1. Ninga munlogela Filipi 2:3, ovyeviha onnittukulela dhavi okana mandano na Akristu akwihu?

IYO NINOWIWELELA magano a Yehova na ovyeviha, sabwani ninoziwa wi Yehova ddunnona ennikalela. (Ef. 4:22-24) Nigakana ekalelo ya ovyeviha, ninele ononelamo wi dhofuna dha Yehova sattima opitta dhehu vina ninononelamo wi attu ena ahikana tttima empitta yehu. Merelo aba anonittukulela okana mandano na Yehova vina na Akristu akwihu.—Kengesa Filipi 2:3.

2. Txini yanonelamo murumiwi Paulo, vina mipaddi gani dhinalogihu mwari mwa mutoma obu?

² Nigahikale txengewa, ninoravihiwa yeddelo ya attu a elabo ejino ya Satana, adhaleliwe ovittukulela na ovittittimiha. * Enoneya ninga Akristu a vyaka zana dhoroma N.K. ahikana yeddelo eji, nona murumiwi Paulo alebela akadda Roma mazu awi: “Miyo na guru dha mahala avahiwemi, ddinologa na mmodha-mmodha wenyu wi ahivyonena onddimuwa opitha eliye, aziwe ovipima.” (Rom. 12:3) Paulo wanziwa wi iyo ninofwanyela oviriha. Mbwenye ovyeviha onele oniwodhiha ovipemelela. Mutoma obu onele ologa mpaddi miraru dhinfwanyeelihu weddana ovyeviha wi nirabele ovizuzumeletxa nanya. Mpaddidha sisi (1) vamuralani, (2) nigattomeliwa mabasa mmulogoni, vina (3) nigalabaga na vipano dha mwinterinetini.

3. Txini entatamuletxa makani vamatteloni, nanda ejoya egapadduwa ena anubuwela dhavi?

³ Yehova witile murala wi okale niparha na omwagalalihana muteli na muteliwi. Mwaha wa atelaniya okala attu ohakwana, anofanyaga makattamiho ohijedheleya. Jijuwene emuttukulele Paulo oleba wi atelani anojeedhela ogumanana makattamiho vamuralani vawa. (1 Kor. 7:28) Akalawo atelani ena ankaletxa owanavi, awene anofiyedhaga wubuwela wi kafwanyela otelana. Akala atelani aba anoravihiwa dhubuwelo dha mwilaboni, anodha wubuwela wi omwalana onogwadda makani awa. Dhayene, muttu-muttu agankana dhubuwelo dhawi, kokala-wene meka.

4. Txini enfwanyelihu orabela?

⁴ Iyo ninofwanyela orabela yubuwelo yawi, miyo kadditelile obe kadditeliwe deretu. Ninoziwa magano anloga Bibilia awi, attu ammwalana vagapadduwa mararuwo bahi. (Mt. 5:32) Vagapadduwa makattamiho ninga abale alogile Paulo, kaninfuna wi ovittukulela onikosihe mavuzo aba: ‘Matelo aba anowakwaniha dhofuna dhaga dhotene? Miyo ddinoweddihiwa n’okwela ninga mwafunelimi? Koddi ddigamutamela muttu mwinagu, kaddinafwanye wagalala?’ Wone wi mwari mwa mavuzo aba mukala ovittukulela. Ononelamo wa mwilaboni onodha wuttukulela okana yubuwelo ya wira endha mmurimani mwawo, enoniwe wi enela wuhagalaliha, masiki oziwaga wila vanela okala ngovi ya ogomiha matelo awo. Ononelamo wa wirimu ononaddela wi muthu-muthu “ahizuzumelage yayeví, atabuwelege vina dha akwaye.” (Fil. 2:4) Yehova onfuna wila mweddihane pama vamuralani venyu wi muralaya onamwalamwadheye. (Mt. 19:6) Iyene onfuna wi weyo omuzuzumele mwadhiyo obe mamuno, ottiya ovizuzumela weyo wamwinya.

