umadagu luma lun masandiragun wamá woungua wábuguarügü. Gama lumoun, anhein wayusura páhina le, mosu wóunigiragun woungua.

13. Ka uagu añahein lubéi gürigia ha ayusurubalin páhina lánina hadügǘn umadagu sandiguatiña houngua hábuguarügüñanu lan ani lau saragu íruni?

 ¹³ Según fiu aturiahani le adügǘbei, gürigia ha ásügürübaña saragu dan aliihei ábürühani tuma burí iyawaü to afidirúboun lidan páhina lánina hadügǘn umadagu, aba burí hasandiragun houngua hábuguarügüñanu lan ábanti ladagarun saragu íruni hawagu. Ka uagu? Ladüga hiibe-agei gürigia aba burí hafidirun lidan burí páhina le, iyawaü to burí arufudubalin katei le súdinitimabei le asuseredubei lidan habagari, kei burí: tubuidun-agei hayawa, tubuidun-agei hayawa hamadagu luma burí fulasu le buídutimabei le habisidahabei. Ha burí arihubarun iyawaü burí to, gayaraati lachülürün dan lun hasaminarun ua lan ni kata espechaliti lidan habagari ani mabuidun lan habagari. Ariñagatu aban íbiri to 19 irumu tau: “Aba nasafaragun lau narihin buidu lan hásügürüni amu dandu samudi luma dimaasu lidan anaha lan múnada madügünga ni kata”.

14. Ida luba líderaguniwa 1 Féduru 3:8 lun buidu lan wayusuruni páhina lánina hadügǘn umadagu?

¹⁴ Chóuruti gayara lan layusurúniwa páhina lánina hadügǘn umadagu buidu, kei hénpulu lun wayanuha hama waduheñu luma hama wamadagu. Lau sun lira, rúhadiwa san fe liibe-agei lan le hamudeiragüdünbei gürigia lidoun páhina le, lúnrügü lan haweiridagüdünu hanigi amu? Genegeti le lan habusenrubei lúnrügü taweiridun hanigi gürigia hau. Añahein hádangiñe ábürühatiña dimurei rófuti luma bulagiadi tuagu hayawa o tuagu burí hayawa amu. Múaranti burí igaburi le luma burí igaburi le lunbei gani hamani kristiánugu, igaburi keisi ǘnabuguni luma gudemehabu (aliiha huméi 1 Féduru 3:8).

15. Ida liña tíderaguniwa Bíbülia lun madagarun lan burí igaburi lánina ubóu le wawagu?

¹⁵ Ánhawa ayusurei páhina lánina hadügǘn umadagu, álügüdagua wamá woungua: “Ida tiña san iyawaü luma bidéu le burí namudeiragüdünbei lidoun páhina burí le? Arihúati san kamá hamuga nabulofuhaña lan? Gayaraati san ladügün lun hagimugaru amu?”. Ariñagatu Bíbülia: “Lugundun úati ni kata lídangiñe katei le líchugubei ubóu ñǘbuinti lúmagiñe Bungiu; lúmagiñe guánarügü ubóu liabin. Ani anihán burí katei le líchugubei ubóu: Luriban hayumahan gürigia, háfaagun lun habihini katei le harihibei luma pantaü luagu irisini” (1 Huan 2:16). Ariñagati  aban sásaamu tuáguti Bíbülia luagu burí dimurei “háfaagun lun habihini katei le harihibei luma pantaü luagu irisini”, layanuhaña lan luagu “láfaagun gürigia lúntima súdini lan”. Wagía le kristiánugu, memegeiruntiwa lun taweiridun hanigi amu wau. Áfaaguarügütiwa lun wafalaruni adundehani le tídanbei Bíbülia: “Miñun lan wanaagun woungua; magüriahan wagíame gáganiguaü ni gimugaü waganagua” (Gal. 5:26). Ánhawa ǘnabugu madagarunbei burí igaburi lánina ubóu le wawagu.

16. Ka uagu mabusenrun wabéi lun panta wamá?

¹⁶ Lunti wáfaagun lun warufudun ǘnabuguni, lugundun ha pántabaña marufuduntiña lichú aau (Rom. 12:3). Ganigitiña lágieru ani íñuguti hanaagun houngua. Gama lumoun anihein dan adügati hagaburi luma ligaburi hasaminarun wuribani dandu hóuniwagua kei houn amu. Ánhaña masansirun hamá ligaburi hasaminan, ladourubei Satanási hasaminan gádeileime (2 Ko. 4:4; 11:3). Ánhañati gürigia ha ǘnabugutiña arufudatiña lichú aau. Subudi hamuti le gádanbaliña ani masaminaruntiña hawougua saragu, ani gunfuranda hamuti buídutima hamá amu hawéi lidan saragu igaburi (Fili. 2:3). Subudi hamuti giñe magundan lan “Bungiu hau ha barüguabaña houngua, gama lumoun íderagua lumutiña ha ǘnabugubaña” (1 Fe. 5:5). Ha arufudubaña lichú aau mabusenruntiña lun magundan lan Bungiu hau.

17. Ka lunbei wadügüni anhein busén wabéi lun ǘnabugumeme wamá?

¹⁷ Anhein busén wabéi lun ǘnabugumeme wamá, lunti wafalaruni adundehani le tariñagubei Bíbülia: “Kei ígira humaali lan binadu higaburi luma le burí meha hadügübei. Iserihali higaburi”. Mégeiti le saragu áfaaguni, ladüga mégeiwati lun waturiahani lani Hesusu hénpulu áfaagua wagíame lun wadügüni sun wayaraati lun wáyeihani (Kol. 3:9, 10; 1 Fe. 2:21). Gama lumoun buiti áfaaguni le. Ánhawa áfaagua lun ǘnabugu wamá, gúndaatimabaña waduheñu, ani sun lílana damuriguaü lídanbaña aban ani wasubudirubei ida luba lan wayusuruni páhina lánina hadügǘn umadagu. Ani le súdinitimabei lídangiñe sun katei, gúndaabei Heowá wau ani labinirubadiwa.