1. Enke fa Filipisama 2:3 e soi, da fa sakafasi o yeepi u fu libi bun anga taawan?

U SABI taki Yehofa sabi san moo bun gi u, neen meke wi e meke moiti ala yuu fu du san a taki (Efe. 4:22-24). Efu wi abi sakafasi, a san Yehofa wani wi o poti a fesi. U ná o go e fii enke u bun moo taawan tu. Efu wi abi sakafasi wi anga Yehofa o toon mati. Wi o go e libi bun anga den baala anga sisa aini a kemeente.​—Leisi Filipisama 2:3.

2. San Pawlesi be taki fu a fasi fa u mu e si useefi? San wi o luku aini a artikel ya?

² Efu wi á luku bun wi o bigin fii useefi leti enke den sama fu a goontapu. Den sama ya a denseefi namo den e denki. * A gei na a sani ya be pasa anga wantu Kelesten aini a ten fu den apostel. Neen meke Pawlesi be taigi den baala anga sisa fu Rome taki: ‘Wi á mu e fii useefi. Ma a fasi fa wi e tyai useefi mu soi taki wi e denki bun’ (Rom. 12:3). Pawlesi á be taki u mu e si useefi enke wisiwasiman, ma a be wani soi u taki te wi abi sakafasi, a sani de o yeepi u fu wi á si enke u bun moo taawan. Aini a artikel ya wi o luku dii okasi pe u mu soi taki wi abi sakafasi. (1) U toowlibi, (2) te wi abi gaandi aini a kemeente, anga (3) te u de a internet.

3. Saide takitaki o go e de aini a toowlibi son yuu? San son sama e du te a sani ya pasa?

³ Di Yehofa sete a toowlibi, a be wani man anga uman piisii. Ma fu di wi abi sondu meke son yuu u ná o go e taki go na a wanse. Pawlesi be taki polobelema o de aini a toowlibi (1 Kor. 7:28). Son sama na ala yuu den anga den toowpaa e kwali, neen meke den e si enke a be o moo bun efu den be toow anga wan taa sama. Efu den e denki enke fa a goontapu e denki, den o meke moiti fu booko a toow fu di den e si enke na a sani de o meke den piisii baka.

4. Anga san u mu luku bun?

⁴ U mu meke moiti fu a toowlibi fu wi á toon wan hebi gi u. Bika Beibel taki a wan kodo sani di sa meke wan toow booko, a te wan fu den toowpaa waka gi a taawan (Mat. 5:32). Neen meke te polobelema de aini a toowlibi yu á mu bigin pakisei taki: ‘Mi toowpaa nai booko en ede anga mi. A nai libi bun anga mi. Kande mi be o moo de koloku efu mi be toow anga wan taa sama.’ Te wi e denki so, a wiseefi namo wi e pakisei. Den sama aini a goontapu be o taigi i taki efi i wani de koloku tuutuu i mu du san yu ati fii. Winsi a booko i mu booko i toow fu de koloku, yu á mu feele fu du en. Ma Beibel e taki: ‘Yu á mu e suku wini fi i wawan, ma i mu e booko yu ede anga taawan tu’ (Filip. 2:4). Yehofa á wani i fika i toowpaa, ma a wani i meke moiti fi i toowlibi waka bun (Mat. 19:6). A wani i poti pakisei a san a wani pe fi yu e denki iseefi namo.

5. Enke fa Efeisesama 5:33 e soi, da fa man anga uman mu e libi anga denseefi?

⁵ Man anga uman mu e libi bun anga denseefi. Den mu e lesipeki denseefi tu. (Leisi Efeisesama 5:33.) Beibel e leli u  taki wi o moo de koloku te wi e gi taawan sani moo enke te taawan e gi u sani (Toli 20:35). San o yeepi wan toowpaa fu lobi denseefi anga fu lesipeki denseefi? A sani di o yeepi den, a te den abi sakafasi. Te man anga uman abi sakafasi, den ná o go e suku wini fu den wawan. Ma den o wani du sani di a ‘taawan o fende wini fi en’.​—1 Kor. 10:24.

6. San yu e leli te i luku den sani di Steven anga Stephanie taki?

⁶ Sakafasi yeepi omen Kelesten toowpaa fu den toowlibi moo waka bun. Wan baala den e kai Steven taki: ‘Yu anga i toowpaa mu e wooko makandaa, moomoo te polobelema de aini a toowlibi. A sani ya o yeepi u fu poti pakisei a san moo bun gi u tu man, pe fi i poti pakisei a san bun gi i wawan.’ Na aseefi fasi a uman fi en di den e kai Stephanie e denki tu. A taki: ‘Nawan sama á wani tan aini wan osu anga wan sama di e kwali anga en hii dei. Te wan takitaki de, wi e meke moiti fu fusutan san tyai a takitaki. Baka dati wi e begi, wi e luku san a olikanisâsi e taki fu a toli de, da wi e taki fusutan useefi. Te u fusutan san na a polobelema, u nai ligei anga useefi, ma wi e meke moiti fu losi a polobelema.’ Ai tyai wini gi man anga uman te wan fu den nai si enke a bun moo a taawan.