5. Ninga munlogela Éfeso 5:33 atelani anfwanyela weddihana dhavi?

 ⁵ Mulobwana na mwadhiye anofwanyela weddihagana na okwela vina nriho. (Kengesa Éfeso 5:33.) Bibilia ononisunziha wila jofuneya ozuzumela ovaha ottiya ovahiwa. (Mer. 20:35) Yeddelo gani enakamiyedhe atelani wi muttu-muttu akane ekalelo yomukwela vina omuriha mukwaye? Yeddeloya ja ovyeviha. Ateli na atelani anvyeviha, kanivizuzumela anya, ‘muttu-muttu onomuzuzumela mukwaye.’—1 Kor. 10:24.

6. Mazu alogile Steven na Estefania, anusunziha eni?

⁶ Ovyeviha onowakamihedhaga Akristu enjene ohagalala vamateloni vawa. Ninga motagiha, muteli dhahi onkuweliwa Steven ohiloga: “Akala nyuwo munokala ninga nikuru enowodheya olaba vamodha ttabwa-ttabwa vagakala makattamiho. Kavanakale yubuwelo yawi, ‘txini enddifwanyelela?’ Enakosigiwe ja wubuwela dhahi; txini enfwanyelihu okosa?’” Mwadhiye Estafania, ohiloga mazu oladdana; iyene bela, “Kawo onziveliwa okala na muttu ohiniwa dhakwaye. Vagapadduwa maguddulano iyo ninozuzumela oziwa mwahaya. Nigamala ninolobela, ninopepesa mugomihedhoya, omamalelowa ninologela. Iyo ninzuzumela ogomiha makaniya ottiya otamela omuziwa witile muladduya.” Ateli na ateliwi agahubuweletxege opitta elani anohagalala.

7. Mweddelo gani onfwanyela olagiha mbali agattomeliwa mabasa mmutugumanoni?

⁷ Iyo nihikana gari enddimuwa vaddiddi yomulabela Yehova ofiyedha apale vangomela guru dhehu. (Masal. 27:4; 84:10) Akala mbali-mbalivi onovilevela mabasa a nikuru na Yehova, ejo jotamaleya. Txibarene, Bibilia onologa: “Akala muttu onodheliwa mmurimani izo yokala [mwimeleli wa mutugumano], enttameliye japama.” (1 Tim. 3:1) Mbwenye mutuya kattiye wi mabasa attomeliweye amubuwelihe opitta ejile eliye. (Lk. 17:7-10) Yogana yaye ekale ya walaba ena na ovyeviha.—2 Kor. 12:15.

8. Yotagiha ya Diótrefe, Uziya na Absalau ennisunziha eni?

⁸ Mbibiliani mukala dhotagiha dhinjene dha attu aviyonana ttima opitta ejile elani. Diótrefe n’ottowa ovipimelela wantameletxa “mpaddo munddimuwa” mmulogoni. (3 Jo. 9) Uziya na ovittukulela waye ohipanela okosa mabasa ahimuttomele Yehova. (2 Map. 26:16-21) Absalau na opyaga waye ohikwekwetta mirima dha attu n’efunelo yokala mwene. (2 Sam. 15:2-6) Dhopadduwa dhili mbibiliyani dhinowoniha wi Yehova kanziveliwana attu antamela ovittittimiha. (Gano 25:27) Attu anivittukulela vina antamela osibiwa angomela mmakattamihoni bahi.—Gano 16:18.

