1. Dapre Filipyen 2:3, ki mannyer limilite i fer nou annan bon lanmitye avek lezot?

AVEK limilite, nou obei Zeova parski nou konpran ki Zeova i toultan konnen kwa ki pli bon pour nou. (Efe. 4:22-24) Ler nou annan limilite, nou pou fer lavolonte Zeova avan sa ki pour nou e nou pou konsider lezot pli siperyer ki nou. Sa pou fer nou annan en bon lanmitye avek Zeova e avek nou bann frer ek ser dan kongregasyon.​—Lir Filipyen 2:3.

2. Ki zapot Pol ti rekonnet e ki nou pou diskite dan sa lartik?

² Si nou pa fer atansyon, bann dimoun dan sa lemonn ki orgeye e ki mazin zis zot lekor * i kapab enfliyans nou. I paret ki bann Kretyen dan premye syek ti annan sa menm problenm. Sanmenm rezon ki zapot Pol ti ekri bann Romen: “Mon dir zot tou ki la pour pa annan en tro gran lopinyon lo zot prop lekor, me pour annan en lopinyon rezonnab lo zot prop lekor.” (Rom. 12:3) Pol ti rekonnet ki nou bezwen annan respe pour nou lekor. Par kont, ler nou annan limilite, nou pa pou annan en tro gran lopinyon lo nou lekor. Dan sa lartik, nou pou vwar trwa domenn ki limilite i kapab ed nou pour pa annan en tro gran lopinyon lo nou lekor. Sa bann domenn i (1) nou maryaz, (2) privilez ki nou gannyen dan lorganizasyon Zeova e (3) lafason ki nou servi rezo sosyal.

3. Akoz i kapab annan problenm dan maryaz e ki mannyer serten i esey rezourd zot problenm?

³ Zeova i anvi ki en msye ek son madanm i ere ansanm. Me vi ki zot enparfe, i normal ki i pou annan serten problenm dan lavi maryaz. Anfet, Pol ti ekri ki bann ki marye pou ganny serten problenm. (1 Kor. 7:28) I annan ki toultan pe ganny problenm avek zot konzwen e zot panse ki zot pa ti’n devret marye avek kanmarad. Si zot in ganny enfliyanse avek sa lemonn, deswit zot pou mazinen ki zot devret divorse. Zot santi ki zot pou pli ere si zot divorse.

4. Ki nou devret evite?

⁴ Nou bezwen evite mazinen ki nou maryaz pa’n reisi. Nou konnen ki imoralite seksyel i sa sel rezon ki Labib i dir nou kapab divorse. (Mat. 5:32) Alor, ler i annan problenm dan nou maryaz, nou pa devret vin orgeye e demande: ‘Eski mon pe ganny sa ki mon bezwen dan sa maryaz? Eski mon pe ganny sa lanmour ki mon merite? Eski mon pou pli ere avek en lot dimoun?’ Si nou mazin koumsa, nou pe mazin zis nou lekor e nou pa pe mazin nou konzwen. Lasazes sa lemonn pou ankouraz ou pour fer sa ki ou kontan, menm si sa i vedir ki ou divorse. Lasazes Bondye i dir nou: “Pa rod zis zot prop lentere, me lentere lezot osi.” (Fili. 2:4) Zeova i anvi ou prezerv ou maryaz e i pa anvi ki ou divorse. (Mat. 19:6) I anvi ki ou met Li premye, pa ou prop lekor.

5. Dapre Efezyen 5:33, ki mannyer en msye ek en madanm i devret tret kanmarad?

⁵ En msye ek son madanm i devret tret kanmarad avek lanmour ek respe. (Lir Efezyen 5:33.) Labib i ansenny nou pour konsantre lo donnen olye lo resevwar. (Akt 20:35) Ki kalite ki pou ed en  koup marye pour demontre lanmour ek respe? Zot bezwen annan limilite. Bann msye ek madanm ki annan limilite, pa pou rod zot prop lentere me “lentere lezot.”​—1 Kor. 10:24.

6. Ki ou aprann avek sa ki Steven ek Stephanie i dir?

⁶ Bann koup Kretyen ki demontre limilite i pli ere dan zot lavi maryaz. Par egzanp, en msye ki apel Steven i dir: “Ou avek ou konzwen zot bezwen travay ansanm sirtou ler i annan problenm. Olye mazinen ‘kwa ki pli bon pour mwan?’ ou pou mazinen ‘kwa ki pli bon pour nou?’” Son madanm, Stephanie i santi parey. I dir: “Personn pa anvi viv avek en dimoun ki toultan pe argimant avek li. Ler nou ganny problenm, nou esey rode akoz nou’n ganny sa problenm. Apre sa, nou priye, fer resers e koz lo ki mannyer nou kapab rezourd sa problenm. Nou esey rezourd sa problenm e pa lager avek kanmarad.” Bann msye ek madanm pou pli ere si zot pa annan en tro gran lopinyon lo zot prop lekor.

