1. Nemene la eamo hna hamën ngöne Filipi 2:3, nge nemene la eloin e troa trongën ej?

 EASA trongëne la itre trepene meköti Iehova ke, atre hi Nyidrëti la ka loi koi së. (Efe. 4:22-24) Maine tro sa ipië, tro hë sa amë panëne la aja i Iehova hune la sipu aja së, me wangatrune la itre xan. Ketre, tro fe hë sa imelekeu hnyawa me Iehova memine la itre trejin.—E jë la Filipi 2:3.

2. Nemene la hna atre hnei Paulo, nge nemene la hne së hna troa ce wang?

² Ame ngöne la fene i Satana, alanyimu la itre atr ka pi tru nge ka sipu meku angatre kö. * Celë hi matre e tha hmeke kö së, tro hë sa ixomithiina. Celë hi ka traqa kowe lo itre pane Keresiano ekö. Öni Paulo kowe la ekalesia ne Roma: “The tro kö nyipunieti a sipu wangatrunyi nyipunie, ngo tuluthe ju la aqane troa sipu waipengöi nyipunie.” (Rom. 12:3) Atre hi Paulo laka, ijije hi tro sa sipu wangatrunyi së. Ngo loi e tro sa ipië, matre atreine waiewekë hnyawa. Tro sa ce wang la enyipiewekëne la troa ipië, matre tha tro kö sa sipu wangatrunyi së: (1) ngöne la faipoipo, (2) ngöne la easa cilëne la itre hnëqa ngöne la ekalesia, me (3) ngöne la easa huliwane la Ëternet (réseaux sociaux).

3. Pine nemene matre kola iwesitrë hnene la itre trefën, nge nemene la hna canga mekun hnei angatr?

³ Iehova a ajane tro la lue trefën a madrin ngöne la faipoipo. Ngo canga tro hi a traqa la itre jol pine laka, tha ka pexeje kö nyidro. Ketre, hnei Paulo hna qaja ka hape, hetre jol hna troa cile kow hnene la itre trefën. (1 Kor. 7:28) Ame la itre xaa trefën, angatr palahi a iwesitrë. Ame koi angatr, ka loi e troa isa lapa. Pine laka, hna ajojezi angatr hnene la fene i Satana, matre angatr a canga thel troa seihnacil. Ame la ka nyipiewekë koi angatr, tre, troa kuca la sipu aja i angatr.

4. Nemene la ewekë nyine tha tro kö sa kuca?

⁴ Ngacama kola traqa la itre jol, ngo tha tro kö la lue trefën a mekun laka, ka luzi hë la faipoipo i nyidro. Öni Tusi Hmitrötr ka hape, maine hna kuci ngazo hnei ketre, ijije hi troa seihnacil. (Mat. 5:32) Haawe, ame la easa cile kowe la itre jol, tha tro kö sa pi tru me hnying ka hape: “Hapeu, eni kö a madrin ngöne la faipoipong? Kolo kö a hnimi ni hnyawa hnene la föeng? Tro kö ni a madrin e tro ni a faipoipo me ketre?” Celë hi aqane mekun ne la ketre atr ka meku angeice kö. Maine tro sa xötrethenge la aqane ujë ne la fen, tro hë sa kuca la sipu aja së me seihnacil. Ngo thenge la inamacane i Akötresie, tha tro kö sa ‘thele ewekë thatraqai së hmekuj, ngo thele jë pe la ka loi koi itre xan.’ (Fil. 2:4) Tha aja i Iehova kö tro sa seihnacil. Nyidrëti a ajane troa cile huti la faipoipo. (Mat. 19:6) Iehova a ajane tro sa pane meku Nyidrë, nge pi easë pë hë.

5. Thenge la Efeso 5:33, nemene la lue thiina nyine troa amamane hnene la lue trefën?

⁵ Loi e tro la lue trefën a ihnimikeu me imetrötrekeu. (E jë la Efeso 5:33.) Tusi Hmitrötr a ini së troa ham hune la troa  kapa. (Itre hu. 20:35) Nemene la thiina hna troa amaman hnene la lue trefën, e ka ihnimikeu nyidro me imetrötrekeu? Maine tro nyidroti a ipië, tro hë nyidroti a pane thele la ka loi koi ketre, nge pine pë hë la sipu aja i nyidro.—1 Kor. 10:24.