7. Fa wan baala mu tyai enseefi te a fende wan gaandi aini a olikanisâsi?

⁷ Wi e teke en fu bigi taki u poi dini Yehofa (Ps. 27:4; 84:10). Efu wan baala e meke moiti fu du moo aini a olikanisâsi fu Yehofa, a wan bun sani ai du. Beibel taki: ‘Efu wan sama e meke moiti fu toon owluman, da ai meke moiti fu du wan bun wooko’ (1 Tim. 3:1). Ma te a fende wan gaandi aini a olikanisâsi a á mu bigin fii enseefi (Luk. 17:7-10). A mu abi sakafasi fu man dini den baala anga sisa fi en.​—2 Kor. 12:15.

8. San wi e leli fu a toli fu Diotreifes, Usiya anga Absalom?

⁸ Beibel e taki fu wantu sama di be e fii denseefi. Wan fu den sama ya a Diotreifes. A á be e lesipeki den sama di be e teke fesi, ma a be wani ‘de a moo pelensipali wan a den mindii’ (3 Yoh. 9). Wan fu den taa sama ya a be Usiya. A be wani du wan wooko di Yehofa á be gi en pasi fu du (2 Kolon. 26:16-21). Absalom a be wan sama di be e fii enseefi tu. A be wani toon kownu. Neen meke a be e du enke a lobi a foluku soso fu di den be mu holibaka gi en (2 Sam. 15:2-6). A fasi fa sani waka anga den sama ya e soi kiin taki Yehofa á lobi sama di abi heimembee (Odo 25:27). Sani nai waka bun gi den sama di e fii denseefi.​—Odo 16:18.

9. San e soi taki Yesesi abi sakafasi?

⁹ Yesesi á be de enke den man ya. Beibel taki: ‘Winsi fa a be de enke Gadu, toku a á be denki fu teke a makiti fu Gadu anga taanga, fu a be sa de aseefi enke Gadu’ (Filip. 2:6). Winsi fa a Yehofa wawan too abi makiti moo Yesesi, tokuso Yesesi nai fii enseefi. A be taigi den disipel fi en taki: ‘A sama di e saka enseefi, neen na a moo gaanwan’ (Luk. 9:48). Ná pikin piisii wi e piisii fu wooko makandaa anga pionili, dinali, owluman anga kelen-owluman di abi sakafasi leti enke Yesesi. Sakafasi o yeepi u fu moo lobi taawan. Yesesi be taki den bakaman fi en be o lobi denseefi.​—Yoh. 13:35.

10. San i mu du efi i si enke den owluman aini a kemeente nai du sani enke fa den mu du en?

 ¹⁰ San i mu du efi i si enke den owluman aini a kemeente nai du sani enke fa den mu du en? Pe fi i kuutu, a be o moo bun fu holibaka gi den sama di e teke fesi. A so yu e soi taki yu abi sakafasi (Heb. 13:17). Fu man du a sani ya i mu akisi iseefi taki: ‘A polobelema ya bigi so enke fa mi e denki? A disi na a bun yuu fu soi den taki den nai du wan sani bun? A mi abi a faantiwowtu fu poti den a pasi? A yeepi mi wani yeepi a kemeente fu libi na a wan, efuso a soi mi wani soi sama taki mi pelensipali?’

11. Enke fa Efeisesama 4:2, 3 e soi, da sowtu wini wi o fende te wi abi sakafasi?

¹¹ Winsi i sabi du son sani bun, efi i ná abi sakafasi Yehofa ná o poi wooko anga i. A libi di u mu e libi na a wan pelensipali gi Yehofa moo a holi di u mu e holi ala pikinpikin weiti. Neen meke i mu meke moiti fu abi sakafasi te yu e dini Yehofa. Te yu e du a sani ya, yu e yeepi a kemeente fu libi na a wan. (Leisi Efeisesama 4:2, 3.) San a wantu fasi fa u sa soi taki wi abi sakafasi? Peleiki fayafaya, poti pakisei a taawan, a so yu o sabi fa i sa yeepi den. U mu lobi kai sama kon a wi osu. A ná den sama di abi faantiwowtu wawan u mu e kai, ma u mu e kai ala sama kon a wi osu (Mat. 6:1-4; Luk. 14:12-14). Te yu e soi sakafasi te yu e wooko makandaa anga taawan, den ná o si den sani di i poi du namo, ma den o si tu taki yu abi sakafasi.