7. Ki latitid en frer i devret annan ler i ganny en nouvo responsabilite dan lorganizasyon Zeova?

⁷ I en privilez pour servi Zeova dan nenport ki fason nou kapab. (Ps. 27:4; 84:10) Si en frer i pare pour fer plis dan lorganizasyon Zeova, sa i en bon keksoz. Anfet, Labib i dir: “Si en zonm pe fer zefor pour kalifye pour vin en sirveyan dan kongregasyon, i anvi fer en bon travay.” (1 Tim. 3:1) Par kont, ler sa frer i ganny en responsabilite, i pa devret annan en tro gran lopinyon lo son lekor. (Lik 17:7-10) Son lobzektif i devret pour servi lezot avek limilite.​—2 Kor. 12:15.

8. Ki nou aprann avek legzanp Dyotref, Ouzya ek Absalonm?

⁸ Dan Labib i annan legzanp bann dimoun ki ti krwar ki zot pli siperyer ki lezot. Dyotref pa ti en dimoun modes. I ti esey ganny “premye plas” dan kongregasyon. (3 Zan 9) Ouzya ti esey fer en keksoz ki i ti napa drwa fer. (2 Kron. 26:16-21) Absalonm ti anvi vin lerwa, alor i ti fer bann dimoun krwar ki i kontan zot pour zot siport li. (2 Sam. 15:2-6) Parey nou vwar dan sa bann resi dan Labib, Zeova pa kontan ler bann dimoun i esey glorifye zot lekor. (Prov. 25:27) Avek letan, en dimoun ki orgeye e ki anvi lezot i admir li, pou ganny problenm dan son lavi.​—Prov. 16:18.

9. Ki legzanp Zezi in kite?

⁹ Zezi pa ti parey sa bann dimoun orgeye. Labib i dir “ki menm si i ti annan menm natir ki Bondye, i pa ti zanmen mazinen pour pran plas Bondye e fer li vin egal avek li.” (Fili. 2:6) Menm si zis Zeova ki pli pwisan ki Zezi, Zezi pa ti annan en tro gran lopinyon lo son lekor. I ti dir son bann disip: “Sa enn ki konport li parey enn ki pli pti parmi zot tou i sa enn ki pli gran.” (Lik 9:48) I vreman en benediksyon pour travay ansanm avek bann pionye, serviter kongregasyon, ansyen ek sirveyan rezyonal ki swiv legzanp Zezi par demontre limilite! Bann serviter Zeova ki annan limilite, i kontan kanmarad e sa i montre ki zot bann vre serviter Bondye.​—Zan 13:35.

10. Ki ou devret fer si ou santi ki bann problenm dan kongregasyon pa pe byen ganny rezourd?

¹⁰ Ki ou devret fer si i paret ki i annan problenm dan kongregasyon e ou santi ki bann ansyen pa pe byen rezourd sa bann problenm? Olye konplent, ou  kapab demontre limilite par siport sa bann ki pe diriz kongregasyon. (Ebr. 13:17) Pour ed ou fer sa, demann ou lekor: ‘Eski sa bann problenm ki mon pe vwar i sitan grav ki zot bezwen ganny rezourd? Eski i sa moman apropriye pour rezourd sa bann problenm? Eski i mon responsabilite pour rezourd sa bann problenm? Eski mon pe esey fer kongregasyon vin pli ini oubyen eski mon pe esey fer mwan paret pli enportan?’

11. Dapre Efezyen 4:2, 3, ki i arive ler nou servi Zeova avek limilite?

¹¹ Pour Zeova, i pli enportan pour nou annan limilite ki abilite e i pli enportan pour nou ini ki pour nou efikas. Alor, fer ou mye pour servi Zeova avek limilite. Ler ou fer sa, ou pou ede fer kongregasyon pli ini. (Lir Efezyen 4:2, 3.) Anons sa bon nouvel otan ki ou kapab. Rod fason pour servi lezot par fer bann bon keksoz pour zot. Demontre lospitalite avek tou dimoun, enkli bann ki napa responsabilite dan kongregasyon. (Mat. 6:1-4; Lik 14:12-14) Anmezir ki ou demontre limilite e ou travay ansanm avek lezot dan kongregasyon, zot pou vwar ki ou pa zis annan abilite me ki ou annan limilite.

12. Eski Labib i ankouraz nou pour annan zanmi? Eksplike.

¹² Zeova i anvi ki nou pas bann bon moman avek nou fanmir ek zanmi. (Ps. 133:1) Zezi ti annan bann bon zanmi. (Zan 15:15) Labib i dir ki nou ganny bann byenfe ler nou annan bann bon zanmi. (Prov. 17:17, NWT; 18:24, NWT)  Labib i osi dir ki i pa byen pour nou izol nou lekor. (Prov. 18:1, NWT) En kantite dimoun i krwar ki rezo sosyal i en fason pour fer en kantite zanmi e pour evite santi ou tousel. Par kont, nou bezwen fer byen atansyon ler nou pe servi rezo sosyal.