9. Yezu ottiyele yotagiha gani?

⁹ Mottiyana na dhotagiha dhinfwanyelihu orabela, karoma wubuwela ekosile Yezu, masiki valiyevi ninga “Mulugu, kawadele ekalelo yaye y’omulugu.” (Fil. 2:6) Yezu ona onddimuwa wanawili, wahinonelamo wi munddimuwa woroma ddi Yehova bahi, iyene kobuwele opitta yaliye. Nona awaddela dhahi anamafwara aye: “Txibarene, onvikosa muñgonoyávo, ddinakale munddimuwa.” (Lk. 9:48) Gari enddimuwa vaddiddi olaba mumodhani na apioneiro, adhari okamihedha, anddimuwa a mmulogoni vina anameddelela milogo aneddana ovyeviha weddilena Yezu! Ovyeviha wa emeleli a Yehova onowunuwiha okwela onziddiyeliha nlogo na Mulugu.—Jo. 13:35.

10. Txini enfwanyeliwe okosa akala mmulogoni mukala makattamiho anoniwe wi kangomihiwa ninga munfuneliwe?

 ¹⁰ Ki akala mmulogoni munokala makattamiyo anoniwe wi kangomihiwa ninga munfuneliwe? Ottiya okalelaga ologavi dha marabwa, onofwanyela woniha ovyeviha wawo mwa wakamihedha abale animelela mulogoya. (Aheb. 13:17) Wi okamihedheye, karoma ovivuza dhahi: ‘Makani aba anona miyo ahittabwa venjene ofiyedha ofuna wogoleliwa? Mudhidhiya wa wogoleliwawa bubwene? Miyo ddivahiwa onddimuwa wa wogolela? Ddigobuwela, dhawira dhaga dhinowita wiwanana, obe ddinfuna ddoniwe ninga ddilitxi wa ttima?’

11. Mowiwana na Éfeso 4:2, 3, txine enpurelamo iyo nigamulabelaga Yehova na ovyeviha?

¹¹ Yehova onottittimiha ovyeviha opitta ewodhelo vina onovaha ttima wiwanana opitta ttotto. Nona, okose muli mwetemwene wi omulabele Yehova na ovyeviha. Ogakosa dhawene, onela okamihedha wiwanana wa mmulogoni. (Kengesa Efeso 4:2, 3.) Okale muttu onvingela mabasa olaleya. Katamela merelo awakosela attu enna dhapama wi wonihe ofewa murima wawo. Wawakelege etene, vamodha na abaleya ahina ettomo mmulogoni. (Mt. 6:1-4; Lk 14:12-14) Ogalabaga n’ovyeviha vamodha na abali a mmulogoni kunonihe bahi ewodhelo yawo, onela woniha vina ovyeviha wawo.

12. Bibilia ononikokomeza okana amarho? Katapulela.

¹² Yehova onikosile na efunelo ya waredha vamodha na amudhihu vina na akwihu. (Masal. 133:1) Yezu wahikana amaro aderetu.  (Jo. 15:15) Bibilia onologa yopurelamo ya okana amarho ebaribari. (Gano 17:17; 18:24) Vina ononaddela wi kinfwanyela iyo okalaga kurujeje. (Gano 18:1) Attu enjene anubuwela wi mwinternetini mwego munwodheya okaniwa amarho enjene ofiyedha ohikala kurujeje. Mbwenye ninofwanyela okana malago ningalabaga na epano eji yologana.

13. Abale ankaletxa mwinternetini anivyonelani ninga kanna amarho vina ankaleletxani okumuwene?

¹³ Anamasunza ahizinddiyela yawi attu ankala mudhidhi mwinjene mwinternetini onaga dhologa vina na mafotoya akwawa, ankala okubanyene. Sabwaya jani? Mwahaya bwawi, attu enjene anika mwiternetini foto dhinonani wi s’okoddela, dhinolagiha mburo dhozivela okala, na dhina dhimpidani na amarho awa vina dhinoniha mburo dhofuma dhinfiyani. Muttu onona mafoto ninga abo, onodha oladdaniha dhiniye na dha mukwaye. Murogora dhahi ona vyaka-19-ohiloga: “Miyo ddakala wodhugudheyene vawonimi attu ena aredhaga vina osanzayene, ddakala wokumuwene vatakulu.”