12. Beibel e gi u taanga-sikin fu meke mati?

¹² Yehofa wani u piisii te u de makandaa anga famii anga mati (Ps. 133:1). Yesesi seefi be abi bun mati (Yoh. 15:15). Beibel e soi u sowtu wini a abi te wi abi tuutuu mati (Odo 17:17; 18:24). Ai soi u tu taki a á bun fu wi e de u wawan (Odo 18:1). A omen sama e si enke te den meke omen mati a internet da den ná o fii enke a den wawan de moo. Ma u mu luku bun anga sama wi e meke mati a internet.

13. Saide son sama di lobi luku sani a internet e fii enke den wawan de?

¹³ Ondoosuku e soi taki sama di e teke omen ten fu luku san taa sama poti a internet e moo fii booko-saka. Den e fii enke a den wawan de tu. Saide? We, gaanse fu den sama di e poti sani a internet e soi fowtow fu den moin peesi pe den go, den somen mati di den abi, efuso den moo moin fowtow fu den. Wan sama di e luku den sani ya sa fii enke taa sama e piisii moo en. Wan yonkuu sisa fu 19 yali taki: ‘Mi be e dyalusu te mi be e si omen fowtow fu taawan di be go koi sataa anga sonde, a yuu di mi be de a osu e fuka.’

14. Fa u sa wooko anga den sani sikiifi a 1 Peitilisi 3:8 te u de internet?

¹⁴ A á fowtu fu koboloiki internet. I sa taki anga famii efuso mati di e tan faawe. Ma te i luku den sani di son sama e poti a internet da yu e si taki den e wani sama poti pakisei a den. Taawan a omen tyobo sani den e sikiifi a den fowtow fu den, efuso fowtow fu taawan. Ma Beibel e soi u taki u mu abi sakafasi. U mu e fii gi taawan tu. Neen meke tuu Kelesten nai du den sowtu sani ya.​—Leisi 1 Peitilisi 3:8.

15. Fa Beibel o yeepi u fu wi á fii useefi?

¹⁵ Efi yu a wan sama di e poti fowtow efuso taa sani a internet, a bun fi yu akisi iseefi taki: ‘Den sani di mi e sikiifi, den fowtow efuso felon di mi e poti e soi taki mi e gafa? Den sani ya sa meke taawan dyalusu?’ Beibel taki: ‘Den sani di a sondu sikin wani, di a ain wani, anga a poolo  di wan sama e poolo anga den gudu fi en, a goontapu sani. A ná fu a Dda’ (1 Yoh. 2:16). Tuu Kelesten nai gafa, bika den á wani sama poti pakisei a den. Ma den e meke moiti fu du a sani di sikiifi a Galasiyasama 5:26. Ai taki: ‘Wi á mu e fii useefi, wi á mu e sitee anga taawan, wi á mu e dyalusu anga taawan tu.’ Efu wi abi sakafasi, u ná o de enke den sama fu a goontapu ya di e wani sama poti pakisei a den ala yuu.

16. Saide wi á mu abi heimembee?

¹⁶ U mu meke moiti fu abi sakafasi, bika den sama di abi heimembee nai ‘denki bun’ (Rom. 12:3). Sama di abi heimembee e pakisei denseefi namo. Den lobi sitee anga taawan. Fu di den nai denki bun meke den e du sani di e hati taawan. Efu den á kengi a fasi fa den e denki, den o bigin du sani enke a goontapu fu Saatan (2 Kor. 4:4; 11:3). Wan sama di abi sakafasi e denki bun. A nai fii enseefi, ma ai si taawan pelensipali moo en (Filip. 2:3). A sabi taki ‘Gadu e buuse sama di abi heimembee, ma ai soi bun-ati gi den sama di abi sakafasi’ (1 Peit. 5:5). Sama di e denki bun á wani toon Yehofa feyanti.

17. San u mu du efu wi á wani abi heimembee?

¹⁷ Efu wi á wani abi heimembee, u mu e du san Beibel taki. ‘U mu kengi a fasi fa u be de fosi. U mu tapu anga den sani di u be e du.’ A sani ya á makiliki. Efu u wani du a sani ya u mu sutudeli a libi fu Yesesi da u waka neen baka (Kol. 3:9, 10; 1 Peit. 2:21). Wi o fende wini te u du a sani ya. Wi osulibi o moo waka bun. Wi o yeepi a kemeente fu libi na a wan. Boiti dati, u ná o go e poti sani a internet di o meke taawan fii wan fasi. Ma a moo pelensipali sani a taki Yehofa o belesi u. A o lobi u tu.