1. Cosa consejo ta dale el Filipo 2:3 y cosa el maga beneficio si aplica kita con ese?

HUMILDE kita ta obedece con el maga principio de Jehova cay sabe kita que sabe si Jehova si cosa el mas bueno para kanaton. (Ef. 4:22-24) Si humilde kita, hay pensa kita que mas importante el querrer de Jehova contra con el diaton querrer, y mas importante el otro que kanaton. Como resulta, hay tiene kita buen relacion con Jehova y con el diaton maga hermano y hermana.​—Le con el Filipo 2:3.

2. Cosa kita puede entende na cosa ya habla si apostol Pablo y cosa kita considera na este articulo?

² Pero si gendeh kita con cuidao, posible kanaton influencia el maga gente na mundo de Satanas quien maga orgulloso y canalla. * Posible, ya sucede se con el cuanto na primer siglo C.E., cay si apostol Pablo ya escribi con el maga de Roma: “Ta habla yo con todo y cada uno de ustedes: No ustedes man por demas na de ustedes paca-importante, sino tene un opinion justo acerca del de ustedes mismo [cuerpo].” (Roma 12:3) Puede kita entende na cosa ya habla si Pablo que gendeh malo pensa que importante kita. Pero si humilde kita, puede este ayuda para tiene kita balance mirada na diaton mismo cuerpo. Este articulo hay considera tres situacion donde puede kanaton ayuda el humildad para evita pensa que bien importante  kita. Este amo (1) na diaton matrimonio, (2) na diaton maga privilegio y (3) na diaton usada de social media.

3. Porque posible gendeh man entendijan el man maridable y cosa ta hace el otro si ta tiene sila maga problema?

³ Quierre si Jehova que queda alegre el maga man maridable. Pero cay maga imperfecto sila, posible que gendeh sila man uyun na cuanto cosas. Gane, ya escribi si Pablo que aquellos quien casa hay tiene maga problema. (1 Cor. 7:28) El cuanto ya puede realiza que pirmi ya lang sila tan peleajan pati el diila marido o mujer y ya pensa que baka gendeh lang gayot sila para na uno y otro. Si ya influencia kanila el mundo, hay pensa sila dayun que debe sila man divurcio. Hay sinti sila que el de con todo importante amo que queda sila alegre.

4. Cosa kita debe evita?

⁴ Debe kita evita queda gendeh contento na diaton matrimonio. Sabe kita que el solamente razon que ya permiti el Biblia para man divurcio amo el sexual imoralidad. (Mat. 5:32) Poreso, si ta enfrenta kita maga problema na diaton matrimonio, gendeh kita debe queda orgulloso y pregunta: ‘El diamon matrimonio ba ta puede dale con el de mio maga necesidad? Ta ricibi ba yo el amor que conviene para conmigo? Mas queda ba yo alegre na otro persona?’ Nota que ese maga pregunta tan focus na de tuyu mismo cuerpo. El mundo hay habla contigo que sigui con el de tuyu corazon y hace si cosa contigo ta hace alegre, maskin pa quierre decir de este que termina tu con el de ustedes matrimonio. El Biblia ta habla que “no [tu] busca el interes lang del [de tuyu] mismo, sino busca el interes del los demas.” (Fil. 2:4) Quierre si Jehova que esta tu casao y gendeh man divurcio. (Mat. 19:6) Quierre le  que pensa tu una con ele y gendeh con el de tuyu mismo cuerpo.

5. Asegun na Efeso 5:33, paquemodo debe trata el man maridable con uno y otro?

⁵ El marido y mujer debe tiene amor y respeto con uno y otro. (Le con el Efeso 5:33.) El Biblia ta enseña que debe mas quierre kita dale contra ricibi. (Act. 20:35) Cosa calidad el puede ayuda con el man maridable para dale mira amor y respeto? Este amo el humildad. El maga humilde marido y mujer gendeh ta pensa con el diila mismo bien sino del otro persona.​—1 Cor. 10:24.

6. Cosa tu ya aprende na cosa ya habla si Steven y Stephanie?

⁶ El humildad ya puede ayuda con el manada Cristiano man maridable para mas queda alegre na diila matrimonio. Por ejemplo, el un marido que si Steven ya habla: “Si team ustedes, hay pricura ustedes man ayudajan especialmente si tiene maga problema. En vez de pensa ‘cosa el mas bueno para conmigo?’ hay pensa tu ‘cosa el mas bueno para kanamon?’” El de suyu mujer, si Stephanie, ta sinti tambien igual ansina. “Nuay ni uno el quien quierre esta junto na de suyu contrario,” ele ya habla. “Si tiene maga problema, ta pricura kame sabe si cosa ya causa con ese. Despues, ta reza kame, tan research y tan cuento si paquemodo solva con ese. Ta pricura kame solva con el problema, gendeh man purpiajan.” Hay beneficia gayot el man maridable si gendeh sila pensa que mas importante sila.