6. Nemene la ini hne së hna xom qa ngöne la hna melën hnei Steven me Stéphanie?

⁶ Itre Keresiano a mele madrin ngöne la faipoipo ke, angatr a hetre hni ka ipië. Celë hi hna melën hnei Steven me Stéphanie. Öni Steven: “Tune la ketre ekip, nyio a ce cile kowe la itre jol. Tha nyio kö a qaja ka hape: ‘Nemene la ka loi koi ni?’ Nyio pe a qaja ka hape: ‘Nemene la ka loi koi nyio?’ Ce mekuna i Stephanie hi me Steven. Öni angeic: “Pëkö atr ka ajane troa ce mel memine la ketre ka icilekeu. Ame la kola traqa la jol, nyio a pane thele la kepin. Thupene lai, nyio a thith me ithel me ithanatan. Nyio a ce cile kowe lai jol, ngo tha nyio kö a icilekeu.” Eje hi, loi e tro la lue trefën a thupën, matre tha tro kö a isa wangatrunyi nyidro. E cili, tro hë nyidroti a caas me madrin ngöne la faipoipo.

7. Nemene la aqane troa ujë hnene la trejin ka cilëne la ketre hnëqa ngöne la ekalesia?

⁷ Ketre manathith ka tru la troa nyihlue i Iehova ngöne la nöjei huliwa hne së hna kuca. (Sal. 27:4; 84:10) Maine ketre trejin a ajane troa cilëne la ketre hnëqa ngöne la ekalesia ke, ewekë ka lolo lai. Öni Tusi Hmitrötr: “Maine ketre atr a ajane la qa ne atre thup, angeic a ajane la huliwa ka loi.” (1 Tim. 3:1) Nge maine angeice ha cilëne la ketre hnëqa, tha tro kö angeic a sipu wangatrunyi angeic. (Luka 17:7-10) Loi e tro pe a ipië me thele troa huliwa koi itre xan.

8. Nemene la ini hne së hna xom qa ngöne la tulu i Dioterefe me Uzia me Abasaloma?

⁸ Hetrenyi e hnine la Tusi Hmitrötr la ceitune ne la itre atr ka sipu wangatrunyi angatr. Ame Dioterefe ke, tha ka ipië kö angeic. Hnei angeic hna “pi lapane la göhnë ka sisitria” e hnine la ekalesia. (3 Ioane 9) Ketre, hnei Uzia hna pi tru me kuca la ketre hnëqa, ngo tha hna ahnithe kö koi angeic hnei Iehova. (2 A. l. ite jo. 26:16-21) Ame pena Abasaloma, aja i angeic troa joxu, matre hnei angeic hna iaöne la nöj matre tro angatr a sajuë angeic. (2 Sam. 15:2-6) Kola mama ngöne la itre ceitun celë laka, tha kapa kö Iehova la atr ka thele la sipu loi koi angeic. (Ite Edomë 25:27) Eje hi, hetre ethane la troa pi tru me pi mama.—Ite Edomë 16:18.

9. Nemene la ini hne së hna xom qa ngöne la tulu i Iesu?

⁹ Iesu la tulu ka sisitria göne la aqane troa ipië. Öni Tusi Hmitrötr: “Ngacama hnaiji Akötresieti nyidrë, ngo tha hnei nyidrëti kö hna thele troa thapa la göhnë i Akötresie.” (Fil. 2:6) Eje hi, Iesu la ka trene hnëqa ka tru thupe i Iehova. Ngo tha hnei Iesu kö hna sipu wangatrunyi nyidrë. Öni Iesu kowe la itretre dreng: “Ame la atre ujë tune la ka co thei nyipunie, angeice hi la ka tru.” (Luka 9:48) Easa madrin troa ce huliwa memine la itre pionie, me itre atre ixatua, me itre qatre thup, me atre thupën la sirkoskripsio, ka nyitipune la aqane ipië i Iesu! Nyipiewekë tro sa ipië, matre tro palahi a hetre ihnim e hnine la organizasio i Iehova. Ketre, tro ha mama laka, easë hi la itre nyipi Keresiano.—Ioane 13:35.