13. Akoz serten dimoun ki servi rezo sosyal i santi zot tousel e dekouraze?

¹³ Bann resers i montre ki bann dimoun ki pas bokou letan lo rezo sosyal pe get komanter ek portre lezot dimoun, i kapab santi zot tousel e dekouraze. Akoz? En rezon i petet akoz bann dimoun i souvandfwa met portre zot bann pli bon moman, ki enkli portre zot prop lekor, portre zot zanmi e osi bann landrwa eksitan ki zot in vizite. En dimoun ki get sa bann portre i kapab vwar son prop lavi pa gou e ki i pa fer nanryen ki eksitan. En ser ki annan 19 an i dir: “Mon ti konmans santi mwan malere ler mon ti vwar lezot pe pas bann bon moman dan wikenn e mwan, mon ti kot lakour nanryen fer.”

14. Ki mannyer sa konsey dan 1 Pyer 3:8, i kapab ed nou ler nou servi rezo sosyal?

¹⁴ Byensir, nou kapab servi rezo sosyal dan en bon fason. Par egzanp, pour kominik avek nou fanmir ek zanmi. Me eski ou’n remarke ki serten keksoz ki dimoun i met lo rezo sosyal in ganny mete pour fer lezot admir zot? I konmsi zot pe dir “Get mwan!” Serten i menm servi bann parol vilger e obsenn ler zot pe fer komanter lo bann portre ki zot in mete oubyen ki lezot dimoun in mete. Vi ki bann Kretyen i ganny ankouraze pour demontre limilite e pour konpran santiman lezot, zot servi rezo sosyal dan sa bon fason.​—Lir 1 Pyer 3:8.

15. Ki mannyer Labib i kapab ed nou evite fer nou paret enportan?

¹⁵ Si ou servi rezo sosyal, demann ou lekor: ‘Eski bann komanter, portre oubyen video ki mon met lo rezo sosyal i kapab donn lezot lenpresyon ki mon pe demonstre? Eski mon pe fer lezot zalou?’ Labib i dir: “Tou sa ki dan lemonn, dezir lekor enparfe, dezir lizye e ler dimoun i  demonstre akoz son bann keksoz materyel, tousala pa sorti kot nou Papa, me i sorti dan lemonn.” (1 Zan 2:16) En versyon Labib i tradwir sa fraz “demonstre akoz son bann keksoz materyel” konman “anvi paret pli enportan.” Bann Kretyen pa santi ki zot bezwen ganny admire oubyen ki zot enportan. Zot swiv sa konsey Labib ki dir: “Annou pa vin vantar, pa fer paryaz avek kanmarad e pa groker kanmarad.” (Gal. 5:26) Si nou annan limilite, nou pa pou vin parey bann dimoun dan sa lemonn ki orgeye e ki anvi ki lezot i vwar zot konman bann dimoun enportan.

16. Akoz nou pa devret vin orgeye?

¹⁶ Nou bezwen devlop limilite parski bann ki orgeye napa “en lopinyon rezonnab lo zot prop lekor.” (Rom. 12:3) En dimoun orgeye i kontan argimante e i vantar. Souvandfwa zot fason panse ek zot aksyon i fer zot fer ditor zot prop lekor ek lezot. Si zot pa sanz zot fason panse, zot pou ganny avegle e anbete par Satan. (2 Kor. 4:4; 11:3) De lot kote, en dimoun ki annan limilite i annan en lopinyon rezonnab lo son lekor e i rekonnet ki dan plizyer fason lezot i pli siperyer ki li. (Fili. 2:3) I osi konnen ki “Bondye i opoz bann ki arogan me i demontre son labonte ekstraordiner anver bann ki annan limilite.” (1 Pyer 5:5) Dimoun ki annan en lopinyon rezonnab lo zot prop lekor pa anvi ki Zeova i vin zot lennmi.

17. Ki nou devret fer pour kontinyen annan limilite?

¹⁷ Pour nou kontinyen annan limilite, nou bezwen aplik sa konsey Labib pour ‘debaras nou avek sa vye personnalite ek son bann pratik e kontinyen devlop sa nouvo personnalite.’ I demann bokou zefor pour fer sa. Nou bezwen etidye legzanp Zezi e esey swiv son legzanp fidelman. (Kol. 3:9, 10; 1 Pyer 2:21) Si nou fer sa, nou pou ganny bokou byenfe. Anmezir nou devlop limilite, nou fanmir pou pli ere, nou pou ede fer kongregasyon pli ini e nou pou servi rezo sosyal dan en bon fason. Pli enportan ankor, nou pou fer Zeova plezir e nou pou ganny son benediksyon.