7. Cosa debe el custumbre del un hermano si ya puede le ricibi privilegio?

⁷ Ta considera kita como un privilegio que sirvi con Jehova na maskin cosa manera que puede kita. (Sal. 27:4; 84:10) Si el un hermano conforme hace mas para na organizacion de Jehova, un buen cosa se. Gane, el Biblia ya habla: “Si quien quiere queda un Presidente del comunidad [o anciano] ta desea le un buen trabajo.” (1 Tim. 3:1) Pero, si puede le ricibi un assignment, gendeh le debe pensa que bien importante le. (Luc. 17:7-10) El de suyu goal amo que queda humilde y sirvi con otro.​—2 Cor. 12:15.

8. Cosa kita puede aprende na ejemplo de Diotrephes, Ozias y Absalom?

⁸ El Biblia ta contene maga ejemplo de maga gente quien ya pensa que bien importante sila. Si Diotrephes ya pricura “man pa alto” na congregacion. (3 Juan 9) Si Ozias orgulloso y ya pricura hace un trabajo que nuay con ele manda si Jehova. (2 Cron. 26:16-21) Quierre queda rey si Absalom poreso ya pretende le para suporta con ele el maga gente. (2 Sam. 15:2-6) El cosa kanila ya sucede ta dale mira que si Jehova gendeh alegre con el maga gente quien quierre que alaba kanila. (Prov. 25:27) Llega el tiempo, el orgullo y ambicion hay resulta lang na problema.​—Prov. 16:18.

9. Cosa el ejemplo que ya dale mira si Jesus?

⁹ Otro si Jesus con aquel maga orgulloso gente. El Biblia ya habla que “maskin el disuyo naturaleza divino, noay Ele queda asigurista na disuyo derecho para queda igual con Dios.” (Fil. 2:6) Maskin pa el autoridad de Jesus ika-dos con Jehova, nuay le pensa que bien importante le. Ya habla le con el de suyu maga dicipulo: “El mas menos entre con ustedes amo el mas importante.” (Luc. 9:48) Poreso, un bendicion gayot que sirvi junto con el maga pioneer, siervo ministerial, anciano y circuit overseer quien maga humilde igual con Jesus! El maga humilde siervo de Jehova ta dale mira amor con otro que amo el identificacion del organizacion del Dios.​—Juan 13:35.

10. Cosa tu debe hace si ta sinti tu que tiene maga problema na congregacion que nuay solva enbuenamente?

 ¹⁰ Paquemodo si dol tiene problema na congregacion y ta sinti tu que nuay con ese solva enbuenamente? En vez de reclama, puede tu dale mira humildad si suporta tu con aquellos quien ta guia. (Heb. 13:17) Para puede tu se hace, pregunta na de tuyu mismo cuerpo: ‘El maga problema que ta mira yo bien serioso ba que necesita corecta? Este ba el justo tiempo para corecta con ese? De mio ba responsibilidad que corecta con ese? Quierre ba gayot yo que tiene unidad o quierre lang yo hace sale que mas bueno yo?’

11. Asegun na Efeso 4:2, 3, cosa el maga resulta si ta sirvi kita con Jehova con humildad?

¹¹ Mas importante con Jehova el diaton humildad contra na diaton abilidad, y mas importante con ele que unido kita contra que ta puede kita hace enbuenamente con el un cosa. Poreso, hace el todo lo que puede para sirvi con Jehova con humildad. Si hace tu se, hay ayuda tu para tiene unidad na congregacion. (Le con el Efeso 4:2, 3.) Queda activo na ministerio. Busca maga manera para puede sirvi con otro y hace maga buen cosas para kanila. Queda hospitable con todo, incluido con aquellos nuay privilegio na congregacion. (Mat. 6:1-4; Luc. 14:12-14) Si humilde tu sirvi junto con el congregacion, el otro puede mira gendeh lang con el de tuyu abilidad sino pati con el de tuyu humildad.