10. Nemene la nyine tro sa kuca ngöne la easa öhn laka, tha ka loi kö la aqane nyinyine la itre jol e hnine la ekalesia?

¹⁰ Nemene la nyine tro sa kuca ngöne la  easa öhn laka, tha ka loi kö la aqane nyinyine la itre jol e hnine la ekalesia? Tha tro kö sa eetr. Loi e tro pe sa ipië me drengethenge la itre trejin ka elemeken la ekalesia. (Heb. 13:17) Tro fe sa isa hnying ka hape: ‘Hapeu, ka ngazo catre kö la jol celë? Ijine kö lai troa nyinyine la jol? Nge hnëqange kö lai? Eni kö a thel troa caasi e hnine la ekalesia, maine eni pena a thele troa pi mama?’

11. Thenge la hna qaja ngöne Efeso 4:2, 3, nemene la thangane e tro sa nyihlue i Iehova cememine la hni ne ipië?

¹¹ Ame koi Iehova, sisitria catre kö la troa ipië hune la troa atrein. Nge nyipiewekë catre kö koi Iehova tro sa caas, hune la thangane la itre huliwa së. Celë hi matre, loi e tro sa nyihlue i Nyidrë me ipië. E cili, tro hë sa caasi e hnine la ekalesia. (E jë la Efeso 4:2, 3.) Ketre, loi e tro sa catre cainöj. Nyipiewekë tro sa thele la aqane troa xatuane la itre xan me hnimi angatr. Loi e tro fe sa kapa la nöjei trejin ngöne la hnalapa së, tune la itre ka pë hnëqa e hnine la ekalesia. (Mat. 6:1-4; Luka 14:12-14) Nyipiewekë mina fe tro sa ce huliwa memine la itre trejin. Tro hë angatr a öhne la itre hne së hna atrein memine fe la hni ne ipië së.

12. Hapeu, Tusi Hmitrötre kö a upi së troa hetre nyipi sinee? Qejepengöne jë.

¹² Easa madrin troa pane ce lapa memine la itre sinee së me itre atrene la fami së. Celë hi lai aja i Iehova. (Sal. 133:1) Ketre tui Iesu, hetre sinee i nyidrëti fe. (Ioane 15:15) Tusi Hmitrötr a qaja la itre eloine la troa hetre nyipi sinee. (Ite Edomë  17:17; 18:24) Eje mina fe a qaja ka hape, tha ka loi kö troa mele caas me iananyi me itre xan. (Ite Edomë 18:1) Alanyimu la ka mekun ka hape, ijije hi troa thele sinee ngöne Ëternet (réseaux sociaux). Ngo loi e tro sa thupëne la aqane tro sa huliwane la jiane huliwa cili.

13. Pine nemene matre tha madrine kö itre xan ngöne la angatr a huliwane la itre réseaux sociaux?

¹³ Önine la itre ka ithel ka hape, ame la itre ka majemine goeëne la itre foto ngöne la itre réseaux sociaux ke, angatr a kucakuca me mele caas. Pine nemen? Pine laka, itre xan a amë la itre foto i angatr me itre sinee i angatr, me itre götran hnei angatr hna tro kow ngöne la kola ihamë. Ame la ka goeëne la itre foto cili, tre, tro hë angeic a mekun laka, pëkö eloine la mele i angeic. Önine la ketre trejine föe ka 19 lao macatre: “Eni a hleuhleu ke, eni a lapa caas ngöne la hnalapa, nge itre xan a madrin e nöjei pune wiik.”