14. Malago a mbibiliani ali 1 Pedro 3:8 ananikamihedhe dhavi olabihedha interneti na ovipimelela?

¹⁴ Txibarene enowodheya olabana interneti n’ekalelo yapama—ninga mottagiha, enoniwodhiha ologa na amudhihu vina amarho ehu. Wanziwa wi dhinika attu aba mwinternetini, anikelamo n’efunelo yovittittimihana? Muselu oniketxamo awene, onloga dhahi “Onoddona?” Ena anofiyedhaga ologa mazu olava obe otowa zelo alogagana foto dhawa obe dhakwawa. Dhawira esi dhinottiyana na dhawira dha muttu woviyeviha, esuwene dhinkokomeziwa Aktristu okana.—Kengesa 1 Pedro 3:8.

15. Bibilia onikamihedha dhavi orabela ovittittimiha nanya?

¹⁵ Akala weyo onovolowaga mwinternetini kavivuze: ‘Foto, mavidiyu na dhina dhinika miyo mwinternetini, kadhinakosiha attu wubuwela wi miyo ddili muttu wovittukulela? Kaddinakosiha ena oddikanela ntxiga? Bibilia onologa: “Dha mwilaboni sisi—monlelo abure a mwili, ojiwa murima na dhetene dhinona mento, ovithukulelana muhaku. Dhetene esi kadhinda wa Baba, s’amwilaboni.” (1 Jo.  2:16) Mazu aba “ojiwa murima na dhetene dhinona mento” Bibilia mwina ontapulela dhahi, “Ofunetxa okala wattima.” Akristu kanfwanyela okana ekalelo yovivuwiha. Awene anfwara malago a Bibila awi: “Nihikale athu ovithukulela nitotelagana kani, nikalelagana nrima.” (Gal. 5:26) Ovyeviya ononiwodhiha ohikana ekalelo ya ovurana wi noniwe ninga attu a ttima dhahene ninga munkosela attu a mwilaboni.

16. Ekaleleni yofuneya orabela ovittukulela?

¹⁶ Iyo ninofwanyela okosa guru wi nikane yeddelo ya oviyeviha sabwani attu ovittukulela kanziwa “ovipimana ebaribari.” (Rom. 12:3) Attu ovittukulela anamatota kani vina anovyonana ttima ehinnani. Dhologa na dhawira dhawa masaka mena dhinowaputtulaga awene anya vamodha na attu akwawa. Awene agahitxinje ekalelo yawa, dhubuwelo dhawa dhigela otakalihiwa na Satana. (2 Kor. 4:4; 11:3) Mottiyanamwene muttu wovyeviha onoziwa ovipimelela. Iyene kanubuwela enpitta eliye, onovinanela; onononelamo wi akalawo attu anna ewodhelo yokosa dhina dhinpitta dhaye. (Fil. 2:3) Iyene anoziwa wi “ Mulugu onowakodda attu opanela, onowavaha mahala anvyeviha.” (1 Ped. 5:5) Abale anziwa ovipima na ebaribari kanimona Yehova ninga mwiddani wawa.

17. Txini enfwanyelihu okosa wi nikalevi ovyeviha?

¹⁷ Wi nikalevi ovyeviha ninofwanyela ovirihamo malago a Bibilia a ‘orula omuthu wawale na mereloya, nittukulaga ekalelo ya muthu muswa.’ Vanofuneya guru enddimuwa. Iyo ninofuniwana osunza merelo a Yezu vina nivilibihedhaga otagiha ofiyedha apale vanwodhelihu. (Kol. 3:9, 10; 1 Ped. 2:21) Okosa ejene onopurihamo. Nigazuzumela weddana ovyeviha omudhi wehu onele winjiva, wiwanana wehu wa mmulogoni onowunuwa vina ninele oziwa orabela ngovi dha mwinternetini wi ninadhe oputtuwa. Ya ttimaya-ttimaya jawi ninela wakela mareliho vina ninela wakeliwa na Yehova.