12. Ta anima ba kanaton el Biblia que tiene maga amigo? Explica.

¹² Quierre si Jehova que alegre kita man junto con el diaton familia, amigo y amiga. (Sal. 133:1) Manada maga buen amigo y amiga  si Jesus. (Juan 15:15) El Biblia ta habla si cosa el maga beneficio si tiene kita maga deverasan amigo. (Prov. 17:17; 18:24) Y ta habla este que gendeh bueno que man solo-solo kita. (Prov. 18:1) Manada ta sinti que un manera el social media para tiene manada amigo y gendeh sinti triste. Pero, debe kita con cuidao si ta usa con este.

13. Porque posible queda triste y depress el cuanto quien ta usa social media?

¹³ Ya puede discubri que el maga gente quien ta dale grande tiempo para mira maga post na social media posible queda triste y depress. Porque? Un posible razon amo que tan post el maga gente na social media con el maga cosa que ya sucede na diila vida. Ta dale tambien sila mira diila maga letrato, diila maga amigo y maga bale lugar que ya anda sila. El un persona quien puede mira con ese maga letrato posible pensa que bien ordinario de suyu vida y boring pa gane. “Ya principia yo envidia cuando ya mira yo con el otro que bien alegre na weekend pero iyo solo-solo lang na casa,” ya admiti el un hermana que 19 año.

14. Paquemodo puede ayuda el consejo na 1 Pedro 3:8 si ta usa kita con el social media?

¹⁴ Siempre, puede kita usa con el social media na buen manera​—por ejemplo, si usa kita con este para comunica con el diaton familia y maga amigo. Pero, ya puede ba tu observa que el cuanto maga gente tan post na social media para alaba el otro kanila? “Mira conmigo”​—dol amo se el mensaje que quierre sila habla. El cuanto ta usa pa gane maga mal palabra si tan comment na diila maga letrato o del otro. Contra este na cosa ta anima con el maga Cristiano que queda humilde y tiene empatia.​—Le con el 1 Pedro 3:8.

15. Paquemodo puede ayuda kanaton el Biblia para evita pensa que bien importante kita?

¹⁵ Si usa tu con el social media, pregunta con el de tuyu mismo cuerpo: ‘Posible ba que el maga comment, letrato y video que yan post yo dale mira con otro que tan hambug yo? Posible ba man celos el otro conmigo?’ El Biblia ta habla: “Todo el maga cosa-cosa aqui na mundo​—el maga mal deseo del cuerpo, el maga mal deseo del ojos y el orgullo del vida—​gendeh ta sale con el Tata sino con el mundo.”  (1 Juan 2:16) El un version del Biblia yan translate con el frase “el orgullo del vida” como “quierre man pa-importante.” El maga Cristiano gendeh debe sinti que importante sila. Ta sigui sila con el consejo del Biblia: “No kita busca el honor que no sirvi nada y no kita tenta ni man imvidia con uno y otro.” (Gal. 5:26) Si humilde kita, gendeh kita queda igual con el maga orgulloso gente na mundo quien quierre que mira kanila el otro como bien importante.

16. Porque kita debe evita con el orgullo?

¹⁶ Necesita kita queda humilde cay el maga orgulloso nuay justo pensamiento. (Roma 12:3) Arogante el maga orgulloso gente y ta causa sila peleajan. El diila pensamiento y accion ta causa kanila para hace sinti duele con el diila mismo cuerpo y con otro. Si gendeh sila cambia si paquemodo sila ta pensa, si Satanas hay influencia con el diila maga pensamiento. (2 Cor. 4:4; 11:3) Pero el un humilde persona tiene justo pensamiento. Tiene le balance mirada na de suyu mismo cuerpo y sabe que el otro mas bueno con ele na cuanto cosas. (Fil. 2:3) Sabe tambien le que “el Dios gendeh ta acepta con el maga orgulloso, pero ta dale su gracia con el maga humilde.” (1 Ped. 5:5) Aquellos quien tiene justo pensamiento no quierre que queda enemigo diila si Jehova.

17. Cosa kita debe hace para esta humilde?

¹⁷ Para esta humilde, debe kita aplica con el consejo del Biblia que ‘quita el camisa del diaton daan naturaleza, junto con el disuyo maga custumbre, y visti el camisa del nuevo naturaleza.’ Necesita se grande esfuerzo. Necesita kita estudia con el ejemplo de Jesus y pricura imita con ele. (Col. 3:9, 10; 1 Ped. 2:21) Si hace kita se, hay beneficia gayot kita. Si queda kita humilde, mas queda alegre el diaton familia, hay ayuda kita tiene unidad na congregacion y hay sabe kita si paquemodo evita usa con el social media na gendeh buen manera. Y mas pa na todo, hay tiene kita el bendicion y favor de Jehova.