14. Nemene la eamo hna hamën ngöne 1 Peteru 3:8, göne la aqane troa huliwane la itre réseaux sociaux?

¹⁴ Hetre eloine la itre réseaux sociaux ke, kola aijijë së troa cinyany kowe la itre fami së me itre sinee së. Ngo hapeu la itre ka ami foto me cinyany ngöne la itre réseaux sociaux, tha angatre kö a sipu wangatrunyi angatr? Kösë angatr a qaja ka hape, “Goeë ni jë.” Nge ame la itre xan, angatr a cinyany la itre trengewekë ka sis me ka iakötrë hune la itre foto i angatr maine foto itre xan. Tha celë kö aqane ujë ne la itre Keresiano. Hna ithuecatr kowe la itre Keresiano troa ipië me wangatrune la itre xan.—E jë la 1 Peteru 3:8.

15. Nemene la aqane xatua së hnei Tusi Hmitrötr matre tha tro kö sa pi mama?

¹⁵ Ame la easa huliwane la itre réseaux sociaux, loi e tro sa isa hnying, ka hape: ‘Tha eni kö a pi mama me sipu selë ni ngöne la eni cinyany me ami foto me video? Hapeu, tha tro jë kö itre xan a zalu?’ Tusi Hmitrötr a qaja ka hape: “Ame la nöjei ewekë ne fen, ene la itre aja ne ngönetrei, me itre aja i luemek, memine la troa pi mama fë la itre ewekë së, tre tha qaathei Keme kö, ngo qaathei fene pe.” (1 Ioane 2:16) Ame ngöne la ketre  Tusi Hmitrötr, hna ujëne la hnaewekë, “troa pi mama fë la itre ewekë së” ka hape, “aja troa pi mama.” Tha ajane kö la itre Keresiano troa wangatrunyi angatr hnei itre xan. Angatre pe a xötrethenge la eamo ne la Tusi Hmitrötr, ka hape: “Loi e tha tro kö së a isa pi mama, me thele iwesitrë, me piin.” (Gal. 5:26) Maine tro sa ipië, tha tro kö a ajojezi së hnene la aqane ujë ne la itre atr enehila, itre ka pi mama me pi tru.

16. Pine nemene matre tha tro kö sa pi tru?

¹⁶ Loi e tro sa ipië. Ame la atr ka pi tru, thatreine kö angeice “tuluthe” la aqane troa sipu waipengöi angeic. (Rom. 12:3) Angeic a thele iwesitrë me meku angeice hi. Ketre, angeic a akötrë angeic me itre xane fe hnene la aqane mekun me aqane ujë i angeic. Maine tha thupëne kö angeic, tro ha atimekë angeic me amenu angeic hnei Satana. (2 Kor. 4:4; 11:3) Ame pena la atr ka ipië, tre, ka atreine tulu ewekë angeic. Atre hi angeic laka, hetre hnei angeic hna thatreine kuca tui itre xan. (Fil. 2:3) Ketre, atre hi angeic laka, “methi Akötresie la itre ka pi tru,” nge “Nyidrëti a hamëne la ihnimi gufa koi itre ka ipië.” (1 Pet. 5:5) Ame la atr ka atreine tuluthe la aqane sipu waipengöi angeic, tre, tha aja i angeice kö tro icilekeu me Iehova.

17. Nemene la nyine tro sa kuca matre troa ipië?

¹⁷ Maine easa ajane troa ipië, loi e tro sa trongëne la eamo ne la Tusi Hmitrötr ka hape: “Unatrije pi la itre thiina hnapan me itre hna majemin. Nge hetrëne jë la itre thiina ka hnyipixe.” Nyipici laka, tha ka hmaloi kö. Ngo nyipiewekë tro sa thele troa atrepengöi Iesu hnyawa me nyitipu nyidrë. (Kol. 3:9, 10; 1 Pet. 2:21) Nyimutre la itre eloin hne së hna troa kapa. Maine tro sa ipië, tro ha madrin la fami së, me tingeting me caasi la ekalesia. Ketre, tha tro hë sa huliwane menune la itre réseaux sociaux. Nge ame la ka sisitria ke, tro ha amanathithi së me kepe së hnei Iehova.